Read Zeme Naga JOB 4 Bible Online

JOB 4 - Zeme Naga bible

JOB 4

¹Chidadege Teman’mpeu Eliphazbe ne kak ze:

²“Mige ne ningchu sam’mpauchu gai lêuzai nang seusia gu mei? Acheuleusede châu ne sam sa mak ze bamchi ra lau?

³Pie le lau, misonggame je nang ne geteilia de lei, zai nang ne pe ba ran-game ran tew’nchi gai bei de lei.

⁴Kâudipeu je ning sam ramme ne pechu teichu gai bei de lei, zai nang ne pe kuk ran-game ran tewperanchi gai bei de lei.

⁵Kane chize ning dage wangchang de lei, zai nang â liechi lak ze la de lei. Chize ningchu deîtau de lei, zai nang â ning duângga di de lei.

⁶Nang Hera je hingchibe zene nang ’nnumtewbe chang, zai nang tatbe ’mpuî ge nang lungsangtewbe zene nang kaheguîbe chang mak mei?

⁷“Chunage ’nning’mmi gai ni lau, mige pemâugabe kau mâdauge ga gai di semei? Makchai pelingtewbe kau je mâdauge tew’ngga ’ndi semei?

⁸I ne ngaulube luigum ze hemui-helut pu gai ze tâ-kesiabe linggaibe kau â chipau luigum ze gat kadai lei.

⁹Hera chuilu ’mmutkaibe gene penui ga gai, zai pe lumpumbe ’mmutkaibe gene penui je tew’nsia gai lei.

¹⁰Duilui ka’nrabe, duilui katingrakbe kuâ, duilui poine gim ramme tewbet ’ndi lei.

¹¹Heteugabe ziegene duilui peranchibe chai lei, zai duiluipui gu pe poine ramme kezitrarip bam lei.

¹²“Chuna a dage reine ze sam teiwangchang de lei, chipau sam ka’nsiambe a kun ne seu de lei.

¹³Ziemmena jeitat ti bambe luage, tingmuî ge mâ-’ndûliabe ramme ’nningbambe gene,

¹⁴a dage kahingrimbe wangchang di, zai kedun di de lei, chize ne a ra ramme gechuî ra tew gai bei de lei.

¹⁵A ju hia gene herui gizuaipat ti de lei; a gêu churen bam di de lei.

¹⁶Chize sapbam de lei, kane chize ’ndaikau luî mei be I â ngaupatchi lak ti de lei. A mikngau ge mâ-luî bam de lei; chige zîng ze bam de lei, dadege I hekuâ seu de lei.

¹⁷‘Ziemmena mige Hera masuage ka’nzeibe kau chang dui mei? Ziemmena mige pechu ka’ndampeu masuage ka’nchibe chang dui mei?

¹⁸Pe guâ ka’ngguame peireige du pa â ’nnumtew mak lei, zai pe gu tinggîm angelme peireige penui mâu kipat kai de lei;

¹⁹kedei ge pe kipung bamme, telapbe suagene chaîkeniak kai’ndime, kedei ne tewbeki ramme ge lungme peireige ’ndaizeuge tew gai be ra lau?

²⁰Hechua benai hegî kak gene penui je â tew’ngga gai ze bam lei; mâ-hangge du ’nning gai mak ze betingbeta hangge penui ga gai gai lei.

²¹Penui zui ruagene paîki gîngbe ria ze tukpat ’ndizai â, kaningchingbe ga ze penui chai mak semei?’ acheu zeu.