Read Zeme Naga GETOABELEU 104 Bible Online

GETOABELEU 104 - Zeme Naga bible

GETOABELEU 104

¹Tingwang je ’nnam gai lau, Hei a keringbe gau! Hei Tingwang a Rapeu gau, nang â di-desang lei! Pengeudibe benai kaheguangbe zene ningchu â bâ gai bei de lei,

²kebabe zene paîni chang ze ning runne ningchu tapchim bampeu, hetiamki gum ze tingsung kedibe liâmpatkaipeu,

³sungkling peireige ning kisîam ramme gu dappai ramme ’ngkinggaipeu, kemâukang ramme zene ning gu timriang chang ze bampeu, tingkai kan ramme peireige chuapeu,

⁴tingkai ramme je ning gu hepâupaume hang tewgaipeu, zai hemi benai melei je ning tâ tewme kedime hang tewgaipeu, ningchu zeu.

⁵Nang ne kedei ze pe gu pedimpung ramme ge kai bei de lei, chidezai chize mâtew-tewsede kechuî’ngngai me ra hangge zeu.

⁶Nang ne kedei je paî ne gum ze, hedui ne ’nraknam gai bei de lei; chi hedui ramme zene kedeiloa ramme peirei ’ntuachu de lei.

⁷Nang kiagâibeibe gene hedui ’mbiatat kam di lei; ning gu tingcheibe ’ncheu gene hedui ramme paktat kam di de lei.

⁸Kedeiloa ramme ’ntuachu gai de lei, zai bechuak ramme ’mpinkeu gai de lei; nang ne penui hangge gechiaugaibeibe bâm bâm gezeu.

⁹Nang ne chiramme ’nzûpatmakrabe hangge herai ze kai bei de lei, chidezai kedei ze hedui ne naîchim dai me ra hangge zeu.

¹⁰Peningkâm ramme ge depin ramme puakpat ra nang ne tew gai bei de lei; kedeiloa ramme kak gene penui luapelatat lei,

¹¹peningkâm gu mârekaune leine sak ra pei bei de lei; hênamkang gu hekunmerângne ramme hedui kahereibe meu gai bei de lei.

¹²Chi hedui depin ramme taige ’nruine ramme ne penui bâm chang ze bam de lei; hingbang keî ramme zeu gene penui ’nra ze heleutew lei.

¹³Ning bâm kehu ’mbene nang ne kedeiloa ramme peireige tingrui ra tew gai bei de lei; ning tatew ranchi gene kedei ze peziewang ze bam lei.

¹⁴Kaurui hangge hereubuâ buapat ra, zai ziemmena tâtew-teu ra mâ-kiak ramme puakpat ra nang ne tew gai lei, chidezai pa kedei gene hetak,

¹⁵zai ziemmena lungsui tew’nta gai ra wain, pe ju ’nnuk’nniksik kai ra mâ-châdui, zai ziemmena lungran tew’nchi gai ra tingku hang, airamme tewpat le ra hangge zeu.

¹⁶Tingwang gu hingbang ramme ze tingrui chimbiak kai bei de lei, Lebanon gu kedarchingbang ramme pa taugaibe gezeu.

¹⁷Chiramme ge ’nruine ramme penui chip pua gai lei; chingkeleu bang ramme ge teluâk chip ramme bam lei.

¹⁸Kedeiloa hube ramme ze â hênam-kemei ramme bâm hang chang lei; tingchutum ramme ze â ka’nseube bâm hang chang lei.

¹⁹Beting-pehî ramme ’nchet ra nang ne hekêu tew gai lei; tingnaimik ne pa kêugairabe hî hang chî lei.

²⁰Nang ne kemuîbe tew gai lei, zai chize tingmuî lei, ’nreûlungge mârekaune ramme leine buaruapatbe hî zeu.

²¹Duilui perîrat kau ramme penui hetak hang kakehuak lei, Hera dage penui hetak hang peu zeu.

²²Naimik chu dege, penui tat dai kam di tai lei, zai penui ki ramme ge jeikelakau gai kam di lei.

²³Ziemmena ne pe tâbâm ’mbe zuapat lei, zai hegî ting chang mak tâne pa tatew’nrî ze bam lei.

²⁴Hei Tingwang gau, ning chiam ramme kie-desang lei! Kaningchingbe gene nang ne chiramme tew kam gai bei de lei; kedeirei ning bachiâm ramme ne puigit te lei.

²⁵Wî ’mbe ge sungkling kedi la lei, mâ-mâ zat ramme ne dangsang bamdibe. Di-sang-di ze pedit ’ndeuchi lak ze la lei, mâ-keringbe zat ramme kedibe benai kecheibe ramme zeu.

²⁶Chilia ’mbe dui’nneikuak ramme tat lei, zai hedui ge ’ntarabe bâm hang nang ne tewgaibe, chige Lebiathan bam de lei.

²⁷Airamme leine ze ningchu ne pierim bam lei, beting panehî-hî ge penui hetak hangge nang pei gai ra hangge zeu.

²⁸Nang ne penui je pei gai bei dege, penui luka’ndui lei; nang ne ning ba pat kai bei dege penui ze mâ-mâ keyibe ramme ne ’nggeugit ze bam bam lei.

²⁹Nang ne ning ju ’mbai bei dege â, penui duânggarak kai di ze bam lei, nang ne penui chuilu lutat dai nan dege â, penui chai di ze kedeiniamoîne lam’mbe helattat kadai lei.

³⁰Nang ne ningchui langpat kai bei dege, chiramme bam kam di de lei; zai nang ne kedeirei ze tewrechi gai kadai de lei.

³¹Peize Tingwang ngeudibe ze betingbeta bam bam lau, Tingwang je peize pe bachiâm ramme ge pe suiyi’nta lau,

³²kedeirei je piebambepeu zai chize kechuîka’ngngaipeu, kedeiloa ramme deîtau gai ze chige mika pat ra tewgaipeu jeu!

³³I ring tâne Tingwang dage leutew bam gu lei; I bambe ting ge a Rapeu je leu ne toa bam gu lei.

³⁴A gu kakellumbe ze pe hangge peize pe suiyibe chang lau, I Tingwang gene a suiyi’nta ze la daseu.

³⁵Peize kahemuime je kedeirei gene ga gai de lau, zai helungriaksiame je peize ’ngga de zu lau! Hei, a keringbe gau, Tingwang je ’nnam gai lau! Tingwang je toa lau!