Read Zeme Naga JOB 6 Bible Online

JOB 6 - Zeme Naga bible

JOB 6

¹Chidadege Jobbe ne kak ze:

²“Hei, I lungkahereube ’nchu gai, zai a pausiabe daube leine hedu ge kai nung laîzai!

³Chilaîzai â sungkling gu hegitmoîne sua â rit’ngkeu gu lei; chipauziegene a sam ramme sakeluarâp kai ’ndi de lei.

⁴Reziechibe Rapeu gu bai’mpitu ramme a lung ge la daseu; a herui ne chi bai’mpitu ramme ’nchai geteube ramme sak lei; Hera gu mi kehingbe ramme ne achu ’nduareu ze la de lei.

⁵Pe hangge reheubuâ bambe luage hênam gu hekunmerângne ka’nra semei, makchai pe tak peireige getumsei ka’mbeu semei?

⁶’Nchaî kai mak ze tâmpîakbe teu dui se mei, makchai ’nruibûm lungge kehâbe ge teuyibe la semei?

⁷Chiramme hang kamereube a dage ga lei; chiramme ze I ngaukatenetbe hetak gum chang de lei.

⁸“Hei, I mâ kie le duî laîzai, zai Hera ne I keneibe pei gai bei laîzai;

⁹chidezai achu chaîkeniak’ngga gai ra Hera ne nei bei laîzai, pa ne pe ba heipat ze achu tew’ngga gai bei nung laîzai!

¹⁰Aize ne achu tumbe chang de leu gu de lei; raube tew mak ze geteube ted liebe ge du I ’ngnguplai ze bam lelêu gu de lei; Ka’nchipeu sam ramme I â tuâpat mak daseu.

¹¹I kuâchi le ra hangge a ranchi ’ndaikau la lau? zai I ’ndaikau changgairabe hanggene, I liekua bam ra lau?

¹²A ranchi ze tingchu ramme ranchi semei? nune a pum ze hetageî semei?

¹³Pelingsing ze achu ’ngngâgairabe a dage ga de lei, ’ngngâduibe leine ze â a dagene kumtua ’nde lei.

¹⁴“Mi-mige du pe kangpeu dagene ka’nggiabe tei’mbia’ndibe kau â Reziechipeu je kehingbe sâu’ndibe kau de lei.

¹⁵Kane a puiname â ’nggeuterak kuiki gum ze achu choa lei, ’mbûngduilut luapelatattibe gum lei,

¹⁶chiramme kebun ne muîseu ze, zai chige kebun ka’mbaibe bam gum zeu.

¹⁷Tinglumpat dege â penui ga gai di de lei, lum gai dege penui bambe bâm gene penui ga gai di di lei.

¹⁸Tebeî-kangzangtewtatme penui ’mpuî gene kezit ze lietat ti, tingkangram ’mbe penui tat kai ze ga gai gai de lei.

¹⁹Tema gu tebeî-kangzangtewtatme ne peu lei, Sheba gu tebeîtewme ne kaheguî lei.

²⁰Penui ’nnum’mmirandibe ziegene penui lunggailak ti de lei, chilia ’mbe penui wang de lei, zai penui ’nningdaulak ti de lei.

²¹Chunage a hangge ningnui â chigum di de lei; a pausiabe ngau lu ningnui hing di de lei.

²²I ne, ‘A hangge kela pei lau,’ acheu bei mei? Makchai, ‘Ning heurâ gene a hang henim pei lau,’ acheu bei mei?

²³Makchai, ‘Heteureime ba gene achu meupat kai lau,’ acheu bei mei? makchai, ‘Achu tewsâme ba gene achu ’nri gai lau,’ ze I ne acheu bei lau?

²⁴“Achu geteilia lau, dezai I a kuâneu ta du de lei; achu a mâu tak ze geteiliadesi gai lau.

²⁵Lungsang sam ramme â ’ndaizeuge tâtewchibe rezie la lau? kane ningnui ne kaladdeibe gene ’ndaikau laddeigaibe la lau?

²⁶Sam ramme ze laddeichi dui lei ze ningnui ’nning gai mei, pe duânggabe kau ziemmena samsa ze â tingkai chang ze bambe luage zeu?

²⁷Ningnui â kemî’nggiâne peireige hedachak ze, ningnui kangpeu je helîtewsin leu gu de lei.

²⁸“Kane chunage ningnui suiyi ze achu pie gai lau; I â ningnui suage karasa sa ra mak daseu.

²⁹’Nreiwang gai lau, peize kemaube tâ tew gai se lau. Chunage ’nreiwang lau, I ka’nzeibe ze tew’ngkui gai ra tew la de lei.

³⁰A leiria ge tâumakbe la mei? keyi-kesia I gepachi mak semei?