Read Zeme Naga GETOABELEU 102 Bible Online

GETOABELEU 102 - Zeme Naga bible

GETOABELEU 102

¹A gu gekietewbe kuâ seu gai lau, Hei Tingwang gau; I kûka’nrungbe kuâ ze ning dage peize chang lau!

²Ning ju a dagene tei’mbai se lau! I kahereube mai ge zeu! A lam ning kun ’ngngiakeu gai lau; I ne kûgaibe mai dezai a kuâ kakkelua gai lau!

³A gu tingnaimikpui ramme ze hemika gum ze tat’ngga ze la lei, zai a ra ramme ze hemi ne rû gum ze rû la de lei.

⁴Hereubuâ lak kai bei ze heguikeudibe gum ze a lung â heguikeu di ze la de lei; a gu hetak teu ra I ’ngngaî ’ndi de lei.

⁵I ne huai ka’nchibe ziegene I rikeriâng bam di de lei.

⁶I â hênamkang gu lawai gum ze bam de lei, hênam ’mpiezîngdibe bâm ramme ge hebiepui bambe gum zeu;

⁷I jeikeulak ze bam lei, ’nruine heki’mpûm ge pe runne zîng ze tâubambe gum ze I bam lei.

⁸Naimikpui tâluî a reime ne achu ’nrû ze bam de lei, achu tâ-kakeliangme ne chiang gai ze a ji kûchu bam lei.

⁹Timbun ne I tak gum ze teu de lei, zai I sakbe ge du hemikdui gut kai di de lei,

¹⁰ning laîpatbe benai ning lumpumbe ziegeneu; nang ne achu puachu ze paitua ’ndi de lei.

¹¹A gu tingnaimikpui ramme ze â hegî kezui kaukeube gum bam lei; I â hereubuâ gum ze huikeu gai di de lei.

¹²Kane nang â Hei Tingwang gau, betingbeta hang heguang-bamrak ge ’ntau ze bam lei; ning ji â rehei piakeu leine dage bam bam lei.

¹³Nang ne zuachu ze Zaion peireige ngau’nggia gai gu lei; Zaion je chuna ’nggiarabe hî de lei; diegai’ndibe hî ze wangchang de lei.

¹⁴Ning guâ ka’ngguame ne Zaion gu tingchukâng ramme ze ka’nchâ lei; zai Zaion gu timbuimoîne peireige ngauka’nggia daseu.

¹⁵Heramzatme ne Tingwang ji je hing ze bam gu lei, zai kedeirei heguangme leine ne ning ngeudibe je hing ze bam gu lei.

¹⁶Tingwang ne Zaion je tei’nsapchu gai gu lei, pe gu pengêudibe gene pa saplia gai gu daseu;

¹⁷kegame ne kiebe kuâ pa ’ngking gai gu lei, zai penui gekiambe sam je ’nning’nna gai ra mak lei.

¹⁸Rehei wangdairame hangge aize peize rawdiak kai lau, chidezai chuna lungkeumakme ziemmename ne Tingwang je toa ra hangge zeu:

¹⁹pe gu ka’nchibe kehube bâm gene, pa ne piekeu bambe, tinggîm ’mbene Tingwang ne kedeirei je pie bam lei,

²⁰kebangki ge bamdime kadesuibe kuâ seu le ra hang, zai chai ra hang chaupatkai’ndime je zêune bam ra ’mpat kai ra hangge zeu;

²¹chidezai ziemmena ne Tingwang ji rasam Zaion ge rangba gai ra, zai pechu getoabe rasam ze Jerusalem ge rangba gai ra hangge zeu,

²²Tingwang je kellum ra hang heguangram ramme benai hezat leine wang’ndui gai dezai neu.

²³I ringbe patingsam gene a ranchibe pa ne tew’nnukeu gai ’ndi de lei; a gu tingnaimikpui ramme pa ne tew’ndui gai ’ndi de lei.

²⁴“Hei a Rapeu gau, a gu tingnaimikpui ramme sûngngangkelî ai gene achu teitat se lau, rehei piakeu leine dage pe gu tingkum ramme bam-bambepeu, nang zeneu!” ze I kacheu de lei.

²⁵Keraîbe ting gene kedeirei gu pedimpung ze bam bam ra nang ne kai bei de lei, zai tingkehube ze â ning bachiâm de lei.

²⁶Chiramme â ga gai gu lei, kane nang â bam bam lei; paîni tei’nsia’ndibe gum ze chiramme sia gai du lei. Paîni kahelei gum ze nang ne chiramme teihelei bam lei, zai penui ga gai kam di lei;

²⁷kane nang â peluî-luî bam lei, zai ning gu tingkum ramme du betun ga lei.

²⁸Ning guâ ka’ngguame name ne temichai ze lung bam gu lei; penui rehei lungchu-dairame je ning masuage tei’nsap kai bu lei.