Read Zeme Naga JOB 28 Bible Online

JOB 28 - Zeme Naga bible

JOB 28

¹“Pelingsing ze gepût kuibe bâm la sing lei, zai penui ne gechâk rûka’nchibe bâm la lei.

²Kedei gene hegeî â langpat lei, zai hetageî â hegeîchu gene langpat lei.

³Ziemmena ne kemuîbe tew’ngga gai, zai deulangbe riâ chang ze hegeîchu hâmmuîbe benai tikringbe peutat lei.

⁴Ziemmename lungbe bâm gene kedeu ’mbe penui ne kedeikuiki ramme supat kai lei; tebeîtewme ne penui je ’ngngaî ’ndi lei, penui â ziemmename dagene kedeu ’mbe kezit’ndeu di, penui â kezitrua bam de lei.

⁵Kedei deu geze â chi gene hetak hang pat lei; kane besîng ’mbe â hemi gum ze tewkedet kai bei lei.

⁶Chipau tingchu ramme â Sapphir chu ramme bambe chu bâm ramme lei, zai chige gechâkmoîne bam lei.

⁷“Chipau ’mpuî ze â mâ-nîmteube ’nruine ne chî mak lei, zai kelie mik ne chize ngau gai mak lei.

⁸Kahegiêbe hekaune ramme chige tat kai mak lei; chipau peireige duilui tatpela gai mak kerei lei.

⁹“Tingchu chipelikpikbe ge ziemmena ne tâtew de lei, zai kedeiloa kedibe ramme je pe pî ’mbene puitua ’ndi lei.

¹⁰Tingchu ramme ge pa ne ’mpuiga ramme giapat kai lei, zai mâ-pemîhungbe zat leine pe mik ne pa ngau de lei.

¹¹Luaniam-niamne ze lua mak ra hangge pa ne ’nggeuki poine ramme kangherua gai lei. Zai mâ-’mbaidibe ze pa ne kebabe ge teipat kai lei.

¹²“Kane ’ndaige kaningchingbe je peudau ra lau? zai mâ-gechîbe bambe bâm ’ndaige la lau?

¹³Chilia tatrabe ’mpuî ze ziemmena â chî mak lei, zai keringme ram ge â chize peudau mak lei.

¹⁴Gechukbe ne sa ze, ‘Chize â I ge ga lei,’ kacheu de lei, zai sungkling ne, ‘Chize a dage ga lei,’ kacheu de lei.

¹⁵Gechâk ne chize luchi lak lei, zai pemî hangge gepût ne ’ndeugaichi lak lei.

¹⁶Chize Ophir gu gechâk, zai pemîhungbe oniks mei nune Sapphir mei ne pemî teikedachi lak lei.

¹⁷Gechâk benai judageî ne chi je pemî tei’nsamgaichi lak lei, zai gechâk ge teluichu ramme bambe ne pemî ’nchunggaichi lak lei.

¹⁸Tebai mei nune kristalchu mei â sa gai ra du ga lei; kaningchingbe mî â telui ramme suanedu hu’ngkeu lei.

¹⁹Ethiopia gu topazchu ne chi je teikedachi lak lei, zai gechâk ka’nchibe ne du pemî hang chakkaichi lak lei.

²⁰“Acheuzaine ’ndai’nggene kaningchingbe wang lau? zai mâ-gechîbe bambe bâm ’ndaige la lau?

²¹Keringme leine mikngau gene chize â tei’mbai ’ndi de lei, zai liamruabe ’nruine ramme dagene tei’mbai ’ndi de lei.

²²Abaddon benai Kechaibe ne sa ze, ‘Chipau rasam sabe ze anui kun ne anui seu de lei,’ kacheu de lei.

²³“Chipau ’mpuî ze â Hera ne chî lei, zai pa ne pebâm ze du chî lei.

²⁴Kedei betun-gaibe riâ pa ne pie gai lei, zai tingkehube kangge mâgetaleine pa â ngau kam lei.

²⁵Pa ne tingkai je perît hang peigaibe luage, zai hedui ramme je ’ndeupatkaibe luageu;

²⁶tingruibe hangge pa ne diegaibe luage, zai tingkakepitbe ga hang diepatkaibe luageu;

²⁷chipau luage pa ne chize ngau lu zai rangba gai de lei; pa ne chize beichu gai, zai chize peupat kai de lei.

²⁸Zai pa ne ziemmena dage sa ze, ‘Pie le lau, Tingwang je kehingbe ze kaningchingbe de lei; zai kesiabe gene ka’mbiabe ze mâ-gechîbe de lei,’ kacheu lei,” ze kacheu de lei.