Read Zeme Naga JOB 20 Bible Online

JOB 20 - Zeme Naga bible

JOB 20

¹Chidadege Naama’mpeu Zopharbe ne kak ze:

²“Chipauziegene I mâ-ka’nningbe gene achu samkak te lei, a lung ge kenangdibe ziegeneu.

³Achu ngauka’nnabe gene ka’ngngiambe I seu lei, zai I mâ-gechîbe bambe gene herui ne achu kak lei.

⁴Aize ’ndâ gechîng ting gene, ziemmena je kedeirei ge kaibe gene seu ze,

⁵ziemmena kesiabe kau je teichu’ngngugaibe â beting keduîne runne bam lei, zai Hera je chimakbe kau suigut â luakat hang runne lei be ze nang chî mak mei?

⁶Pehut ze ting tûngteman ze bam sede, zai kemâu ramme riâ tûngchang bam sede,

⁷hebâ-hejuî gum ze betingbeta hangge pa â ga gai du lei; pechu ngaulume ne, ‘’Ndaige pa la lau?’ ze acheu gu lei.

⁸Hemangka’mmibe gum ze pa â liamtat tu, zai pechu ngau dai ra mak lei; tingmuîzeu gu keliâbe gum ze pechu â ’nsatuâ ’ndu lei.

⁹Pechu ngaube mik zene pechu ngau dai ta du de lei. Pa lungbe bâm gene du pechu pie dai ra mak lei.

¹⁰Pe name zene kelaksiame suigut tew ra peu gu lei, zai pe ba gene pe heurâ peipat kai dai ’ndu lei.

¹¹Pe ra ramme pe ran chiperîsi la de lei, kane kedeiniamoîne zeu ge pe dage chize nguabai’mpam gai gu lei.

¹²“Kesiabe ze pe mui ge â kum leusede, chize pe leipak kangge pa bai sede,

¹³chize pa ’mpat kai nei mak luisui ze, zai chize pe mui ge kegim ze bam sede,

¹⁴chi acheusede pe bungpui lung gene pe gu hetak ze hui di lei; chize ne pe lung ge henêu’nchai chang lei.

¹⁵Keheube ramme pa ne ’nzuakeu lu ze chiramme ze ’nruîpat kadai lei; chiramme ze Hera ne pe bungpui gene tuâpat kai lei.

¹⁶Henêu-’nchai pa tup ku lei; mechinêu ne pechu ’nsâuchat ku lei.

¹⁷’Nggeuki ramme peireige pa heguapie gai ra mak lei, ’ngkuidui benai tungdui ne luabe geuki zeu.

¹⁸Pa tâ tewhereugaibe rachî ze pa peiruî dai ’ndu lei, zai chize ’nneikeu gai ra mak lei; pa helîkahedetbe gu pelâp ngaube gene pe suitewka’ntabe pa ngau ra mak lei.

¹⁹Kelaksiame je pa ne chaîkeniak kai ze put kai ’ndi daseu, pa ne tewgaimakbe ki ze pa ne sut ’ndi de lei.

²⁰“Pa kadekumbe saukeu mak luisui ze bambe ziegene, pa ne ka’nchâbe zat mâ de pa ’nsak kai ra mak lei.

²¹Pa mâ-teulube chângge mâ de ’nsak mak te lei, chidaze pa keheube ze bam bam ra mak lei.

²²Pa lungyi puitingbe luage pa pe duânggabe wangchang gu lei; lungkahereube pecheuchibe leine pe peireige wang gu lei.

²³Pa pe bungpui teupuitinggairabe hangge Hera ne pe lumpumted pe lung ge lang gai gu lei; zai chize pe hetak gum ze pe peireige ruîkeu gai de lei.

²⁴Hegeî hereimerua gene pa pak’mbia gu lei; kangngâgeî gu bai’mpitu ne pechu kappelapik kai bu lei.

²⁵Chize tukpat ze pe pum gene lupat te lei, pemuitû kereupelinglube ze pa’mmâu gene lupat te lei; mi kehingbe ramme pe peireige wang de lei.

²⁶Pe heurâ hangge muîgitbe kaikua la de lei; ’mmut’ntaugaimakbe hemi ne pechu rû ’ndu lei; pe gu paîki ge ’ndaikau ’nsak kai mei be rû ’ndu lei.

²⁷Tinggîm ramme ne pe gu hemui-helut ralia gu lei, zai kedei ne pechu ’nggichu gu lei.

²⁸Pe ki gu merua ramme teitat kam du lei, Hera pe lumpumbe mai ge chakkereutat kam du lei.

²⁹Aize ziemmena kesiabe kau gu hedam hang Hera dagene ngaube de lei, pe heurâ hangge Hera ne diepatkai’ndibe zeu,” kacheu de lei.