Read Zeme Naga JOB 34 Bible Online

JOB 34 - Zeme Naga bible

JOB 34

¹Chidadege â Elihube ne rang ze:

²“A kuâ seu le lau, ningnui ziemmena kaningchingme gau, zai a kuâ ’ngking gai lau, ningnui mâ-gechîme gau;

³mi hak ne hetak ka’ndâu gum ze, mi kun ne sam ramme ka’ngking daseu.

⁴’Ndaibe ze ka’nzei mei be kelâng kei lei; ’ndaibe ze yi mei be anui karai gene râmkeu gai kei lei.

⁵Jobbe ne rang ze, ‘I â a mâu ga lei, zai Hera ne a ’nzei ze lutat ti de lei;

⁶I ka’nzeibe chang bam sede karasa sabe hangge achu â riam gai lei; I hingdeka’ngkabe ga sede, a jâm â tew’mmi lak te lei,’ kacheu daseu.

⁷Hedui sak gum ze ka’nrube ramme sak kamlube kau,

⁸tâ-kesiabe tewme je ngua’nzang ze, zai ziemmena kesiame je nguaruabe kau Jobbe gum châu la lau?

⁹Pa ne rang gai ze, ‘Hera je neirabe hangge, ziemmena hangge mâ de kegiebe ga lei,’ kacheu daseu.

¹⁰“Chipauziegene a kuâ seu le lau, ningnui mâ-gechîme gau, tâ-kesiabe pa tewrabe hangge Hera ne lunsiak tu mak lei, zai kemakbe tâ pa tewrabe hangge reziechibe Rapeu ne lun-siak tu mak lei.

¹¹Ziemmena tatew luigum ze pa ne pechu peiruî gu, zai pa kebambe tak luigum ze pe peireige wangchang ra pa ne tew gai gu lei.

¹²Pelingtewbe deu ge Hera ne kesiabe tâ tew ra mak lei, zai reziechibe Rapeu ne ka’nzeibe ze tewkedat ra mak lei.

¹³Kedeirei ge rezietei ra châu ne pechu pei bei, zai châu ne kedeirei pelane pe ba ge bala gai bei lau?

¹⁴Pa ne pe gu herui ze pe tailam teitat dai de ra zai â, zai pe chuilu ze pe dage teiwang gai dai ’ndizai â,

¹⁵hemeipum leine ga gai kam du, zai ziemmena â kedeinia chang gai du lei.

¹⁶“Ningnui dage mâ-gechîbe bam zai â aize seu le lau; ’ndaikau I sa mei be ’ngking le lau.

¹⁷Ka’nzeibe je ngaugailakbe kau ne samram gu mei? kapelingbe kau benai ka’nzeibe kau,

¹⁸heguang je, ‘’Ntakû kau,’ acheu, zai saibe ramme je, ‘Ziemmena kesiabe kau,’ kacheupeu zeu;

¹⁹Heguangsinme je kehung-ka’nrie tewmakpeu, zai penui ’nteumena pe ba ne ’ndamgaibe changbe ziegene, kelaksiabe kau je sua â lungyibe kau je ’nning’ndimakpeu je ningnui ne chau’ngkui gai ra mei?

²⁰Penui â luakat gene chai ka’nnua lei; muisum ge ziemmename â gechuî’ngngai gai bei ze chai di tai lei, zai ziemmena ba makbe ne pe ranchime je teitat ti tai lei.

²¹“Pe mik â ziemmena ’mpuî ge pie bam lei, zai pe pikiâm ramme leine ze ka’nchet lei.

²²Tâ-kesiabe tewme ’mbailerabe bâm kemuîbe benai muiterîngbe bâm mâ de ga lei.

²³Samrambe ge Hera masuage tat ra ziemmena mi-mige hangge du pa ne pehî die gai mak daseu.

²⁴Pedeu ka’mmêtbe ga ze reziechibe kau je pa ne tewpâng, zai penui bâm ge kêdame je sum gai lei.

²⁵Aigum ze penui tatew ze chî lu ze, tingmuî gene pa ne penui je tewkau gai, zai penui je tew’nsia gai lei.

²⁶Penui kesiabe ziegene ziemmena mikngau gene pa ne penui je tewhereu gai lei,

²⁷pe chai suibe gene penui â lietat ti, zai pe gu ’mpuî ramme je mâ-hangge du penui ’nninggaimakbe ziegeneu;

²⁸kelaksiame ka’nrungbe pe dage wangchang ra penui ne tew gai bei lei, zai tewsabe lieme kuâ pa ne ’ngking bei de lei—

²⁹Pa pe kuâneu mak bambe lua, châu ne pechu chau’ngkui gai dui lau? pa pe ju teika’mbaibe luage, heramzat mei nune ziemmena ne mei ze châu ne pechu ngauchi dui lau?—

³⁰Hera je chimakbe kau â, samram mak ra lei, chidezai ziemmename je ’mpia ne pa rap mak ra hangge zeu.

³¹“Hera je mige, ‘I â kedeibe lie lu de lei; I â kemakbe tâ tew dai ra mak lei;

³²I ngaumakbe achu geteilia lau; hemui-helut I tew gai ’ndizai â, chize I tew dai ra mak lei,’ acheu salube kau la mei?

³³Chidezai nang ne chize lumakbe ziegene, nang neibe luî gene pa ne peiruî gai gu semei? I ne mak ze nang ne kelâng himchang ra lei; chidaze nang ’ndaikau chî mei be ranglia gai zu lau.

³⁴Mâ-gechîme ne achu salia gai gu lei, zai kaningchingbe kau a kuâ seulube kau ne achu salia ze:

³⁵‘Jobbe â mâ-gechîbe ga ze samsa lei, pe sam ramme â ’nning’nchukdukkaibe ga lei,’ acheu gu lei.

³⁶Jobbe je â betun-gaibe riâ chang ze kedak kai bei nung laîzai yi ra de lei, ziemmena kesiame gum ze pa â samkakbe ziegeneu.

³⁷Pe gu hemui ge pa â katingkangbe kaisî gai de lei; anui ruage pa â pe ba kagekeu lei, zai Hera je pa katingkangbe sam ramme tewpung gai lei,” kacheu de lei.