Read Zeme Naga JOB 27 Bible Online

JOB 27 - Zeme Naga bible

JOB 27

¹Zai Jobbe ne pe samrabe sa dai ze, acheu sa ze:

²“A ’nzei ze teitattipeu Hera bambe ziegene, zai a keringbe beted’nsî ra tewgaipeu reziechibe Rapeu ringbe ziegene;

³a dage a chuilu bam tâne, zai Hera gu herui a keringbe ge bam tâne;

⁴a mui ne karasa sam sa ra mak lei, zai a leiria gene gechoa-keduai sam sa ra mak lei.

⁵Ningnui ’nzei lei ze sa gai ra hangge â a dagene deu-desang de lei; I chai mak tâne I helungka’ntipbe ze a dagene I lutua ra mak lei.

⁶I pelingtewbe ze I â teika’ntip lei, zai chize ’mpat kai ra mak lei; a gu naimikpui ramme kat ge du a lung gene achu tewkengam gai mak lei.

⁷“Peize a teureipeu â Ziemmena kesiabe kau gum ze bam lau, zai achu ’nggi ra zuachube kau â pelingtewmakbe kau gum ze peize bam lau.

⁸Hera ne pechu tuâpat kai ’ndi dezai, Hera ne pa keringbe lutat ti dezai, Hera je chimakbe kau hangge kaheguîbe ’ndaikau la lau?

⁹Pe peireige kahereube wang dezai, Hera ne pe kuâ ’ngking gu semei?

¹⁰Reziechibe Rapeu ge pa pe lung suiyi gu semei? Pehî’nsangne ge Hera je pa kû gu mei?

¹¹Hera ba tatew deu ge I ne ningnui je geteilia gu lei; Hera dage bambe ze I â teikebai ra mak lei.

¹²Pie le lau, chize ningnui ’nteumena ne du ngau lu de lei; chidaze ’ndaitew ze ningnui peruânggabe chang kam gai di lau?

¹³“Aize Hera dagene ziemmena kesiabe kau hedam ngaurabe, zai Reziechibe Rapeu dagene katîmphime ngaurabe heurâ de lei:

¹⁴Pe name heluî hingpat lêuzaidu, chize hiazutkie hangge de lei; zai pe cha pe name â teu’nggeu ra ngau mak lei.

¹⁵Pe dage ’nsakkaime je herarît ne tewtimbai nan tai lei, zai penui gu kemîpui ramme ne desui gai mak lei.

¹⁶Kedeiniamoîne gum ze gepût kaigekua gai, zai depungtûm gum ze paîni pa kaigekua gai leusede;

¹⁷pa kaigekuagit kai leusede, kapelingbe kau ne chize kai gu, zai pemâugabe kau ne gepût ze ’nzi gu lei.

¹⁸Pa heki tewbe ze â ’ndiakrâ gum, hekêtkaipeu ne hetiamki tewbe gum lei.

¹⁹Lungyi ze pa jei lei, kane chigum ze pa tew dai ra mak lei; pa pe mik rakpat dege pe heurâ ga kam di lei.

²⁰Mi kehingbe ramme ne (’nggeuki) duidibe gum ze pechu guachang lei; tingmuî ge natri ne pechu teitat lei.

²¹Tingbia gu tingkai ne pechu puachu lei, zai pa â ga gai di de lei; chize ne pebâm gene pechu biaktua lei.

²²Chize ne ngau’nggia meluisui ze pechu chup lei; chipau ranchibe gene pa â pe laîkai ze pak ti de lei.

²³Chize ne pe peireige pe ba kagekeu lei, zai pebâm gene pechu kakerai lei.