Read Zeme Naga JOB 32 Bible Online

JOB 32 - Zeme Naga bible

JOB 32

¹Pe runne mikngau ge pa â kapelingbe changbe ziegene aime bau hangchum Jobbe je sam kaksau di de lei.

²Chidadege Ram kiduî’mpeu, Buz’mpeu Barakelbe na Elihube pe lumpum di de lei. Hera je sua â pe runne pechu ka’nzeibe hangge chakkaibeibe ziegene Jobbe je pa pe lumpum de lei;

³Jobbe maube penui ne ranglia’nchi gai leusede penui kakchitadibe ziegene Jobbe kangme hangchum peireige du pa pe lumpum de lei.

⁴Chunage penui â pa sua â chîngbibe ziegene Elihube â sam sa ra penui ma piekua bam de lei.

⁵Zai aime hangchum mui ge kakrabe sam gadibe Elihube ngau lu dadege â pa pe lumpum di de lei.

⁶Zai Buz’mpeu Barakelbe na Elihube ne kak ze: “I â a tingkum hena rei, zai ningnui â chîng de lei; chipauziegene ningnui suage I ka’nningbe salia ra a ’nchangsia zai hing de lei.

⁷I â, ‘Peize tingnaimikpui ramme ne sa le lau, zai tingkum ramme misonggabe ne kaningchingbe geteilia be lau,’ kacheu de lei.

⁸Kane ziemmena lung ge ’nningchibe keringbe bambe reziechibe Rapeu chuilu ne, ziemmena dage mâ-gechîbe pei lei.

⁹Gechîngbe gene kaningchingme chang mak, ’ndaibe ze ka’nzeibe mei be gechibe ze du mi tingkum kiebe ne mak lei.

¹⁰Chidaze I ne sabe, ‘A kuâ ’ngking le lau; I ka’nningbe sa ra achu du pei lau,’ kacheu de lei.

¹¹“Pie le lau, ningnui sam ramme I heguîkua bam de lei, ’ndaikau sa ra mei be ningnui peube luage, ningnui gu kaningchingbe samsa seu ra I ’ngking ze bam de lei.

¹²Ningnui peireige I a lung pei gai de lei, zai, pie le lau, Jobbe je tew’ngkuigaibe kau mî de ga lei, nune ningnui ruage pe sam ramme kakkaibe kau mî de ga de lei.

¹³’Ntîng le lau, ‘Anui â kaningchingbe ngaulube kau de lei; ziemmena ne mak ze, Hera ne pechu tingkang gu lei,’ ze ningnui acheu mak ra hangge zeu.

¹⁴Achu katingkangbe hangge pa pe sam ramme sa gai mak lei, zai ningnui samsa ramme ne pechu I kak ra mak lei.

¹⁵“Penui â mâ-’nningchi ta di de lei, penui â kak ta di de lei; penui â samkie katte sa gai ra ga di de lei.

¹⁶Zai penui â sam sa mak, chige penui sapbam di, zai kaktadibe ziegene ’ndaikau je I kuâ bam ra lau?

¹⁷I du a samrabe kak kai gu de lei; I du I ka’nningbe salia gu de lei.

¹⁸I sarabe sam ramme puiting la de lei, a lung ge herui ne achu kagecheu daseu.

¹⁹Pie le lau, a lung â latpatkairabe bâm gabe wain gum lei; wain kaibe meigeibung karchibe gum, chize pângpat ra chang di de lei.

²⁰A lung tew’ncha gai le ra I sam sa himchang gu lei; a mui ’ngkakpat ze I kak himchang gu lei.

²¹I â mige je du kehung-ka’nrie bam ra mak, zai hangkat je du toamelua gai ra mak lei.

²²Satoarabe tak I â chî mak daseu, chi acheu dizai â, achu Ka’ndampeu ne tew’nsau gai ’ndu de lei.