Read Zeme Naga JOB 9 Bible Online

JOB 9 - Zeme Naga bible

JOB 9

¹Chidadege Jobbe ne kak ze:

²“Chigum de lei be I chî sing lei: Kane chauge Hera suage pelingtewbe kau chang dui lau?

³Mige pechu geikang ra ’nning dizai â mige ne du lua chang kat ge luakat ne kakchi lak lei.

⁴Pa â pe lung ge kaningchingbe kau, zai peranchibe ge reziechibe kau lei, châuge pechu ’nggi ra pe runne pe lung tew’nchi gai lu, pechu duî lu lau?—

⁵Pa ne kedeiloa kedibe ramme lutua lei. Pe lumpumbe gene chiramme pa puaka’ngkumbe luage zeu;

⁶Pa ne kedei ze pebâm gene teikakenuk lei, zai bechia ramme kakedun lei.

⁷Pa ne naimik je die gai lei, zai pa chu mak te lei, hegi ramme kainampeu ze pa lei;

⁸tinggîm ramme liâmpat kai, zai sungkling kagesuâkbe ze chaîchimpeu ze â pe runne lei;

⁹Pa ne hegi ramme, Kebakrak benai ’Ngkamcha, Tingchachikeleu ramme benai, tingpî ’mbia hegi ramme tew gai de lei;

¹⁰Pa ne mi ningchanglakbe tâ kedibe ramme, zai mi ningdaulakbe ramme sei kam lak ze ’ndam gai de lei.

¹¹Pie le lau, a dage pa tatpelapat te lei, zai I â pechu ngau mak lei; pa tat’nduâ la, kane I â pechu chipat lak lei.

¹²Pie le lau, pa ne sut-tat te lei; châu ne pechu tewnamchi dui lau? Châu pechu, ‘Nang ’ndaikau tew lau?’ ze acheu ra lau?

¹³“Hera ne pe lumpumbe teihelatwang dai ra mak lei; Rahab guâ ka’ngguame pe kangge kei’ngkumkeu de lei.

¹⁴Chidaze pechu kak ra hangge a sam ramme hangge ’ndaigum ze I gepachi le ra lau?

¹⁵I a mâu ga sede I pechu kakchi lak te lei; ’nggia gai ra hangge achu chau’ngkuigaipeu dage I kiâm himchang ra de lei.

¹⁶I ne pechu kû gai bei ze pa ne a kuâ kak kai bei lêuzaine du, pa ne a kuâ ’ngking bam lei be I ’nnumtewchi lak te lei.

¹⁷Natri chibe gene pa ne achu tew’nsia gai, zai pa tedeu ga ze a jâm ramme tewpung gai daseu;

¹⁸a chui lu gai ra du pa ne pei ra mak, kane lungkahereube ne achu tewpuigit kai bei de lei.

¹⁹Aize hechikaheriabe lêuzai â, pechu pie le lau! Aize samram ka’nzeibe deu hang zai â, châu ne pechu kûwangchi dui lau?

²⁰I a mâu ga sede a mui gîmsing ne achu tew’ngkui gai ra chang gu de lei; I heziâk ga sede kemaube hangge pa ne achu chak kai gu de lei.

²¹I â heziâk ga lei; a hangge I ’nninghereu me lei; a keringbe ze I ngaugailak ti de lei.

²²Aize kat kam lei; chipauziegene I sa lei, heziâkgabe kau benai ziemmena kesiabe kau je du pa ne tewka’nsia lei.

²³Tewka’nsiabe ne kechai ’nnangwang ra tewgaibeibe luage, pemâugame pausiabe daube ge pa â teihenuitew lei.

²⁴Ziemmena kesiame ba ge kedei ze â pei gai ’nde lei; chige samramme ju ramme pa ne dumchim ’nde lei— chize pa makchai â, chize châu dai ra lau?

²⁵“A keringbe naimikpui ramme â terika’nzupeu suadu kelua lei; mâ de keyibe ngau mak ze a keringbe naimikpui ramme liamtat kam de lei.

²⁶Chipau naimikpui ramme ze â, hekupum ne tewbe ’nneikuak ramme gum ’ntîtezi tat, kelie pa hetak nîm ra liamkeube gum tat te lei.

²⁷‘I kahereube ze I ’ngngaî ’ndu, a suisiabe ju I lutua ’ndu, zai a suiyi’ntaza ze bam gu lei,’ ze I acheu lêuzaidu,

²⁸I kahereube leine je I hing di di lei, pemâugabe kau hangge achu nang ne chak kai ra mak lei be I chî daseu.

²⁹Achu â tew’ngkui gai gu de lei; chidezai ’ndaitew ra peruânggabe ge I tâtewhereu bam ra lau?

³⁰Kebun ne a runne achu pia lu, zai kelung ne a ba ’ntik’nchi lu lêuzai du,

³¹chi acheuleusede, hûm ge nang ne achu tuâ gai gu, dezai a paîni ramme ’nsangnedu achu ngautenat ku lei.

³²I pechu kakchi le ra, anai kat-kat je hetûki ge tuherua le ra hangge, I gum ze pa â ziemmena mak daseu.

³³Anai hangna peireige pe ba diegaichi le ra, anai kakge ramgairabe kau mî de ga de lei.

³⁴Peize a dagene pe gu hetui tei’mbia ne lau, zai pechu hingbe ne peize achu tewhingrim se lau.

³⁵Chidezai pechu hingbe ga ze I samsachi le ra hangge zeu, a dage chigum I bam mak daseu.