Read Zeme Naga JOB 41 Bible Online

JOB 41 - Zeme Naga bible

JOB 41

¹“Kakuai ne Teriema je nang gaupat dui mei, nune pe lei nîmgesip ze heria ne pi dui mei?

²Pe nêu ge heria nang luak kai dui mei, nune kaguak ne pe keza guakpela dui mei?

³Pa ne ningchu misongga ze kiâm gu mei? sam karenuabe ramme ne ningchu pa ’mpau gu lei.

⁴Betingbeta ning guâ ka’ngguabe kau hang pechu lu gai ra, ning dage samria pa tew gai gu mei?

⁵’Nruine dage gum ze pechu nang ngua’nta gu mei, nune ning gu heleume hangge heria ne nang keî gai gu semei?

⁶Helîkahedatme ne pe peireige helîtew gu mei? Helîkahedatme ne penui ruage pechu ’nzipâng gai gu mei?

⁷Peguaktewbe hengeu ramme ne nang pe gei ge hiapuigit kai dui mei, nune hekâ je hiabe hengeu ramme ne pe peî nang hia dui mei?

⁸Pe peireige ning ba kena kai le lau; katingkangbe ning gai ni lau; nang chize tew dai ra mak lei!

⁹Pie le lau, ziemmena kaheguîbe tewkengam gai bei de lei; pechu ngaugaibe gene du ziemmena je â tewhelêu gai bei de lei.

¹⁰Pe laîsia-desang ze hing mak ze pechu hû’nrakchugairabe kau mî de ga lei. Chigum dizai â, a suage sapduibe kau ze châu lau?

¹¹Pechu peirui be ra a dage hepukkaibe kau châu la lau? Tingkehube kangge kebambe leine a gu lei.

¹²“Pe pî pe ba ramme deu ge, zai pa pe ranchi-kadesangbe mei nune, perâyibe lam ge mei ze rangrau mak ze I ranglia gu lei.

¹³Châu ne pe gu helabe paî gâupatchi dui lau? Châu ne pe gu pelip kadesuabe mechuapui hiagutchi dui lau?

¹⁴Châu ne pe mui latpatchi dui lau? pe gimra gua â mi hingbe kau lei.

¹⁵Pe ching â hinggei ramme tauperiabanggaibe ramme ne tew lei, pegum ramme ne gum ze gekumnam-heluagit kai lei.

¹⁶Kat ne kat je heluatingdibe ziegene, pe kakge tingkai gutchi lak lei.

¹⁷Chiramme kat-kat je ’ntukting ze bam lei; chiramme kat-kat je kuptit ze kuichâmpat lak lei.

¹⁸Pa kadêseibe gene pa’mbi plikpat lei, zai pe mik ramme a naimikpatbe gum lei.

¹⁹Pe mui gene keleu taubabe ramme pat lei, hemirâ ramme puakpriakpat lei.

²⁰Pe nêuki ramme gene hemika pat lei, heli ge mâ-langta-pribe gene gum, zai reheubang ramme rûbeibe gene gum zeu.

²¹Pe chuilu ne hegeî ramme ge hemi’ntau gai, zai pe mui gene hemimelei zuapat lei.

²²Pe guangtie ge peranchibe bam lei, zai mi kehingbe pe suage liamtat ka’ntua lei.

²³Pe pum gu pedip ramme kupheluatit bam lei; pe pum peireige kai’ntiprip kai lu tew’ngngaichi lak ze bam lei.

²⁴Pe lung â tingchu gum ze chi lei, mâ-niakbe bekangbe chukâng gum ze chi lei.

²⁵Pa zuachube luage peranchibe kau ramme hing di de lei; kehingbe gene penui duângga ze bam lei.

²⁶Hiazutkie ne pechu deîtauchang sede, chize ne mâ de tewchi lak lei; hengeu ne mei, hetu ne mei, nune depuî-ngeu ne mei pechu mâ de tewchi lak lei.

²⁷Pa â hegeî je megau hang riam gai, zai hetageî je hechingriâm hang riam gai lei.

²⁸Bai’mpitu ne pechu hû’mpakchi lak lei; pe hang â, tingchupaibe rak gene paikezitwangbe chukâng ramme ze megau hangge tew gai bei de lei.

²⁹Timtang ramme ze â megau hangge riam gai lei; depuî-ngeu ramme kediakeriangbe je pa â ka’nnui lei.

³⁰Pe pum ’ngkang ’mbia â heli pângdibe pemuiliabe-pi ramme gum lei; pa â chêuneibe timriang gum ze duirum ge jei bam lei.

³¹Sungkling ze heli gum ze langtaperi bam ra pa ne tew gai lei; sungkling ze mâ-châ li gum bam ra pa ne tew gai lei.

³²Pe chaige pling ze pe ga pungtat ti de lei; mige â sungkling pe peî pûdibe hang ’nning gai gu lei.

³³Kedeirei ge pa gumbe kau kehingbe gabe hekaune ga lei.

³⁴Kehube zat leine je pa pie bam lei; gechîrattewbe name leine peireige pa â heguang lei,” kacheu de lei.