Read Zeme Naga JOB 2 Bible Online

JOB 2 - Zeme Naga bible

JOB 2

¹Tingwang masuage Hera name saplia ra wang’nduikadaibe mai ge, Tingwang masuage saplia ra hangge Satan du penui ruage wang de lei.

²Zai Tingwang ne Satan je, “Nang ’ndai’mbene wang gai lau?” kacheu de lei. Satan ne Tingwang je kak ze, “Kedeirei ge tatpat tatgut zai chige tat-hang tatkeube gene wang gai lei,” ze kacheu de lei.

³Zai Tingwang ne Satan je, “A guâ ka’ngguapeu Jobbe je, mî de kedeirei ge pa gumbe kau ga lei be, heziâk ga zai ziemmena ka’nzeibe kau, Hera je hingchibe kau, zai kesiabe gene bamchambe kau lei be nang chîpat mei? Pa tedeu ga ze pechu tew’nsia ra pe peireige nang ne achu gecheu gai bei sede pa â pe lung ’ntiprip ze lamui rei lei,” kacheu de lei.

⁴Chidadege Satan ne Tingwang je kak ze, “Mi gei hangge mi gei! Ziemmena ne pe gu keringbe hangge pe dage kebambe leine pei gu lei.

⁵Kane chunage ning ba getuapat ze, zai pe ra benai pe chie ge deî gai be lau, dezai ning masua gene ningchu pa deset kai gu de lei,” kacheu de lei.

⁶Zai Tingwang ne Satan je, “Pie le lau, pa â ning gu rezie kangge la de lei; kane pe gu keringbe ’nzuak kai be lau,” acheu bei de lei.

⁷Dadege Tingwang masua gene Satan zuatat ti de lei, zai Jobbe je pe pîdei gene chu ze pe peî’nning riâ chang ze heteu teuluapinbe ne tewsâ gai bei de lei.

⁸Zai pe jâm kua ra hangge hegamli pângdibe-pakpi pa tei lu timbun zeu ge ’ntau ze bam de lei.

⁹Chidadege pe nâu ne pechu, “Chuna du nang ning lung ’ntiprip ze bam rei mei? Hera je deset kai lu chai zu lau,” kacheu de lei.

¹⁰Kane pa ne pe nâu je, “’Mpuimi kemieme samsa gum ze nang sam sa lei. Hera ba gene mâ-keyibe anui lu ze, zai kesiabe â anui lu mak ra mei?” kacheu de lei. Airamme leine ge Jobbe â pe mui gene hemui gai mak te lei.

¹¹Chunage Jobbe kangme hangchum ne pe peireige aigum ze kesiabe wangchangbe leine seu lu dege, penui bâm bâm gene penui wang de lei, chime ze â, Teman’mpeu Eliphazbe, Shua’mpeu Bildadbe zai Naama’mpeu Zopharbe de lei. Pechu nguadesuigaihâ ra, zai pechu tum gai ra pe dage wang ra penui suî nguahezuâ gai de lei.

¹²Zai kedeu ’mbene penui pechu ngau lu dege, penui peluî chî ta di de lei; zai penui ’nrung ze hap te lei; zai penui paîni ramme hit ze penui peirei ’mbe kehu ’mbe kedeiniamoîne ’nruk kai de lei.

¹³Zai hezie sena zai tingmuî sena kedei ge penui pechu nguakantau de lei, pa hereu-desangdibe penui ngau di dadege, mî de pechu samkie katte ’mpau mak te lei.