Read Zeme Naga JOB 37 Bible Online

JOB 37 - Zeme Naga bible

JOB 37

¹“Aige zene du a lung kedun ze ’nsauheu bam lei.

²Pe kuâ tingcheikelungbe zai pe mui gene kengimchunbe kuâ patbe ’ngking le lau.

³Tinggîm dit luî ge pa ne chize ’mpat kai lei, zai kedei mik ramme ge pe gu tingkakepitbe langpat kai lei.

⁴Chipau chângge pe kuâ ’nrahim gai lei; pa pengêudibe kuâ ne ’nrahim gai, zai pe kuâ seube luage tingcheibe ze pa tew’nsau mak lei.

⁵’Nningdaulakluisui ze Hera ne pe kuâ ’nrahim gai lei; anui ’nningchilakbe tâ-kedibe ramme pa ne tew lei.

⁶Kebun je pa ne, ‘Kedeirei ge keu gai lau,’ acheu; zai tingchîpum benai tingruibe je, ‘Rui’nchi lau,’ kacheu daseu.

⁷Ziemmena leine ba pa ne tew’nsau gai lei, ziemmena leine pe tatew ze chî le ra hangge zeu.

⁸Dadege hekaune ramme penui kilûng ramme ge gut ze, penui ki ramme lungge bam bam lei.

⁹Tingpî ’mbia gene natri wang lei, zai tingkai guiraripkaibe gene kahegeibe wang lei.

¹⁰Hera chuilu gene kebun â peipat lei, zai hedui kedibe ramme tew’ngkang-keluarâp kai lei.

¹¹Kemâukang kedibe ge pa ne ka’nnimbe kai lei; kemâu ramme ne pe gu tingkakepitbe ’nrukpat lei.

¹²Lungduibe kedeirei ge pa ne diegaibe leine tewpui gai ra hang, pa ne nguagaibe gene penui tatguâwang dai ’nsui ze bam lei.

¹³Kedeibe hanggene mei, nune pe gu kedei hanggene mei, nune kehungbe hanggene mei lêuzaidu, chize wangchang ra pa ne tew gai lei.

¹⁴“Aize seu le lau, Hei Jobbe gau; saumang gai ze Hera gu ningdaulakbe tatew ramme ’nning gai ni lau.

¹⁵’Ndaigum ze penui peireige Hera ne pe gu samde ramme kai mei, zai pe gu kemâu gu tingkakepitbe pa ’mbi pat ra tew gai mei be nang chî mei?

¹⁶Kemâu ramme kinbe tak ramme, mâ-gechîbe ’nsangsiakpeu gu ningdaulakbe tatew ramme,

¹⁷tingpî ’mbia gu tingkai ziegene kedeirei gîngmanggaibe lua, nang ning paîni lumbup bambepeu chî mei?

¹⁸Pa gum ze nang tinggîm liâmpat ze, judageî langlualube gum ze ’ngkuchi ze tew gai dui mei?

¹⁹Pechu anui ’ndaikau salia ra mei be anui je geteilia lau; kemuîbe ziegene anui tûdeu ze teiwangchi ta de lei.

²⁰I mâ sagaineibe pechu salia gai be ra de mei? Pechu tew’ngga gai be ra hangge mâdauge ziemmena mige kaheguî mei?

²¹“Zai chunage tinggîm ge kebabe ’mbi sirebabambe luage, tingkai ne gui’nchichiakkaibeibe luage â, ziemmena â kebabe ’mbi piedau lak lei.

²²Tingpeî ’mbia gene gechâk ’mbi gum pengêudibe pat lei; Hera â mi ngauhingkube pengêudibe puâ ne kai lei.

²³Chi reziechibe Rapeu je pechu â anui peupatchi lak lei; pa â reziechibe benai ka’nzeibe ge pengêudi-kadesang lei, zai misongga ze pelingtewbe ze pa â tew’ngkui ra mak lei.

²⁴Chipauziegene pechu ziemmena hing lei; penui runne penui je kaningchingbe hangge riamgaibe kau je â, mi hang kat je du pa â mâ-hang du riam gai mak lei,” ze kacheu de lei.