Read Zeme Naga JOB 22 Bible Online

JOB 22 - Zeme Naga bible

JOB 22

¹Chidadege Teman’mpeu Eliphazbe ne kak ze:

²“Ziemmena mige Hera hangge kegiebe chang dui mei? Pelingsing ze mige kaningchingbe kau â pe runne hangge kegiebe bam lei.

³Nang ze pelingtewbe kau chang dizai â Reziechibe Rapeu pe suiyi gu mei, nune nang kelungbe ’mpuî ge heziâkga ze bam ra nang ne tew zai â, pe hang kegiebe bam gu mei?

⁴Pechu nang hingbe ziegene ningchu pa ne laddei, zai ningchu samrambe ge teigut kai mei?

⁵Nang kesiabe ze di-desang di de mak mei? Ning gu hemui-helut ramme â saubetun gai mak lei.

⁶Mâ de patedeu ga ze ning sikiname dagene pa’nchung ramme nang lu lei, zai pumlâng bam ra penui paîni gâu gai bei de lei.

⁷Nang â peran-game je hedui sak ra pei gai mak lei, zai ka’njeime je nang â tingku peilak lei.

⁸Reziebambe kau ziemmena ne heram ’nram ’ndi lei, zai chige ’nchâbeibe kau ziemmena ne lung lei.

⁹Kemîpuime je nang ne penui barua langtua gai bei de lei, zai ’nggiâne ba ramme tew’nsia gai bei de lei.

¹⁰Chipauziegene ’mpia ramme ne ningchu guâgit bam de lei, zai mi kehingbe ’nnangketwangbe ne ningchu naî ’ndi de lei;

¹¹ning gu kebabe â tewmuî ’nde lei, chidezai nang ngauchi ta de ra hangge zeu, zai heduidibe ne ningchu naî ’nde lei.

¹²“Hera â tinggîm ramme ge hutau ze bam mak mei? Hegi hulangbe ramme pie gai ni lau, ’ndaizeuge penui hu lau!

¹³Chipauziegene nang ne, ‘Hera ’ndaikau chî lau? Muiterîngbe gene pa samramchi duî mei?

¹⁴Pa ngau mak ra hangge mauzingkâng ramme ne pechu chûm ’nde lei, zai pa â tinggîm ’mbungringbe peireige tat lei,’ ze kacheu de lei.

¹⁵Ziemmena kesiame tatkaibe ’mpuî perie ge tat bam ra rei mei?

¹⁶Penui ting chang mak ze penui je â ’nzaptat ti de lei; penui putchube-pîbang â biaktua ’ndi de lei.

¹⁷Penui ne Hera je, ‘Anui dagene rimna de lau,’ acheu, zai ‘Reziechibe Rapeu ne anui je ’ndaikau tewchi dui lau?’ kacheu de lei.

¹⁸Acheusede penui ki ramme mâ-keyibe ramme ne pa ne tewpuiting gai bei lei— kane ziemmena kesiame gu geteiliabe â a dagene deu lei.

¹⁹Pelingtewme ne chize ngau lu penui suiyi lei, pemâugame ne chize ngau lu ka’nnui lei,

²⁰acheu sa ze, ‘Pelingsing ze anui teureime je â tew’ngga ’ndi de lei, zai penui ne ’nsakkaidiakbe ze hemi ne rû ’nde lei,’ kacheu de lei.

²¹“Hera dage hezuâ le lau, zai nguadesieyi ze bam lau; chigene mâ-keyibe ning dage wangchang gu lei.

²²Pe mui gene geteiliabe sam lu le lau, zai pe sam ramme ning lung ge kaigekua gai le lau.

²³Reziechibe Rapeu dage nang helatwang dai ze ning runne ningchu tew’nchei gai dizai â pelingtewmakbe ze ning gu paîki gene lutua’ndeu ’ndizai â,

²⁴kedeiniazeu ge ning gu gechâk ze kai ’ndizai â, zai Ophir gu gechâk ze ’nggeuki sîng ge tingchuzeu ge kai ’ndizai â,

²⁵zai Reziechibe Rapeu zene ning gu gechâk benai ning gu gepût pemîhungbe chang dizai â,

²⁶chigum dizai â Reziechibe Rapeu ge nang ning lungwângchang gu lei, zai Hera dage ning ma ’ngngangchu gu lei.

²⁷Nang pe dage ning gu gekietew gai gu, zai pa ne ning kuâ ’ngking gai gu lei; zai nang hatkailube ramme nang pei gu lei.

²⁸Mâ-tâdeu tew ra nang ’nning gai dezai chize ning hangge tew gai bu lei. Zai ning gu ’mpuî ramme ge kebabe pa’mbi lereba ze bam gu lei.

²⁹Keditewme je â Hera ne tewhelêu gai, kane kecheiluitewme je â pa ne tew’nring gai lei.

³⁰Pemâugabe kau je pa ne ripat kai lei; ning ba ’nchibeibe gene ningchu ’nripat kai gu lei,” kacheu de lei.