Read Zeme Naga JOB 40 Bible Online

JOB 40 - Zeme Naga bible

JOB 40

¹Zai Tingwang ne Jobbe je rang gai ze:

²“Kemaube peupatpeu ne Reziechibe Rapeu je tingkang ra mei? Hera je geikangpeu zene chize pa ne peize kak le lau,” kacheu de lei.

³Chidadege Jobbe ne Tingwang je kak ze:

⁴“Pie le lau, I â ’mpangpaibe kau lei; ningchu ’ndaikau I kak ra lau? I â sam sa ta du de lei.

⁵Lua kat I sa gai lu de lei, zai I â kak ra mak lei; lua na sa gai da, kane I â sa’nduâ ta du de lei,” kacheu de lei.

⁶Chidadege natri gene Tingwang ne Jobbe je kak te lei:

⁷“’Mpeumi kezeitei ze ning kia ’ngkang gai le zu lau; I ne ningchu samneu gu, zai nang ne achu ranglia lau.

⁸Kemaube hangge ’nsangdu nang ne achu kai ra de mei? Ningchu samram’nzeigairabe hanggene achu nang chau’ngkui gai ra mei?

⁹Hera ba gumbe ning ba la mei, zai pe kuâ gum ze nang ning kuâ kengimchun-gaichi duî mei?

¹⁰“Pengeudibe benai heratsatbe ne ning puâ kai le lau, pengêudibe benai ngauyibe ne ningchu bâ gai le lau.

¹¹Ning lumpumbe ’nniâmbabe ruîpat kai zu lau, zai gechîrettewbe kau leine je pie gai lu pechu teilia be lau.

¹²Gechîrettewbe kau leine je pie gai lu, pechu tewhelêu gai be lau; zai ziemmena kesiabe kau je penui sapbe bâm ge chaîkeniak kai be lau.

¹³Penui haimena je kedei lungge baiherua gai be lau; ’ngkangberam kedei ge penui ju ramme pi gai be lau.

¹⁴Chidezai ning ba hezat’mbia ba sing ne ningchu kengambe peichi duî lei be I ne du ningchu chigaihâ gu lei.

¹⁵“I ne ningchu ’ndamgaibe gum ze I ne ’ndamgaibe, heduipua je pie gai ni lau; pa â getumsei gum ze reheuneu teu lei.

¹⁶Pie le lau, pe kia ge pe ranchibe, zai pe bungpui gu pechiepêu ramme ge reziechibe zeu.

¹⁷Kedar ching gum ze pe mi ’ngkuchi bam ra pa ne tew gai lei; pe nie gu pa’nnaria ramme â hiheluagit bam lei.

¹⁸Pe ra ramme â kangngâgeî-ping ramme gum, pe pî pe ba ramme â hegeîdâng ramme gum lei.

¹⁹“Pa â Hera tatew ramme ruage pe ranchi langbe kau lei; pechu ka’ndampeu ne peize pe gu hiazutkie teiwang’nna gai be lau!

²⁰Hênamkang gu hekaune ramme ka’ntabe bâm, peloa hube gene pe gu hetak hang pat bei daseu.

²¹Heduikualetpâ bang ramme kangge, hekubang ramme zeu ge ’nseu ze dechup ge pa â bam lei.

²²Pe gu kezui hangge heduikualetpâ bang ramme ne sungnam bei lei; ’nggeuki gu duihingrangbang ramme ne pechu bamguâgit bei lei.

²³Pie le lau, ’nggeuki gesuâkpup lêuzaidu pa â hing mak lei; Jordan geuki ne pe mui ge teleu gigetie sede pa â, pelung teditau ze bam lei.

²⁴Mige ne pechu kakuai ne guakpat dui mei, nune ’mpia ne pametu gene mi le duî mei?