Read Zeme Naga JOB 29 Bible Online

JOB 29 - Zeme Naga bible

JOB 29

¹Zai Jobbe ne pe sam sa’nduâ dai ze:

²“Hei, tingtie tattibe kêu ramme ge I bam rei nung laîzai, Hera ne a peireige pie bambe naimikpui ramme ge gum zeu;

³a peireige pe gu kachâbung sireba bam, zai pe gu kebabe gene kemuîbe ge I tatbambe ting nung laîzai;

⁴I lungyi ze bambe ting, Hera je nguapuinakattewbe a gu hetiampaîki peireige bambe ting nung laîzai;

⁵reziechibe Rapeu a dage ’nnai bambe ting, a name ne achu guâgit bambe ting nung laîzai;

⁶tungdui ne a pichaî huigaibe ting, zai tingchu ne a hangge mâ-châ ramme ruîpatkaibe ting nung laîzai neu!

⁷Namdi keriekemui ’mbe I zuapatbe luage, keloaning ge a bâm hang I reheîgaibe luage,

⁸rehangme ne achu ngau lu ze bâm ’mbia gai de lei, zai gechîngme ne zuachu ze sap te lei;

⁹besuitewme ne mâ dam ta di, zai penui mui kebarim bam de lei;

¹⁰saibe ramme penui kuâneu ta di, zai penui leiria penui hak ge kup ti ze bam de lei.

¹¹A samsa seulume ne achu satoa bam de lei, zai hemik ne ngau lu dege chize hezuâ gai de lei;

¹²kelaksiame kehapme je I ne meupat kai, zai mî ne ’ngngâgairagabe kau kemî-’nggiâne je I ne meupatkaibe ziegeneu.

¹³Gaderatewdibe kau gu ka’nnambe a peireige wangchang de lei, zai hesuiyibe ne heleutew ra kemîpui lung hang I ne tew gai bei de lei.

¹⁴Kapelingbe ne a puâni hang I kai de lei. I ka’nzeibe zene a paîni benai a peî’nggau gum chang de lei.

¹⁵I â pe mikchitme mik chang, zai bepîsiame pî chang de lei.

¹⁶I â kelaksiame peu chang, zai I chimakbe kau tûdeu ge I ne mêuhâ de lei.

¹⁷Pelingtewmakbe kau geu ze I ne tewbat kai de lei, zai pe mui gene pe gu hetak ’ngngaîkeu de ra I ne tew gai bei de lei.

¹⁸Chidadege a lung gene, ‘A chip gene I chai gu lei, zai timbuimoîne gum ze a kering ting tewpung gai gu lei,

¹⁹a ma ramme hedui ge hiampat, a keî ramme peireige kezikdui ’nnimsim ze,

²⁰a dage a ngeudibe rechida ze, zai a ba ge a gu bai’mpi rechida ze bam gu lei,’ ze ’nning gai de lei.

²¹“Ziemmena ne a kuâ ’ngking ze kuâ bam de lei, zai a gu geteiliabe lu ra hangge penui kuâneu mak rim bam de lei.

²²I samsalube chângge penui ne sapeî dai mak te lei, zai penui ne a sam lutei de lei.

²³Tingruibe je gum ze penui ne achu kuâ bam de lei; zai keriakting gu tingruibe je gum ze penui mui ’ngngarim kua de lei.

²⁴Penui dage ’nnumtewbe ’nggadibe luage penui peireige I ’nnuida gai de lei. Zai a mâ karengabe ze penui ne tuâpat kai mak te lei.

²⁵Penui ’mpuî ze I ne kelâng lu, zai besuitewpeu gum ze ’ntau bam de lei, zai pe gu hereikangme ruage heguang bambe gum, kadesuime je tumbepeu gum I lung ze bam de lei.