Read Zeme Naga JOB 7 Bible Online

JOB 7 - Zeme Naga bible

JOB 7

¹“Kedeirei ge ziemmena â tâ gechibe ’nggua, zai pe gu kering ting ze hezie ne hiteupeu keringting gum mak semei?

²Kebang ne kezuikang je ka’nchie gum, zai hezie ne hiteupeu ne pe hî ngau ra piekua gum,

³chigum ze a hangge perua changbe kêu ramme achu pei gai lei, zai lungkahereube tingmuî ramme a dam hangge ’ndeupat kai bei de lei.

⁴I jeikeube luage, ‘’Ndaitewbe luage I chu ra lau?’ I kacheu de lei. Kane tingmuî tie-kadesang lei. Zai hechua riâ chang ze I â ’ngngaikedat-ka’nruibe ne pui lei.

⁵A pum â geteube rik ramme benai kerai ne chûmpui nan la de lei. A gei ’ngku di, zai hejâm karchibe teupângpat dai la de lei.

⁶A keringbe naimikpui ramme â paîdakme gu ’ntak sua â kakelua lei, zai kaheguîbe ga ze a keringbe naimikpui ramme tud kai de lei.

⁷“A keringbe ze â hechuilu kat runne gum chang di lei be chî bam lau; mâdaune a mik ne keyibe ngau dai ra mak te lei.

⁸Achu ngaupeu mik ne achu ngau dai ra mak te lei; achu nang piebambe luage I â tat tu de lei.

⁹Kemâu ziakra gai ze ga gai di gum, Kechaiberam ’mbe wangkeube kau â, chu dai mak lei;

¹⁰pe ki lam’mbe pa helatwang dai mak, zai pa bambe bâm ne du pechu chî ta di de lei.

¹¹“Chidaze I sasau ra mak lei; a herui lungkahereube gene I samsa gu lei; a keringbe betedka’nsîbe gene a lungneu-sam I sa gu lei.

¹²Nang ne a peireige reîgit bam ra changbe ze, I ze sungkling mei nune sungkling gu mârekaune semei?

¹³‘A jeî gene a suitew’mmi gai gu, I jeibe gene I kahereube tew’ncha gai gu lei,’ I kacheube luage,

¹⁴chipau luage, nang ne hemangka’mmibe ramme ne achu tewhingrim gai, zai mâ-’ndûliabe ramme ne achu kakehei lei,

¹⁵chidezai a pum ringrabe je sua â, kakrabe benai kechaibe je I kelangderabe hangge zeu.

¹⁶I ringgailak te lei, I â ringbamgailak te lei. A dagene ’mbia de zu lau, a keringbe ting hechuilu runne daseu.

¹⁷Ziemmena ze ’ndaikau lau, pechu nang ne misongga tâtewgaibe zai pe peireige ning lungkaibe,

¹⁸hechua ’nsangne nang ne pechu ’ngkiâmie, zai pehî’nsangne pechu kedak bambe zeu?

¹⁹’Ndaitiege a dagene nang pie’mbiatat mak bam ra, zai a ’nchai ’nneikeu mak tâne achu sâu gai mak bam ra lau?

²⁰I hemui gai lêuzai du, ning dage I ne ’ndaikau tew gai bei lau, nang ziemmena je ’nchetbampeu gau? ’Ndaitew ze ning gu ka’nchetbe hang achu tew gai lau? ’Ndaitew ze ning hangge I ne heputritbe chang di lau?

²¹’Ndaitew ze I hedieka’ngkabe ze nang ne lun gai mak, zai a gu hemui-helut lutua gai mak lau? Chuna â I â kedei lungge jei du de lei; nang achu peu gu, kane I â bam dai ra mak te lei,” kacheu de lei.