Read Zeme Naga JOB 23 Bible Online

JOB 23 - Zeme Naga bible

JOB 23

¹Chidadege Jobbe ne kak ze:

²“Nemai ge du I kahereube â beted’nsî ze lamui lei, I huaipun ze bam sede pe ba dapritsit ze lamui lei.

³Hei, pechu peudaurabe bâm I chî nung laîzai, chidezai pebâm sing ge du I wangchi le ra hangge zeu!

⁴Chidezai pe suage a tûdeu ze I kai gu, zai a mui ge sam kahepanbe ne puigit ze bam gu lei.

⁵Achu pa ne kakkairabe ze I chî le ra, zai achu ’ndaitew lei ze rang gai ra mei be I chî le ra hangge zeu.

⁶Pe gu rezie peranchibe gene achu pa ’nggi gu mei? Mak lei; a kuâ pa ’ngking gai gu lei.

⁷Chige ziemmena pelingtewbe kau pechu ’mpau le dui lei, zai a gu samrampeu ne betingbeta hang a hang râm’nzei gai gu lei.

⁸“Pie le lau, I zuapat te lei, kane pa â chige ga lei, zai ’nchai’ngngîn kadai de lei, kane pechu I ngauchi lak lei;

⁹heku’mbia pechu I hegua gai, kane pechu I ngauchi lak lei, hezat’mbia I ’nreiwang lei, kane pechu I ngauchi lak lei.

¹⁰Kane pa â I tatbe ’mpuî ze chî lei; pa ne achu kedak lu dezai, gechâk gum ze I zuapat ku lei.

¹¹Pe pikiâm ramme ge a pî â kai’ntiprip kai lu de lei; pe gu ’mpuî ze I tatka’mmi de lei, zai tatlietat mak lei.

¹²Pe mui gene ranggaibe hingde gene I â rimna mak lei; pe mui gene ranggaibe sam ramme I â a lung ge reîgekua gai lu de lei.

¹³Kane pa â kelimakbe kau lei, zai châu ne pechu tei’nreichi dui lau? Zai pa ’ndaikau tew nei mei be, chize pa â tew lei.

¹⁴Pa ne a hangge ’ndaikau die gai mei be pa â tew’nsang gu daseu; zai chigumbe ramme misongga ze pe lung ge la lei.

¹⁵Chipauziegene I â pe masuage hing di de lei; I ’nningdesi gai dege â, pechu I â hing-kadesang lei.

¹⁶A lung pejiesiakeu de ra Hera ne tew gai bei de lei; Reziechibe Rapeu ne achu tewhingrim gai bei de lei;

¹⁷kemuîbe ne achu â kelimchim ’ndi, zai muiterîngbe ne a ju gumchim ’ndi daseu.