Read Zeme Naga JOB 33 Bible Online

JOB 33 - Zeme Naga bible

JOB 33

¹“Kane chunage a kuâ seu le lau, Hei Jobbe gau, zai a sam ramme leine ’ngking le lau.

²Pie le lau, I a mui latpat mui de lei; a mui ge a leiria ne samsa lei.

³A lung ka’nzeibe ze a sam ramme ne ralia lei, a mui gene gechîbe ze peling gene sa lei.

⁴Hera gu herui ne achu ’ndam gai lei, zai reziechibe Rapeu chuilu ne keringbe achu pei lei.

⁵Nang ne kak dui zai â a kuâ kak kai lau; a suage ning sam ramme sa’ntiaria gai lau; ning sam zeu hang peu le lau.

⁶Pie le lau, nang gum ze I du Hera mikngau ge ’nzuâ kam lei; depungkâng gene achu du ’ndam gai lei.

⁷Pie le lau, a hang kehingbe gene ningchu tewhingrimrabe ga lei; a chuichi ne ningchu naîchim gai ra mak lei.

⁸“Pelingsing ze I geseube gene nang sam sa gai de lei, zai ning sam ramme kuâ I seu lu de lei.

⁹Nang ne sa ze, ‘I â ’nchi lei, hede’ngka gai me lei; I â ’nchichiak lei, zai a dage hemui-helut ga lei.

¹⁰Pie le lau, achu ’nggi ra hang pa’nzei hang pa peu de lei, pe teureipeu gum ze achu pa riam gai de lei;

¹¹a pî ramme pa ne hekai-kai de lei, zai a ’mpuî ramme leine pa ne pie bam lei,’ kacheu de lei.

¹²“Pie le lau, aipau ’nchui ge nang tâu mak lei. I ne ningchu kak ku lei. Ziemmena sua â Hera â di lei.

¹³‘A sam ramme katte pa kak ra mak lei,’ acheu sa ze ’Ndaitew ze pechu nang katingkang lau?

¹⁴Ziemmena ne ningching mak leusede, ’mpuî kat gene zai kena gene Hera â ka’mpau daseu.

¹⁵Hemang ka’mmibe gene, tingmuîzeu gu keliâbe gene, ziemmename jei tattibe luage, penui jeî ge penui jeikeu di ze bambe luage,

¹⁶chigumbe luage pa ne ziemmena kun ramme lat kai ze, mâ-wangchang ra rang’ntuagaibe ramme ne penui hing ra tew gai lei,

¹⁷chidezai ziemmena je pe tatew gene pa ne tei’mbia le ra; zai gechîrettewbe ze ziemmena dagene lutua ’nde ra hangge zeu;

¹⁸pa ne ziemmena keringbe ze hûmkuiki gene tei’nreiwang gai lei, pe gu keringbe ze hiazutkie gene gagaiderabe ze pa ne tei’nggim bei lei.

¹⁹“Ziemmena je â ’nrâteuneube jeî gene, zai pe pum ge kahereube gene sâ ze laddei gai lei;

²⁰chidadege pe dage mâ-teuneibe lung pat ta di, zai teuyibe hetak du pa â ’nchâ mak lei.

²¹Pe pum huiritkaidibe ziegene pe chie ngaupat ta di de lei, zai pe ra ramme ngau mak bambe ramme rungheu bam lei.

²²Pe gu keringbe ze hûmkuiki hia wangka’nchut te lei, zai kechaibe teiwangme tailam pa keringbe zuamie de lei.

²³Pe hang angel’mpeu, sagupeu, changme ruage hangkat, ’ndaibe ze ka’nzeibe mei be ziemmena je rangliarabe kau bam bei ze;

²⁴zai pa ne pechu ngau’nggia ze, zai acheu sa ze, ‘Hûmkuiki ’mbe wangkeuderabe gene pechu ripat kai be lau, pumlei peipatrabe hang I peu lu de lei;

²⁵peize pe chie ze henapoî ze rechida de zu lau; peize pa pe rîting pe ranchibe lam’mbia helatwang dai de zu lau,’ acheu bei lêuzai ai;

²⁶ziemmena ne Hera je kakellum lei, zai pa ne pechu lun lei, Hera masuage hesuiyibe ne pa zuagut lei. Ziemmename dage pe gu tewka’nringbe pa salia kadai lei,

²⁷zai ziemmena suage pa heleutew ze, zai acheu sa ze, ‘I hemui di da zai ka’nzeibe ze I ne tewkedat ’ndi de lei, zai a peireige chize peiruî gai dai mak te lei.

²⁸Hûmkuiki ’mbe a keringbe wangkeugaiderabe gene pa ne meupat kai bei lei, zai a keringbe ne kebabe ngau gu de lei,’ kacheu de lei.

²⁹“Pie le lau, lua na, luachum, ziemmena dage Hera ne airamme tew gai lei,

³⁰hûmkuiki gene pa keringbe tei’nreiwang gai dai ra, chidezai keringbe gu kebabe pa ngau le ra hangge zeu.

³¹’Ngking’mmi le lau, Hei, Jobbe gau, a kuâ ’ngking le lau; ning kuâneu se lau, dezai I sam salia gu lei.

³²Nang ne mâge sarabe bam zai â, a kuâ kak kai lau; sam sa lau, ningchu I râm’nzei gai nei daseu.

³³Chi acheu makchai â, a kuâ ’ngking le lau; ning kuâneu se lau, dezai I ne ningchu kaningchingbe geteilia gu lei,” kacheu de lei.