Read Zeme Naga JOB 21 Bible Online

JOB 21 - Zeme Naga bible

JOB 21

¹Chidadege Jobbe ne samkak ze:

²“A sam ramme ’ngking’mmizun le lau, zai aize ne peize ningchu tumgaibe sam chang lau.

³A kuâ ’ngking gai rî lau, dezai I samsa gu lei, zai I sagailube châng gene teihenuitew dai lau.

⁴A tedeu ge â I a lungneusam sabe ze ziemmena peireige semei? ’Ndaitew ze a lung lielak mak bam ra lau?

⁵Achu pie gai ni lau, zai ningdaulak bam lau, zai ningnui ba ne ningnui mui kebachim ne lau.

⁶Chize I ’nning gai dege â I a duângga di de lei, zai a pum kedun di de lei.

⁷’Ndaitew ze ziemmena kesiame ring ze gechîngbe riâ chang, zai reziechi-desang ze pat lau?

⁸Penui masua gene penui name beichu gai, zai penui mikngau gene penui chaname je ngau lei.

⁹Penui ki ramme â kehingga ze lung lei, zai Hera gu hetui penui peireige bam mak lei.

¹⁰Penui gu getumsei â hingkeusau mak lei, penui gu getumpui ramme bepoine lungkeu ’nsui, zai penui na kêu mak lei.

¹¹Penui â penui name je melidung je gum langpat lei, zai penui name ne lim lei.

¹²Penui â ’nsum benai ’nra kuâ teri ze heleutew lei, zai metiam kuâ ge penui suiyika’nta lei.

¹³Penui gu tingnaimikpui ramme ge penui â lungtemichai ze bam lei, zai temichai ze Kechaiberam ’mbe penui wangkeu lei.

¹⁴Penui ne Hera je, ‘Anui dagene rimna de lau! Ning gu ’mpuî ramme gechîbe ze anui â ’nchâ mak lei.

¹⁵Anui ne pe guâ ’nggua ra hangge Reziechibe Rapeu ze ’ndaikau lau? Anui ne pechu kellum bei laîzai du, ’ndaikau kegiebe anui ngau lau?’ kacheu de lei.

¹⁶Pie le lau, penui lungyibe â penui ba ge bam mak mei? Ziemmena kesiame gu geteiliabe â a dagene deu lei.

¹⁷“Ziemmena kesiame gu kachâbung lua ’ndaikie geze tew’mmut kai ka’nzie lau? Chidezai penui pausiabe penui peireige wangchang ra hangge zeu? Chidezai Hera ne pe lumpumbe gene geteubeted ramme ’nzigairabe hangge zeu?

¹⁸Chidezai penui â tingkaiguibe ge megau gum, zai tingkaichibe ne chêurie guitattibe gum chang de ra hangge zeu?

¹⁹Ningnui ne rang ze, ‘Penui gu hemui-helut ze penui name hangge kaigekua gai de lei,’ kacheu de lei. Chize penui chî le ra, peize pa ne penui pumgîm sing ge peiruî gai be lau.

²⁰Peize penui mik sing ne penui je tew’nsiagaibe ngau le lau, zai Reziechibe Rapeu lumpum peize penui sak zu lau.

²¹Penui gu hekêu ramme riak tew’nsau gai dezai, penui chângge penui kelak ramme lungrabe hangge ’ndaikau penui ’nningkahereube la lau?

²²Kehube ge bamme je pa ne samram lei be ngau lu ze, mige ne Hera je kaningchingbe geteilia dui mei?

²³Mihangkat lungyi’nsangsiak ze, temichai ze tenang mak ze,

²⁴pe pum ge pe châ ne pui ze, zai pe ra-’ngking ’nnimsim ze chai lei.

²⁵Kêdapeu pa keringbe lunghereu ze, mâdau de keyibe ’ndâu gai mak ze chai lei.

²⁶Penai hangna ze mâ de gechâmbe ’ngga ze kedei ge bai gai lei, zai tingsîpui ramme ne penai je chûmchim de lei.

²⁷“Pie le lau, ningnui ka’nningbe ramme, zai achu chau’ngkui gai ra ningnui chiambe ramme I chî lei.

²⁸Ningnui ne, ‘Saîbe ki ’ndaige la lau? Ziemmena kesiabe kau lungbe paîki ’ndaige la lau?’ ze kacheu daseu.

²⁹’Mpuîki ramme ge tebeîtewme je ningnui â ’nneu gai mak, zai penui ne sabe sam ze ningnui â lutei gai mak mei?

³⁰Ziemmena kesiapeu je â pausiabe daube mai ge ’nzuak kai bei, zai pe lumpumbe mai ge pechu meupat kai bei lei be zeu?

³¹Châu ne pe gu telungtak ze pe masuage salia, zai pa ne tewgai’ndibe hangge châu ne peiruî bei lau?

³²Heraw ’mbe pechu puatat kai dege, pe raw peireige hekêt-kai ze bam lei.

³³Pechuak gu kedei ze pe hangge yi-kadesang lei, ziemmena leine pe chai suitat te lei, zai pe sua raîtatme â sei kam lak lei.

³⁴Chidaze ’ndaigum ze mâ de ga ze ningnui a lungsuî tewtemi gai ra lau? Kaheratbe ramme zangno mâ de ningnui ne samkakdairabe ga de lei,” kacheu de lei.