Read Zeme Naga JOB 26 Bible Online

JOB 26 - Zeme Naga bible

JOB 26

¹Chidadege Jobbe ne kak ze:

²“Reziegabe kau je ’ndaigum ze nang ’ngngâ gai bei mei! peran-gabe kau ba ze ’ndaigum ze nang tew’nring gai bei mei!

³Kaningchingbe gabe kau je ’ndaigum ze nang geteilia’mmi gai bei mei, zai mâ-gechîbe misongga ze ralia gai bei mei!

⁴Châu ’ngnga gene sam ramme nang sapat, zai châu lungtak ning dagene zuapat bei lau?

⁵’Ngkang ’mbe bambe kezui ramme, zai hedui benai chige lungme kakelip te lei.

⁶Hera masuage Kechaiberam â pumlâng bam lei, zai Abaddon â paî tapchimrabe ga lei.

⁷Pa ne peruahuângbe ge tingpeî je chak’ntiepat kai, zai mâ de gabe peireige kedei ze keî’nchie gai bei de lei.

⁸Pa ne pe gu mauzingkâng ramme lungge hedui ramme ze kaknam gai lei, chiramme kangge kemâu pângpat mak lei.

⁹Pa ne hekêu ju tapnam gai lei, zai chipau peireige pe gu kemâu tap kai lei.

¹⁰Pa ne kebabe benai kemuîbe herai kakge, hedui ramme peireige pa’nrai ’nrit kai lei.

¹¹Tinggîm chia ramme kakedun lei, pa ne ’ngngiambeibe ge pe suî ga di de lei.

¹²Pe gu reziechibe gene pa ne sungkling je tew’nsau mang gai lei; pa mâ-gechîbe bambe gene pa ne Rahab je bichat ’ndi lei.

¹³Pe gu tingkai gene tinggîm peluî ngauyi ra tew gai bei de lei, paktattibe henêu je pe ba ne supela gai bei de lei.

¹⁴Pie le lau, airamme ze â pe gu ’mpuî ramme gu pa’mpahia runne rei lei; zai ’ndaizeuge kecheîne pa katelumbe anui seube zeu! Kane pe gu reziechibe kengimchunbe, châu ne ’nningchichang dui lau?” kacheu de lei.