Read Zeme Naga JOB 38 Bible Online

JOB 38 - Zeme Naga bible

JOB 38

¹Dadege natrichibe gene Tingwang ne Jobbe je kak te lei:

²“Mâ-gechîbe gabe sam ramme gene geteiliaka’mmibe tewmuibe kau aipaupeu ze châu lau?

³’Mpeumi gesangzie ze ning kia kak kai le lau, I ne ningchu sam ’mmêt ku lei, zai nang ne achu ranglia ra de lei.

⁴“Kedeipung ’ndamchugaibe luage nang ’ndaige bam lau? Nang mâ-gechîbe bam zai â achu ranglia lau.

⁵Pedit-petâ bamrabe tak châu ne timchak kai lau— nang chî sing gu zeî lau! Nune chipau peireige ka’ndeube ria châu ne chakgîng gai lau?

⁶’Ndaikau ramme peireige besing ramme dung gai lau? Nune châu ne pemik chukâng ramme sum gai lau?

⁷Hekuagi ramme heleutewkaheruabe lua, zai Hera name leine hesuiyibe gene ka’nrungbe luage zeu?

⁸“Nune nebâm gene sungkling je pa pângpatbe lua châu ne ’ngkam ramme kainam lau;

⁹pe paî hangge I ne kemâu ne tew gai, zai muiterîngbe ne pa’nnumpaî hang tew gai,

¹⁰zai pa’nrai hangge rang gai, zai bechâp ramme benai pa’ngkam ramme hangge tew gai,

¹¹zai acheu rang gai ze, ‘Aipau riâ nang patchang ra, zai ’nzûpat dai mak ra lei, zai aipau riâ gene ning gu heduiteleu peranchibe sau gai ra de lei,’ ze kacheu mei?

¹²“Ning gu naimikpui putchube gene seu ze, hechua bapat ra nang ne samdie gai bei, zai hechua je pa pebâm chî ra nang ne tew gai bei,

¹³chidezai pa ne kedei gu pe paîni heraktei le ra, zai chize ne ziemmena kesiame je kechuîtua ’nde ra nang samdie gai lu de mei?

¹⁴Kainambe kangge bambe hegam je gum ze pechu â tewkeli gai bei, zai paîni je gum ze peheu rîm gai bei de lei.

¹⁵Ziemmena kesiabe kau dagene penui kebabe tew’nsau gai bei, zai penui ba getuachube tewbat kai bei lei.

¹⁶“Sungkling gu depin ramme lungge nang gut kai de mei, nune sungkling sîng ge tatrua gai lu de mei?

¹⁷Kechaiberam gu kemuiki ramme ningchu teilia gai bei de mei, nune muiterîngbe bâm gu kemuiki ramme nang ngau gai de mei?

¹⁸Kedeirei dit nang chî lu de mei? Airamme leine nang chî zai â rang gai zu lau.

¹⁹“Kebabe bambe bâm ’mbe tatbe ’mpuî ’ndaige bam, zai kemuîbe bâm ’ndaige bam lau,

²⁰dezai chipau heramrai ’mbe nang ne pechu teitatkaichi le ra, zai pe ki ’mpuî ze nang chî le ra hangge zeu?

²¹Nang chî lei, chipau ting ge ningchu lung daseu, zai nang â chîng-kezuzie di daseu!

²²“Kebun reî’nduigaibeki ramme ge nang gut kai lu de mei, nune desak reî’nduigaibeki ramme nang ngau lu de mei,

²³tewkahereube ting, zai ka’nggibe benai kahereibe mai hangge I kaikuabe zeu.

²⁴Kebabe ’nzipatbe bâm ’mbe tatbe ’mpuî ’ndaikau lau, nune kedeirei ge tingbia gu tingkai ’nzirarippatbe bâm ’ndaibe ze lau?

²⁵“Châu ne tingsim ruikeube-ga ramme supat kai lu, zai hegikeube ’mpuî hang tew gai lu,

²⁶ziemmena gabe heram ge, ziemmena gabe tingkangram ge tingrui ra;

²⁷zai perua bambe benai put-hâmmuîgaibe heram lungwângchang ra, zai kedei gene reheubuâ puakpat ra tew gai bei lau?

²⁸“Tingruibe pe peu la mei, nune kezikchipum ramme châu ne lungkeu gai bei lau?

²⁹Châu gu nebâm gene kebun zuapat, zai châu ne tinggîm gu kebunmoine ze lungkeu gai bei lau?

³⁰Tingchu gum ze hedui ’ngkang gai di, zai sungkling peirei ze ’ngkang gai di de lei.

³¹“Tingchachikeleu-ria ze nang pi dui mei, nune Orion pibe-ria nang heipat dui mei?

³²Penui gu nehî ge Mazzaroth je nang nguapatkaichi duî mei, nune Kebakrak benai pe name je nang penui ’mpuî rangliachi duî mei?

³³Tinggîm gu besie hingde ramme ze nang chî mei? Kedeirei ge penui gu hingde nang teichugaichi duî mei?

³⁴“Heduinaibe ne ningchu chûm le ra, kemâu ramme dage nang kelaugaichi duî mei?

³⁵Penui tatchi le ra tingkakepitbe nang langpat kai ze, zai penui ne ningchu, ‘Aige anui la lei,’ acheuchi duî mei?

³⁶Châu ne kemâu ge kaningchingbe kai bei lau, nune muangziu je mâ-gechîbe pei gai bei lau?

³⁷Châu ne kaningchingbe gene kemâu ramme riamchi dui lau, nune châu ne tingkehube gu heduibung ramme kelat’ngkumgaichi dui lau,

³⁸kemût ramme bekângpriu pat kai, zai timdeu kuptittibe lua zeu?

³⁹“Duilui hangge nang heteu peu dui mei, nune duiluipoine ramme je nang guî’nggeu dui mei,

⁴⁰penui ki ramme ge penui ’ngkumbambe lua mei, nune penui ki-kegup lungge lîmkuabambe luage mei zeu?

⁴¹’Nggek je châu ne pe gu hetak hang pei lau, bepoine ramme Hera je kû ze, zai teu ra gabe ziegene kezitrua bambe luage zeu?