Read Zeme Naga JOB 24 Bible Online

JOB 24 - Zeme Naga bible

JOB 24

¹“’Ndaitew ze Reziechibe Rapeu ne samrambe nehî ramme kai mak lau, zai ’ndaitew ze pechu gechîme ne pe gu tingnaimikpui ramme mâdau ngau mak lau?

²Ziemmename ne heramrai chukâng ramme puikeli, penui ne kauruidung sut lu penui je reîtat lei.

³Kemî-’nggiâne gu hekunmerângne penui ne kumtua lei; ’nchunggairabe hangge kemîpui gu getumsei penui ne lu lei.

⁴Penui ne kelaksiame je ’mpuîki gene chuitua lei, kedeirei ge lungchulakme leine ne ka’mbai de lei.

⁵Pie le lau, tingkangram ge hênam gu hekunmerângne ramme gum ze, penui name hetak hang hênamkang ramme ge peu ra hereu ze tew ra penui zuapat lei.

⁶Helu gene kaurui hetak hang penui kagetai lei, zai ziemmena kesiapeu gu grepchî merie ge patehaine penui lu lei.

⁷Kemuibe ting tâluî paî ba mak ze penui jei lei, zai kahegeibe ge bâgairabe penui dage ga lei.

⁸Kedeiloa dibe ramme ge tingruibe gene penui â chimbiak ti de lei, zai ’nseugairabe bâm gabe ziegene tingchu ge ka’ngngêu lei.

⁹(’Ngngiêne je puatungbambe gene chaktattime, zai kelaksiame na ’ngngiêne je pa’nchung hangge teitattime lamui lei.)

¹⁰Penui â paîni kai mak ze pumlâng tatrua bam lei; ’njei ze mekum ramme penui pua lei;

¹¹ziemmena kesiame gu olib tauperiabanggaibe gene penui â, mâ-châdui tewpat lei; wain neibe bâm ramme ge penui ne niak lei, kane hedui kahereibe lie ze bam lei.

¹²Namdi gene chai ra tewdime huaipun bam, zai kahejambe kau ’ngngâ gai ra hangge ’nrung ze bam lei; acheuleusede penui gekiebe ze Hera ne mâ-hangge du chak kai mak lei.

¹³“Kebabe je ka’nggibe kau ramme, chipau ’mpuî chimeluisuibe kau ramme, zai chipau ’mpuî ramme ge bammakbe kau ramme lamui lei.

¹⁴Kegîpeu â kemuîbe hî ge zuachu lei, chidezai kelaksiame benai kegame je pa tewchat le ra hangge zeu; zai tingmuî ge â pa â kahegapeu gum lei.

¹⁵Kahemabe kau mik ze du muîramkeu ra kuâ bam lei, acheu sa ze, ‘Mî de achu ngau ra mak lei,’ kacheu de lei; zai pa pe ju luî tewchâm de lei.

¹⁶Kemuibe hî ge heki ramme penui riputgut te lei; kebabe hî pat dege â penui runne penui je kainam lu bam lei; penui â kebabe je chî mak lei.

¹⁷Penui ’nteumena hangge â muiterîngbe ze hechua hangge chang daseu; muiterîngbe ge mi kehingbe ramme je penui â penui kang chang daseu.

¹⁸“Ningnui ne sa ze, ‘Hedui ramme peireige penui je â, ’ntîtat kelua de lei; kedei ge penui gu hedam ze â deset kai ’ndi de lei; wain neibe kau ne penui gu grepchî merie ramme lam’mbia ’nreipie gai mak lei.

¹⁹Kechangbe benai kelumbe ne kebundui ramme sut-tat te lei; chigum ze hemuigai’ndime je Kechaiberam ne chigum ze tew lei.

²⁰Namdi gu keloa’ndi ramme ne penui je ’ngngaî ’ndi lei; penui ji â chibam ta di de lei; chigum ze kesiabe je â hingbang je gum ze tewbat kai lei,’ kacheu de lei.

²¹“Penui ne henagabe kau ’mpuimi je nîmteu lei, zai kemîpui dage mâ de keyibe tew gai mak lei.

²²Acheuleusede Hera ne pe gu reziechibe gene peranchime keringbe tew’ntie gai lei; penui ringgailaktibe luagene penui zuachu lei.

²³Pa ne penui je ’nggum bei, zai penui je ’ngngâ gai bei de lei; zai penui ’mpuî ramme ge pa ne pe mikpie kai ze bam lei.

²⁴Beting kedui ne penui je teichu’ngngu gai lei, zai chipau chângge penui tat ti de lei; mâ-neu gum ze penui heguikeu ze chai gai di de lei; hemeubuî je gum ze penui je râm de lei.

²⁵Chi acheu mak laîzai â, chauge ne achu karasasabe kau hangge chau gai ra lau, zai I samsabe ze mâtâu hang du ga lei be teilia ra lau?” kacheu de lei.