Read Zeme Naga GETOABELEU 103 Bible Online

GETOABELEU 103 - Zeme Naga bible

GETOABELEU 103

¹Hei, a keringbe gau, Tingwang je ’nnam gai lau; zai a pum ge bambe leine zene, pe ji ka’nchibe je ’nnam gai lau!

²Hei a keringbe gau, Tingwang je ’nnam gai lau, zai pe gu keyibe peibe leine ’ngngaî se lau,

³ning gu hemui-helut leine lunbepeu, ning gu keteu-keneube zat ramme leine tewka’mmipeu,

⁴ning gu keringbe mâ-kuiki gene ripatkaipeu, hungka’ntipbe benai ka’nggiabe ze ning peî ge pengêudibe gene luakkaipeu,

⁵nang ring tâne mâ-keyibe zene ning hangge ning lungwângchang ze bam ra tewgaipeu jeu, chidadege keliengrie je gum ze ning riting ze tewrechi gai dai be ra hangge zeu.

⁶Tingwang ne peling gechiau’nzeigaibe tâ tew lei, zai kategabe lieme leine hangge ka’nzeibe tew gai lei.

⁷Mosabe dage pe gu ’mpuî tak ramme chî ra pa ne tewliâ gai lei, pe gu tatew tak ramme chî ra Israelme dage tewlia gai lei.

⁸Tingwang â ka’nggiabe benai kehungbe ne pui lei, zai pe raitie zai hungka’ntipbe ne puigit bam lei.

⁹Pa â ’nziene ’ngngiam ra mak lei, zai betingbeta pe râta bam ra mak lei.

¹⁰Pa â anui gu kahemuibe ramme luigum ze anui peireige tâtew gai me lei, zai anui mâu-miê luigum ze du peiruî gai me lei.

¹¹Kedeirei gene ’nrei ’mbe tingkehube hu ze bam gum ze, pechu kehingme peireige pe gu hungka’ntipbe ze du disang di ze bam lei;

¹²tingrun ’mbia gene tingbia ’mbia riâ deube riâ ze, anui hedieka’ngkabe ramme ze du anui dagene pa ne tei’ndeu gai de lei.

¹³Bepeu ne pe name je ka’nggia gum ze, Tingwang ne pechu hingchime je ka’nggia lei.

¹⁴Pa â anui je ’ndaikau ne ’ndam gai mei be ze chî lei; anui ze â kedeiniamoîne lei be pa ne chî bam lei.

¹⁵Ziemmena â, pe gu tingnaimikpui ramme ze hereubuâ riâ de lei; peningkâm ge hêrapâ gum ze papat kai lei;

¹⁶pe peireige tingkai ne gui bei ze, chize tat ti tai de lei, zai pebâm ze chî dai ta di de lei.

¹⁷Kane pechu hingchime peireige â, Tingwang hungka’ntipbe ze â, betunmakbe gene betunmakbe riâ chang ze bam bam lei, zai pe gu kapelingbe ze penui chaname gene penui chaname riâ,

¹⁸pe gu samhatkaibe teichime benai pe gu hingde ramme teichime, peireige du betunmakbe gene betunmakbe riâ chang ze bam bam lei.

¹⁹Tingwang ne tinggîm kehube ge pe gu heguang-bamrak tew’ntip kai ’nde lei, zai pe gu heguangram zene mâgetaleine peireige samram lei.

²⁰Tingwang je ’nnam gai lau, Hei ningnui pe gu angelme gau, ningnui peranchime pe gu sam tâ tewme gau, pe sam patbe kuâ seu lu zeu!

²¹Pe gu baudime leine, pe tâ tewme kedime, pa keneibe tewme gau, Tingwang je ’nnam gai lau!

²²Pe bachiâm ramme leine gau, Tingwang je ’nnam gai lau, pa kaheguangbe bâm leine gezeu. Tingwang je ’nnam gai lau, Hei a keringbe gau!