Read Zeme Naga JOB 5 Bible Online

JOB 5 - Zeme Naga bible

JOB 5

¹“Chunage kû gai ni lau ning kuâ kakkairabe kau mige â la mei? Ka’nchime ruage châu dage nang ’nreiwang gai ra lau?

²Pelingsing ze kemiebe kau je pe lungkahereube ne tewchat lei, zai ’mpangpaibe kau je hemimeube ne gîchat lei.

³Kemiebe kau pe ma retbe I ngau lu de lei, kane pa bambeki ze kelua ze I deset kai de lei.

⁴Pe na ’mpeumi ramme hangge tew’nringduibe ’mpuî ga gai di de lei, keriekemui ge penui je chaîkakeniak te lei, zai mî de penui je meupatkairabe kau ga lei.

⁵Ka’njeibe kau ne pe gu mâ-hîmra teu lei, zai pa ne hetuzeu ruage ’nsangnedu lutat ti de lei; zai kahereibe kau ne pe heurâ ze ngau’ntetlak lei.

⁶Tewsabe ze â kedeinia gene pat mak, zai tewkahereube ze du kedei gene puakpat mak daseu;

⁷kane hemirâ liamchube gum ze, ziemmena â hereu ra lungkeu de lei.

⁸“I nung laîzai â Hera je I â peu gu, zai a deu ze Hera dage pei gai gu de lei;

⁹mâ kedibe ramme benai ’nningchanglakbe, ningdaulakbe tâ ramme misongga ze tewpeu dage zeu:

¹⁰Pa ne kedeirei ge tingrui ra pei zai helu ramme ge hedui lang gai lei;

¹¹pa ne kecheilungpungme je teichu’ngngu gai, zai kadesuime je hesuiyibe pei gai lei.

¹²Pa ne pa ningching siame ka’nningbe tak ramme tewhelêu gai lei, dezai penui batâ ramme ne tâtewpuichi lak ra hangge zeu.

¹³Pa ne kaningchingme je penui ningching siabe gene nîm ’ndi de lei; zai pejaîsiame ningching ramme tewbetûn gai lei.

¹⁴’Nrîmbeting ge penui â kemuîbe dau lei, zai tingmuî ge gum ze tîngna ge du kemitleu ze bam lei.

¹⁵Kane penui mui gene kemî’nggiâne je pa ne tew’nring gai, zai reziechime dagene kegame je ’nripat kai lei.

¹⁶Chidaze kelaksiabe kau â kaheguîbe bam lei, zai samram-’nzeimakbe kau pe mui kakelim de lei.

¹⁷“Pie le lau, Hera ne kaladdeibe kau â, hesuiyi gu lei; chidaze reziechibe Rapeu ne kedeibe ze ngau’nna se lau.

¹⁸Pa ne tewhejam gai, kane pa ne dumnam lei; pa ne tew’nteu gai, kane pe ba ne tewka’mmi lei.

¹⁹Tewkahereube seruk gene pa ne ningchu ripat kai gu lei; sena ge â kesiabe ne ningchu deîtau dai ra mak lei.

²⁰Herakûm ge kechaibe gene pa ne ningchu ripat kai gu lei, zai kahereibe ge hiazutkie ranchibe gene ripat kai gu lei.

²¹Saka’nsiabe leiria ramme gene ningchu tei’mbia ’ndu lei, zai tewka’nsiabe wang dezai chi je nang hing ra mak lei.

²²Tewka’nsiabe benai herakûm je nang ’nnui gu lei, zai kedeirei gu hekaune je nang hing ra mak lei.

²³Hênamkang gu tingchu ramme benai nang muikattew du, zai hênamkang gu hekaune ramme ning dage nguadesieyi du daseu.

²⁴Ning gu paîlîmbeki â ’nningtenang ra ga lei be nang chî gu lei, zai ning gu melidung je nang piewang dezai mâ de ga mak bam gu lei.

²⁵Ning chaname misongga ze bam gu, zai ning haîhikme â kedei gu timpeizeu gum gu lei be du nang chî gu lei.

²⁶Nang chîng ze gechipau dezai ning raw ’mbe wangkeu gu lei, panehîtit ge hemeubuî ze gechaîpung ge wanggaibe gum zeu.

²⁷Pie le lau, aize anui ne peupatlube kau de lei; aize gesangsingbe kau de lei. Seu le lau, zai ning hang yirabe hangge aize chî le lau,” kacheu de lei.