Read Zeme Naga JOB 30 Bible Online

JOB 30 - Zeme Naga bible

JOB 30

¹“Kane chunage â penui I sua kahenabe kau ziemmena, a gu kauruidung reîbe hetei ramme ruage penui peume je ’nsangdu I kai ra ngauraube kau ramme ne achu teihenuitew de lei.

²Penui ba ranchi gene, penui ran-gadibe kau ziemmena dagene, ’ndaikau kegiebe I ngauchi dui lau?

³Kegabe benai ’njei-kadesangbe gene changkube benai mâ de gabe kedei ze ka’ngngia lei;

⁴penui â mallow bang benai reheuneu tukrua lei. Zai penui pum tewlum gai ra hangge ’mpiak kateleube bang ma ramme tukteu de lei.

⁵Penui je â ziemmename ruagene kelitua ’ndi de lei; chime zene mâ-kahegame chaige gum ze penui chaige ka’nrung de lei.

⁶’Nggeuterak ramme gu teleu ramme ge, kedei benai tingchuki ramme ge penui â lung himchang gu lei.

⁷Reheupuîtum ramme ruage penui kuâ ka’nra de lei; ’mbubang ramme kangge penui ’nseuka’ndui de lei.

⁸Penui â mâ-ka’nningbe gabe kau, ’mpangpaibe kau chaname, heram gene tew’nggakam’ndime de lei.

⁹“Zai chunage I â penui gu karengetbe leu chang di, penui hangge teisarabe chang di de lei.

¹⁰Penui ne achu ngaugailak te lei, a dagene penui bamchâm di de lei; achu ngaube luage achu ’nchai’ntui gai ra penui â, ngauraube tew mak lei.

¹¹Hera ne achu heipat kai ze tewhelêugaibeibe ziegene, a masua sing gene penui gesut ta di de lei.

¹²A hezat’mbia kakebuakbe ziemmena baudi zuachu de lei, penui ne achu chuitua de lei, penui gu tewka’nsiabe tâ tewbe ramme penui ne a peireige tua gai de lei.

¹³Penui ne a ’mpuî tewnam lei, penui ne I lungkahereube daurabe hangge tew gai lei; mî de penui je tew’nsau gai mak lei.

¹⁴Tewput’ndigai’ndibe ga gene gum ze penui wang lei, tewpâng’ndibe ruage penui ’ngkuawang lei.

¹⁵A peireige mi kehingbe tei’nreiwang gai de lei; tingkaiguibe ne gum ze a ngeudibe je guaka’nsa de lei, zai kemâu gum ze I keheube ze â ga gai di de lei.

¹⁶“Zai chunage a lung ge a keringbe ze â ruîpat kai de lei; tewsabe naimikpui ramme ne achu naî ’ndi de lei.

¹⁷Tingmuî zene a ra ramme tew’nteu gai de lei, zai achu tewka’nteube ze sau meluisui lei.

¹⁸Tewkakeleube gene a puâ ze hâmmuî di de lei; chize ne a gu mechua gu a guangteu gum ze achu rat ’ndi de lei.

¹⁹Duirum ge Hera ne achu tuâ gai ’ndi de lei, zai I â kemût benai timbun gum chang gai di de lei.

²⁰I ningchu ku lei zai nang ne a kuâ kak mak lei; I sap da, zai nang ne achu mâ-hang du ’nning gai mak lei.

²¹A dage nang kesiabe tâ tew gai de lei; ning ba ranchi zene nang ne achu tewsâ de lei.

²²Tingkai peireige nang ne achu puachu gai lei, chipau peireige I chua ra nang ne tew gai bei de lei. Zai heratingkaichibe ’nrahimbe gene nang ne achu teikakenuk lei.

²³Eu lei, kechaibe ge, zai keringme leine hangge diepatkai’ndibeki ge nang ne achu teiwang gai gu lei be I chî lei.

²⁴“Acheusede mige kerachut zeu ge bambe kau ne pe ba getuapat, zai pa pe duânggabe gene ’ngngâ gai ra hangge kie mak mei?

²⁵Lungkahereube daube kau hang I hap kai mak mei? kelaksiame hang I a lung ge ngauka’nggiabe bam mak mei?

²⁶Kane keyibe I peube luage kesiabe wangchang de lei, zai kebabe I heguîkuabe luage kemuîbe wangchang de lei.

²⁷A lung â ’nchuanua tai lei, zai mâdau de bamsip kai ta de lei; achu hedau ra tewsabe naimikpui ramme wang de lei.

²⁸A ju hâmmuî ze I tatrua de lei, kane chize naichiê ne mak lei; wangka’nduibe ge I sapchu ze ’ngngâ gai ra kie lei.

²⁹I â munserung ramme sikina’mpeu, zai ostrikruî ramme kangpeu de lei.

³⁰A geî tik kai di ze a dagene ’nggâutat ti de lei, zai kelumbe ne a ra ramme teusie tai de lei.

³¹A gu ’nrabung â kadesuibe chang gai de lei, zai a gu metiam â kehapme kuâ hang chang gai de lei.