Read Zeme Naga GETOABELEU 10 Bible Online

GETOABELEU 10 - Zeme Naga bible

GETOABELEU 10

¹Hei Tingwang gau, ’ndaitew nang sap’ndeutau bam lau? Kahereube ting ramme ge ’ndaitew nang ’mbai bam lau?

²Gechîrettewbe gene helungriaksiabe kau kelaksiame je gua’nchu-kadesang lei; penui tâtewbe kesiabe ka’nningbe gene peize penui je mî ne lau.

³Helungriaksiabe kau ne pe lung ge keneibe tew ra ran-kadesang lei, ziemmena mâ-ngau’ngkie ra kadekumpeu ne Tingwang je deset kai ze sa’nsiachi lei.

⁴Helungriaksiabe kau ne pe ju ge gechîrat-tewlia ze Hera je peu mak lei; pa ka’nningbe leine ze â, “Hera ’ngga lei,” kacheube ze lei.

⁵Pa kelungbe tak ze pehî leine ge ’ntuachu ze bam lei; nang samrambe ramme â, kehu ’mbe pa ngauchanglakbe ge la lei; pechu ka’nggime leine je pa ne ka’nneî lei.

⁶Pe lung ge aigum ze pa ka’nning lei, “Achu â tew’ngngai ra mak lei; rehei leine ge I â kahereube dau ra mak lei,” ze acheu zeu.

⁷Pe mui ge â kadesetbe benai kechoabe zai kategabe ne pui lei; pe lei kangge â pe jaisittewbe benai ’nzeimakbe la lei.

⁸Keloa ramme ge pa miramme je tew’nsia ra lîmkua lei; ka’mbaibe bâm ramme gene kesiajaîgame je pa gîchat lei. Pausiame je pe mik ne lîmpiekua bam lei,

⁹hênam ge duilui ka’mbaibe gum ze, rei nan ze ’mbaikuâ lei; chige kelaksiame je nîm le ra pa ’mbaikua lei. Pe gu chîak’mpia gene kelaksiame je chakwang lu ze nîm nîm lei.

¹⁰Pausiame je tewkau gai lu tewhitruai nan tai lei, zai pa pe ranchibe zene pechu tewkeu gai ze bam lei.

¹¹Pa ne pe lung ge aigum ze ’nning ze, “Hera ne chita kam de lei, pe ju du tewtimbai ’nde lei, mâtew-tewsedu pechu ngau dai ra mak lei,” ze kacheu de lei.

¹²Hei Tingwang gau, zuachu lau; ning ba getuachu gai lau; tewsabe lieme je ’ngngaî se lau.

¹³’Ndaitewbei ze helungriaksia kau ne Hera je tuâpat kai ze pe lung ge aigum sa ze, “Nang ne mâ-hangge du riam gai ra mak lei,” ze acheu ra lau?

¹⁴Nang â ngaukâ la lei; eu lei, tewkahereube benai lungkahereube ze nang chitei la lei, ning ba ne chiramme ze ruî dai be ra hangge zeu; pausiabe kau ne ning dage pe runne pechu kai kam ’nde lei; nang ne bepui-bepeugame hang ka’ngngâpeu chang bam bei de lei.

¹⁵Nang ne helungriaksia kau benai kesiabe tâ tew kau ba ze tewbet ne lau; pe lungriaksiabe tak ze nang ne ngau mak tâne peu lau.

¹⁶Tingwang â betingbeta hangge heguang de lei; heramzatme pe gu heram gene ga kam gai du lei.

¹⁷Hei Tingwang gau, nang ne kecheiluîtewme luneibe kuâ ’ngking gu lei; nang ne penui lungran tew’nchi gai gu lei, nang ne ning kun du penui lam ’ndualie gai gu lei,

¹⁸pe pui pe peu game benai kategabe lieme hangge ka’nzeibe nang ne tew gai ra hangge zeu, chidezai hejaipumsie ziemmena ne penui je tewhingrim ta de ra hangge zeu.