Read Zeme Naga JOB 42 Bible Online

JOB 42 - Zeme Naga bible

JOB 42

¹Chidadege Jobbe ne Tingwang je samkak te lei:

²“Nang â mâgetaleine tewchi duî lei be, zai nang ne tâtew ra ’nninggai’ndibe tew’nsiachi lak lei be I chî lei.

³‘Mâ-gechîbe ga ze geteiliabe teika’mbaibe kau châu lau?’ Chipauziegene I chimakbe I â sapat kai ’ndi de lei, a hangge ningdaulak-kadesangbe ramme, I chimakbe zeu.

⁴‘’Ngking le lau, dezai I sam sa gu lei; I ne ningchu samneu gu lei, dezai nang ne achu ranglia lau.’

⁵Ning rasam sabe a kun ne seu lu de lei, kane chuna â a mik ne ningchu ngau de lei;

⁶chipauziegene a runne achu tewhelêu gai ze, kedeinia benai timbun gene I a lung kaheli de lei,” kacheu de lei.

⁷Aipau sam ramme Jobbe je Tingwang ne sa gai lu dege, Teman’mpeu Eliphazbe je Tingwang ne rang gai ze: “A lumpumbe ze nang benai ning kangpeu hangna peireige kai de lei; a guâ ka’ngguapeu Jobbe ne tew gai gum ze, a rasam deu ge ka’nzeibe sam ningnui sa gai mak daseu,

⁸Chidaze chunage getumsei sena benai meli’nsei sena tei lu ze a guâ ka’ngguapeu Jobbe dage tat ze ningnui hangge rûkambe-râtew ra peipat kai be lau; zai a guâ ka’ngguapeu Jobbe ne ningnui hangge kellum gai gu lei, ningnui maube luigum ze samram gai mak ra hangge pa kiebe kuâ ze I lu gai gu daseu, a guâ ka’ngguapeu Jobbe ne tew gum ze, a rasam deu ge ’ndaibe ze tâu mei be ningnui saliamakbe ziegeneu,” kacheu de lei.

⁹Chipau luigum ze Teman’mpeu Eliphazbe zai Shu’mpeu Bildadbe zai Naama’mpeu Zopharbe tat ze Tingwang ne penui je ’ndaikau rang gai mei be tew gai de lei; zai Tingwang ne Jobbe gekiebe lutau gai bei de lei.

¹⁰Zai pe kangme bau hangge pa kellum gai lu dege, Tingwang ne Jobbe heurâ hangge teiwang gai dai bei de lei, zai Tingwang ne Jobbe je besua’ngka ge pa keheube peirei gene dêt na pei gai dai bei de lei.

¹¹Chidadege pe sikiname ’mpeumi ramme benai ’mpuimi ramme, zai besua’ngka ge pechu chî ze bamme pe dage zuawang de lei, zai pe ki ge pechu mâ-nguateu de lei; zai penui ne pechu ngauka’nggiabe teilia ze, pe peireige mâ-kesiabe Tingwang ne teiwanggaibe deu hang gene pe lungsuitew’nta gai de lei; zai penui ruage ziemmena ’nsangne ne rangkâng pum benai gechâk baroine kat-kat pechu penui ne pei bei de lei.

¹²Zai Tingwang ne Jobbe je pa putchube ting ge suadu kenâbe ting ge ’nnam’ngkeu’ngkia gai bei de lei; zai pe dage meli chang kereu ze medai, put-hu chang seruk, getumsei ramme pechin chang kat, zai hekunmerângpui ramme chang kat bam di de lei.

¹³Pe name du ’mpeumi hangsena zai ’mpuimi hangchum bam di de lei.

¹⁴Meraibepui ji hangge pa ne Jemima ze ’ntak kai; zai pakenapui ji Kezia ze ’ntak kai, zai pakechumpui ji â Keren-happuk ze ’ntak kai lei.

¹⁵Zai heram leine ge Jobbe name heleume gum heleuyibe ’mpuimi katte ga lei; zai penui peu ne penui heurâ ramme hangge penui sikina ’mpeumi ramme ruage pei’mpam gai bei de lei.

¹⁶Aipau chângge Jobbe kum haî kat ze hedai ringchang ze, pe name zai pe chame rehei medai riâ ngauchang de lei.

¹⁷Zai Jobbe gechipau di, zai pe ting ’nsang gai lu ze chai di de lei.