Read Zeme Naga JOB 3 Bible Online

JOB 3 - Zeme Naga bible

JOB 3

¹Aipau chângge Jobbe pe mui latpat ze pechu lungbe mai je deset kai de lei.

²Jobbe ne sa ze:

³“Achu lungkeugaibe tingnaimikpui, zai ‘’mpeumi napoine je lungkeu gai la de lei,’ kacheube mai tingmuî ze peize ga gai de lau.

⁴Peize chipau mai ze kemuîbe chang gai de lau! Peize kehube ge Hera ne chize peu dai ta lau, zai kebabe du chipau mai peireige peize lerba gai se lau.

⁵Peize kemuîbe benai muiterîngbe ne chipau mai je hiam ne lau. Peize chipau mai peireige kemâu ne chûmnam ne lau; peize tîngna gu kemuîbe zene chipau mai je keheituâ ne lau.

⁶Chipau mai tingmuî je â peize muî’ntiptibe ne nîm ne lau. Peize chipau mai ze â, patingkum gu naimikpui ramme ruage pe suiyi’nta se lau, hekêu ramme ruage du peize wangherua gai se lau.

⁷Eu lei, chipau mai tingmuî ze â zîng ze peize bam lau; chige hesui yi-ka’ntabe kuâ peize seu se lau.

⁸Naimikpui ramme je desetkaime ne peize chipau mai je deset kai be lau, Lebiathan je tew’nrakchime zeneu.

⁹Chipau mai gu hekuâgi ramme peize muî de lau; peize chipau mai muî zene kebabe heguî ze ngaulak ze bam lau, hechua kebabe ’nsangdu peize ngau se lau;

¹⁰chipau mai tingmuî zene a pui gu nebâm kemui ’ngkam ramme kainamgaimakbe ziegeneu, zai a mikngau gene kahereube tei’mbiagai’ndemakbe ziegeneu.

¹¹’Ndaitew ze achu lungbe gene I chai de mak lau, zai nebâm gene zuapat lu chaigene du chai gai de mak se lau?

¹²’Ndaitew ze a pui nie gene achu tuipua gai ra se lau? Makchaine ’ndaitew ze hetung gene achu puatung gai lau?

¹³Chipau luage I chai di nung laîzai â, achu ’njei gai bei ze sauzîng ze bam du de lei; I jeikeu de leu gu da; dezai I sautemi ze bam de lêu gu de lei,

¹⁴kedeirei gu heguangme benai kaningchingbe geteiliame, penui runne penui hangge heki siadibe ramme tew’nsapchudailume ruage,

¹⁵makchai heguangsinme penui dage gechâk bamme, penui ki ramme gepût ne gekuapuigit lu ze bamme ruage zeu.

¹⁶Nune ’ndaitew ze I â henakeube tei’mbia’ndibe poine gum mak, zai mâdau de kebabe ngaumakbe ’ngngiêne ramme gum mak lau?

¹⁷Chige â ziemmena kesiame tâ-kesiabe tew ta de lei, zai chige â keleime sautemi la de lei.

¹⁸Chige â kebang nîm’ndime temichai ze bamherua la lei; kereîpeu kuâ penui seu ta de lei.

¹⁹Kedi-kechei chige la lei, zai kebang du pe pau dagene ’mpat kai ’nde lei.

²⁰“Lunghereu ze bambe kau je ’ndaitew ra kebabe pei gai, zai pe gu keringbe ge pe duânggabe kau,

²¹chai nei di, kane chize wangchang mak, zai baigai’ndibe heurâ ramme du sua â chize peurandibe kau;

²²heraw ze peudaube gene penui suiyi-desang ze, penui suiyika’ntame je keringbe pei gai lau?

²³Pa ’mpuî tei’mbia’ndibe kau, Hera ne rienam’ndibe kau je ’ndaitew ra kebabe pei gai lau?

²⁴I kakehuibe zene a hetak hang chang di, zai I huaibe ramme ze hedui gum ruîpat kai daseu.

²⁵I kehingbe zat ze a peireige wangchang de lei, zai I ne hing-kadesangbe ze achu kahedau de lei.

²⁶I â lungtemi ta da, zai zeûne du bam mak te lei; a hangge saukatemibe ga de lei; kane lungkahereube wangchang de lei,” kacheu de lei.