Read Zeme Naga JOB 19 Bible Online

JOB 19 - Zeme Naga bible

JOB 19

¹Chidadege Jobbe ne kak ze:

²“’Ndaitie ge ningnui ne achu tewhereu ze, sam ramme ne achu tewdesuirui gai ze bam ra rei lau?

³Aipau lua kereu ningnui ne a peireige ka’ngngiambe tua gai de lei; achu tew’ngkui gai ra ningnui â ’ngngam mak mei?

⁴Zai I kemaube ze gesang lêuzaidu, I maube ze â a dage runne bam lei.

⁵A peireige ningnui runne ningnui je teichu’ngngu gai, zai I kahelêube gene achu tew’ngkui gai ra tew lei dizai â,

⁶tâumakbe ge Hera ne achu kai de lei, zai pe gu chîak ne achu ruichim ’ndi de lei be chî le zu lau.

⁷Pie le lau, I ’nrung ze, ‘Achu tewhereu gai bei de lei,’ kacheu de lei, kane a kuâ kak kai mak te lei; I kû’nchi gai de lei, kane samram’nzeigaibe ga lei.

⁸I tatpelachi lak ra hangge pa ne a ’mpuî rienam ’ndi de lei, zai pa ne a ’mpuî ramme ge kemuîbe kai bei de lei.

⁹Pa ne a dagene a ngeudibe luaktua ’ndi de lei, zai a peî gene heguangpeichûp lu ’ndi de lei.

¹⁰Pebâm ’nsangne ge pa ne achu tewkau gai bei de lei, zai I â ga de lei, I kaheguîbe ze pa ne hingbang je gum ze puitua ’ndi de lei.

¹¹A peireige pa ne pe lumpumted kai de lei, zai achu pe teureipeu hangge riam gai de lei.

¹²Pe gu hereikang baudime wangkaherua de lei; penui ne achu ’nggi ra tâ ramme tewchu gai de lei, zai a gu paîki tuagua de lei.

¹³“Pa ne a puiname je a dagene tei’ndeu ’ndi de lei, zai achu chika’mmime je a dagene tew’ndeutau ’ndi de lei.

¹⁴A kiduîme benai a kang kahechutme ne achu chî ta di de lei;

¹⁵a ki ge a gia chang ze rêume ne achu ’ngngaî ’ndi de lei; a guâ ka’ngguapui ramme me achu hesang’mpeu hang riam gai de lei; penui mikngau ge I â hesang’mpeu chang di de lei.

¹⁶A guâ ka’ngguapeu je I kû de lei, kane achu kak mak lei; a mui sing ne pechu kiâm himchang ra chang di de lei.

¹⁷I â a nâu ne achu â ’mbiaderabe kau chang di de lei, a pui sing ne lungkeube na ’mpeumi ramme hangge katenetbe chang di de lei.

¹⁸Napoine ramme ’nsangnedu achu ngauka’nna de lei; I zuachube luage penui ne achu saka’nsia de lei.

¹⁹A kang kahechutme ne achu ngaukatenet te lei, zai I kehungme ramme ne achu ngaugailak ti de lei.

²⁰A gei benai a chie ge a ra ramme kupgit kai di de lei, zai I â chaitena di de lei.

²¹Achu ngau’nggia gai lau, achu ngau’nggia gai lau, Hei, ningnui a kangme gau, Hera ba ne achu deîtau ’ndi daseu!

²²Hera ne gum ze ’ndaitew ningnui achu guaka’nchu lau? ’Ndaitew ze a pum kahereube gene ningnui lungwângchang gai de mak lau?

²³“Hei, a sam ramme raw gai lu nung laîzai! Hei, chiramme ze leisikuak ge raw gai bei nung laîzai!

²⁴Hei, betingbeta hangge tingchu ge hegeî benai hegimikchêu geî gu leisitang ne chiramme ’nrit kai ’ndi nung laîzai!

²⁵Achu Ripatpeu ring la lei be I â chî daseu, zai nâlangbe ge kedeirei ge pa sap ku lei;

²⁶zai a gei ze aigum ze tew’nsia’ndibe chang dezai a hemeipum gene Hera je I ngau gu lei,

²⁷pechu a taihiage I ngau gu lei, zai a mik ne ngau gu lei, kêdabe ne ra mak lei. A lung gene heguîkualak-desang lei!

²⁸Ningnui ne, ‘’Ndaigum ze pa ne pechu gua’nsa ra lau!’ ze mei nune, ‘Patedeu tak ze â pe dagene bepîbang putchube kau lei,’ ze mei kacheu zai â;

²⁹hiazutkie je hing le lau, helumpumbe zene hiazutkie gu tewsabe â teiwang daseu, chidezai samrambe la lei be ningnui chî le ra hangge zeu,” ze kacheu de lei.