Read Zeme Naga JOB 31 Bible Online

JOB 31 - Zeme Naga bible

JOB 31

¹“A mik kena dage I samhatbe tew gai ’nde lei; chidaze ’ndaigum ze leusangka’nchipui je I piechi ra lau?

²’Ndaibe ze ’nrei ’mbe bambepeu Hera dagene a dam hang chang ra, zai Reziechibe Rapeu dagene a heurâ hang chang ra lau?

³Pelingtewmakme dage pausiabe, zai hemui-helut tewme peireige tewka’nsiabe wangchang mak semei?

⁴A ’mpuî ramme pa ne ngau, zai a pikiâm ramme du pa ne sei mak mei?

⁵“Karasa ’mpuî ge I tat, zai kechoa-keduaibe ’mpuî ge a pikiâm gai dizai â;

⁶(Hedu kapelingbe gene peize achu ’nchu gai le lau, zai a lung ka’ntipbe ze Hera ne peize chî le lau!)

⁷’mpuiki gene a pî kiammautat ti, zai a mik ngaube ge a lung pei gai ’ndi, zai a ba ne mâge â bekiê tewpatkai’ndibe bâm bam dizai â;

⁸chigum dizai â, I ne ling gai bei ze peize miramme ne teu le lau; zai a hangge puakpatbe ramme peize tuktuâ ne lau.

⁹“A lung ne ’mpuimi je ngau’ntetlak tizai â, zai a kining’mpeu ki ’ngkam hiage I ’mbaikua dizai â

¹⁰chigum dizai â, peize a nâu ne miramme hangge dekuî niak lau, zai miramme ne peize pe peirei keu lau.

¹¹Chize â sia-kadesangbe tâtewbe chang gu daseu; chize â, samramme ne tewsabe peirabe hemui-helut chang gu lei;

¹²chize â, Abaddon riâ chang ze rûka’nggabe hemi chang gu, zai chize ne a gu pung-ze-sabe ze bepîbang riâ chang ze rûmut ’ndu lei.

¹³“A peireige penui lungneube teiwangbe luage, a guâ ka’ngguapeu mei nu, a guâ ka’ngguapui mei je pedeu ka’nnangbe I ne ’ngking mak ze tuâpat ’ndizai â,

¹⁴Hera ne zuachu dezai I ’ndaikau tew ra lau? Pa ne pedeu ’mmêt dezai pechu I ’ndaitew lei ze kak ra lau?

¹⁵Nebâm lungge achu ka’ndampeu ne pechu ka’ndam mak mei? Ka’ndampeu kat ne anui je nebâm ge ’ndam gai mak mei?

¹⁶“Mâge â kelaksiabe kau luneibe ze I ne peimeu dizai â, makchai kemîpui mikran tew’ngga dizai â,

¹⁷makchai a runne mâ-teu di, kemî-’nggiâne chize teu ra ngau mak dizai â,

¹⁸(pe peu gum ze pa hena’ngka gene I ne pechu ’ngkutchu, zai pe pui ’nnampâm gene I ne pechu nguageteichu daseu);

¹⁹mige pe puâni kai ra gabe ziegene ga gai di mei, nune lungchulakbe kau pe puâ kai ra gabe I ngau dizai â;

²⁰pe lung leine ne achu suang gai makchai ai, zai a gu meli gêu ne pechu tewlum gai mak tizai â;

²¹keriekemui ge ka’ngngâbe bambe I ngaulube ziegene, ’nggiâne peireige a ba huachu gai ’ndizai â,

²²chigum dizai â, peize a keîtoa gene a ba’ngkuâkra ’ngngaîkeu de lau, zai ka’ntukbe gene peize a ba tap te lau.

²³Hera dagene tewsabe wangrabe deu ze I â hing daseu, zai pa pengêudibe je I â tingkangchi lak kû daseu.

²⁴“Gechâk ze I ’nnumtewbe hang tew gai mei, nune gechâk ka’nchibe je I ’nnumka’mmibe de lei, ze kacheu mei dizai â,

²⁵I heu-kadesangbe ziegene mei, nune a ba ne misongga gekualube ziegene mei ze I hegiê dizai â;

²⁶naimik pa’mbi sireba bambe luage mei, nune hekêu pengêudi-desang ze tatbe je I heguapie mei,

²⁷zai ’ngkim ne a lung ne ka’nchiebe bam di, a mui ne a ba keput tizai â;

²⁸aize du samramme ne tewsabe peirabe hemui-helut chang gu daseu, ’nrei ’mbe bambe Hera dage karasa I chang gai gu daseu.

²⁹“Achu ngaugailakpeu je tewkaube je I a suiyi mei, nune pe peireige kesiabe teiwang mei be je I a suiyi’nta dizai â,

³⁰(Desetkaibe ne pe gu keringbe tew’ngga ra kiebe gene a mui ne hemui ra I â pei gai mak lei);

³¹a gu hetiampaîki ge lungme ne, ‘Chige pe gu hemei ne kei’nggeugaimakbe kau châu la lau?’ ze acheu mak tizai â,

³²(puidi ge hesangme kâujei gai mak lei; tebeîtewme je a ki ’ngkam I lat kai lei);

³³a gu hemui-helut a lung ge I teikebai ze, I hingde ka’ngkabe ramme ziemmena dagene I ketip’ngga dizai â,

³⁴baudime je I hing-kadesangbe ziegene, zai kelak ramme ne ngau’nna ra hingbe ziegene, I a kuâneu mak, zai hela zuapat mak tizai â—

³⁵Hei, mige a kuâ ’ngkinggairabe kau bam bei nung laîzai! (A ji ka’nchetbe aige la lei! Peize Reziechibe Rapeu ne a kuâ kak kai lau!) Hei, a teureipeu ne chau’ngkuigaibe samrawlube a dage bam laîzai!

³⁶Chize a keîtoa gene I pua himchang gu lei; chize peichûp gum ze a peî ge I kak kai gu lei.

³⁷Pechu a tatew ramme leine I ralia gu lei; heguang gum ze pe masuage I zuawang gu lei.

³⁸“A gu heram ne achu chau’ngkui gai, zai hening ’nritkaibe kuiki ramme ne hap kam dizai â;

³⁹pemî pei mak ze chipau rachî ze I ne teu ’ndi, zai pa’mpaume je I ne tewchat ’ndizai â;

⁴⁰dekuîmeu kelei ge peize hetu ramme puakpat lau, zai barli kelei ge reheusiabe peize pat lau,” kacheu de lei. Jobbe sam ramme â sau de lei.