Read Zeme Naga JOB 35 Bible Online

JOB 35 - Zeme Naga bible

JOB 35

¹Elihube ne sa ze:

²“Aize ka’nzeibe hang nang ’nning gai mei? ‘Aize Hera masuage I ka’nzeibe de lei,’ ze nang kacheu mei,

³chipauziegene, ‘’Ndaikau a hangge kegiebe la lau? Hemuigaimakbe gene a hang ’ndaikau kegiebe la lau?’ ze nang kacheube zeu.

⁴I ne nang benai ning dage ning kangme bamme kuâ kak kû lei.

⁵Tinggîm ramme ’ngngangchupie gai ni lau; zai ning sua kehube kemâu ramme je pie gai ni lau.

⁶Nang ne hemui gai ’ndizai â; pe peireige nang ’ndaikau kengambe la lau? zai ning gu hingdeka’ngkabe tewpung gai lêuzai, pechu nang ne ’ndaikau tewgaibe la lau?

⁷Nang kapelingbe tewbe gene, pechu ’ndaikau nang pei lau; nune ning ba gene ’ndaikau pa ngau lau?

⁸Nang kesiabe â, nang gumbe kau ziemmena hang runne ’nningkahereube chang lei, zai nang ka’nzeibe ze ziemmena na hangge chang lei.

⁹“Misongga tewsabe liebe ziegene ziemmename ka’nrung lei. Peranchibe kau ba ranchi ziegene ’ngngâ gai ra penui kû lei.

¹⁰Kane mî de, ‘Hera achu Ka’ndampeu, tingmuî ge hesuiyibe leuzie ra peipeu,

¹¹kedeirei gu hekaune ramme je sua â anui je geteilia’ngkeukiagaipeu, zai liamruabe ’nruine ramme sua â, anui ’nching’ngkeu ra tewgaipeu ’ndaige la lau?’ acheu mak lei.

¹²Chige penui ka’nrung de lei, kane pa ne kak mak lei, ziemmena kesiame gechîrettewbe ziegeneu.

¹³Pelingsing ze Hera â perua ne ka’nrungbe kuâ â seu mak lei, zai Reziechibe Rapeu ne mâ-hang du riam gai mak lei.

¹⁴Pechu nang â ngau mak lei, ning tedeu ze pe masuage la, zai pechu nang kuâ bam lei, kacheube luage ’ndaizeuge nang chei ra lau?

¹⁵Zai chunage pa pe lumpumbe ne tewsâmakbe ziegene, zai hingdeka’ngkabe ze mâ-hangge du pa ’nninggaimakbe ziegene,

¹⁶peruânggabe samsa gene Jobbe samsa lei, mâ-gechîbe ga ze sam ramme pa ne tewpung de lei,” ze kacheu de lei.