Read Zeme Naga JOB 36 Bible Online

JOB 36 - Zeme Naga bible

JOB 36

¹Zai Elihube ne samsa’ndua ze acheu sa ze:

²“Kecheîne a kuâ ’ngking gai rî lau, dezai I ne ningchu teilia gu lei, Hera kelei ge I ne mâ-salia ra larei daseu.

³Kedeu ’mbene a gu kaningchingbe I lu gu lei, zai achu Ka’ndampeu â kapelingbe kau lei be ranglia gu lei.

⁴Pelingsing ze a sam ramme â karasa mak daseu; mâ-chikapelingbe kau ning dage la lei.

⁵“Pie le lau, Hera â reziechibe kau lei, zai mî je du ngau’nna mak lei; pa â mâ-gechîbe ranchi ge reziechibe kau lei.

⁶Pa â ziemmena kesiabe kau je ring ze bam ra pei mak lei, kane tewkahereube liebe kau je â samram’nzei gai bei de lei.

⁷Pelingtewbe kau dagene pa â pe mikpie tei’mbia mak lei, kane heguang-bamrâ ge ka’ntaume heguangme dage betingbeta hang penui je pa ne kai lei, zai penui je suang gai bei de lei.

⁸Zai penui je hegeîria ne pi ’ndi, zai tewsâbe ria ramme ne rat ’ndi lêuzai,

⁹chigumbe luage pa ne penui suage penui â, hekuâpheumakbe luilung ge bam lei be, penui tatew benai penui hingdeka’ngkabe ramme ranglia lei.

¹⁰Geteiliabe ’ngking ra pa ne penui kun ramme lat kai lei, zai hemui-helut gene penui heliwang dai ra ranglia lei.

¹¹Penui ne hekuâ pheu ze pe guâ ’nggua zai â, keheube gene penui gu tingnaimikpui ramme benai hesuiyibe gene penui gu tingkum ramme penui tew’nsang gai gu lei.

¹²Kane penui ne hekuâ pheu makchai â, hiazutkie gene penui ga gai, zai mâ-gechîbe ga ze chai lei.

¹³“Pe lung ge Hera je chimakbe kau â, helumpumbe je ka’nchâ lei; pa ne penui je pibeibe luage ’ngngâ gai ra penui â ’nrung mak lei.

¹⁴Heluîhebuâne luage penui â chai lei, ka’ngngambe gene penui keringbe tud kai lei.

¹⁵Pa ne tewsabe lieme je penui je tewsabe zene ’nripat kai lei, zai ka’nggibe zene penui kun latpat kai lei.

¹⁶Pa ne ningchu lungkahereube gene heketrat-makbe pebâm dibe ge du ’ngngaipat kai bei de lei, zai ning gu mâ-teube-kaira ge kaipatkaibe â teuyibe hetak ne pui lei.

¹⁷“Kane nang â ziemmena kesiame peireige samrambe ne pui lei; samrambe benai ram’nzeigaibe ne ning dage puigit ze bam de lei.

¹⁸Helumpumbe zene teihenuitewbe ge ningchu ngua gai mak ra ’ntîng le lau; zai henimluteube kedibe zene ningchu peize ngualietat se lau.

¹⁹Lungkahereube gene tei’mbia gai ra nang ka’nrungbe mei, nune ning ranchibe leine ne mei ze ka’ngngâbe ningchu pei dui mei?

²⁰Heramzatme je penui bambe bâm gene tew’nggagaibe, kemuîbe hî wangchangrabe lua hangge heguî se lau.

²¹’Ntîng le lau, hemui-helut ge tat kai se lau, tewsabe liebe sua â aipau je nang kelâng lu daseu.

²²Pie le lau, Hera â pe gu reziechibe gene pechu teichu’ngngu gai bei de lei; pa gumbe kau geteiliapeu châu la lau?

²³Châuge ne pe hangge pe gu ’mpuî ranglia bei, nune chauge ne, ‘Nang tewmau ’nde lei,’ acheu saduibe kau la lau?

²⁴“Ziemmename ne toabe leutew gai ze bambe pe tatew je toa ra chibam lau.

²⁵Ziemmena leine ne chize ngau lu de lei; ziemmena â kedeu ’mbene chize pie lei.

²⁶Pie le lau, Hera â di-desang lei, zai anui â pechu chî mak lei; pe gu tingkum ramme riak â peupatchi lak lei.

²⁷Heduichîpum ramme pa ne tuakchu lei, pe gu kemuajûng ze tingruibe gene pa ne tewka’nchi lei,

²⁸tingkehu gene ruîkeube, zai misongga ze ziemmena peireige keugaibe zeu.

²⁹Mige â kemâu ramme rapatbe, pa bambeki gu tingcheibe ramme ’nningchiduibe kau la mei?

³⁰Pie le lau, pa ne pe gu tingkakepitbe pehiage ’mpatpat kai, zai sungkling sîng gumchim gai lei.

³¹Airamme gene ziemmena je pa samram daseu; hetak teu ra misongga ze pa ne pei lei.

³²Tingkakepitbe pe ba ge pa teipuigit lu, zai ’nchetkaibe gitâu ra pa ne die gai lei.

³³Chipau hegikeube zene pa chaugumbe kau mei be ranglia lei, pa â hemui-helut peireige â, pe lumpumbe ne pe laîpatbe kau lei.