Read Zeme Naga JOB 8 Bible Online

JOB 8 - Zeme Naga bible

JOB 8

¹Chidadege Shuah’mpeu Bildadbe ne kak ze:

²“’Ndaitiege airamme nang sa bam ra, zai ning samsa pechui chi-desang bam ra rei lau?

³Samramka’nzeibe Hera ne tewkedat ’ndi mei? Makchai mâgetaleine ge Reziechipeu ne kapelingbe ze teikedat ’ndi mei?

⁴Pe peireige ning name ne hemui gai ’ndizai â, penui hedieka’ngkabe gu rezie ge pa ne penui je peipat kai ’nde lei.

⁵Nang ne Hera je peu bei zai â, zai mâgetaleine ge Reziechipeu dage gekietew gai bei zai â,

⁶nang ne ’nchi zai lungsangtew zai â, chigum dizai â pa ne ning hangge zuachu gu, zai ning ki hang yisingbe ne pa ne ningchu peiruî gai gu lei.

⁷Zai nang putchube ge kecheibe chang leusede, nang bechâng lunghangdairabe ting ze â di-desang gu lei.

⁸“Ning dage I kiam lei, ’ndâting gu kemêt kai ni lau, zai anui paume ne ’ndaikau peupat lu mei be ’nningdesi gai ni lau;

⁹anui â ’nzimai poine da, zai mâ de chî mak daseu, kedeirei ge anui keringbe ting â kezui daseu.

¹⁰Penui ne ningchu geteilia ze, ranglia mak, zai penui chika’mmibe gene sam ramme sapat mak ta ra mei?

¹¹“Dechup gabe bâm ge papairas bang chîngpat duî mei? Hedui gabe bâm ge heku ramme lungpuigit bam duî mei?

¹²Pe pâ pa ze bambe luage kuîtap kai makge, kêdabe bang suadu penui chairaî-raî lei.

¹³Hera je ’ngngaî’ndime leine ’mpuî â chigum ze bam lei. Hera je chimakbe kau kaheguîbe â ga gai gu lei.

¹⁴Pa ’nnumtewbe ze pânghakhai gai di lei, zai pa ’nnumka’mmibe ze â ’ndiakrâ gum chang lei.

¹⁵’Ndiakrâ ge pa ka’ngngêu de lei, kane chize sapgim mak lei; chize pa ka’nzap te lei, kane chize bamlielak lei.

¹⁶Naimik’mbi gene pa chîngchu lei, zai pesûne ramme ne pe gu merie luî bamtuipik bam lei.

¹⁷Pema ramme ne tingchutum retgit bam lei; tingchu ramme zeu ge pa â bam lei.

¹⁸Pebâm gene pechu tew’nsia gai ’ndizai â, chize ne pechu ’ngkim ze, ‘I â mâdau de ningchu ngau me lei,’ acheu sa gu lei.

¹⁹Pie le lau, aize pe gu ’mpuî ge tatbe suigut te lei; zai kedei gene kêdabe ramme puakpat ku lei.

²⁰“Pie le lau, heziâkgabe kau je Hera ne tuâpat kai ra mak lei, zai tâ-kesiabe tewme ba du teigai’ngngâ ra mak lei.

²¹Pa ne ning mui ge ka’nnuibe ne kaipui gai dai gu, zai ning mui ge hesuiyi ka’nrungbe ne kaipui gai gu lei.

²²Ningchu ngaugailakme je â ka’ngngambe paî ne bâ gai gu lei, zai ziemmena kesiame gu hetiampaîki â, bam dai ra mak lei,” ze kacheu de lei.