Read Zeme Naga GETOABELEU 105 Bible Online

GETOABELEU 105 - Zeme Naga bible

GETOABELEU 105

¹Hei Tingwang dage hesuiyibe sam pau gai lau, pe ji je kû lau, hezat ramme ruage pe gu tatew ramme chî ra tewliâ gai lau!

²Pechu leutew gai lau, pechu toa ze leutew lau, pe gu ningdaulakbe tâ tewbe ramme haimena suage salia zu lau!

³Pe ji ka’nchibe gene mi ngeuditau bam lau; Tingwang je gepeume lung ze peize hesuiyi’nta ze bam lau!

⁴Tingwang je benai pe ranchi je peu lau, pa kebambe bâm je peu bam lau!

⁵Pe gu ’nningchilakbe tâ pa tewgaibe ramme ’nningdau bam lau, zai pe gu tâningdaulakbe tâ ramme, zai pe gu samrampatkaibe ramme zeu,

⁶pe guâ ka’ngguapeu, Hei Abrahambe gene piakeume, pa ne kelânglume Jakobbe name gau!

⁷Pa â Tingwang anui Rapeu de lei; pe gu sam samrambe ramme ze â kedeirei leine ge la de lei.

⁸Pa â betingbeta hang pe gu samhatkailube deze pe lung ge chî la lei, rehei chang kat hangge pa ne diegai’ndibe sam,

⁹pa ne Abrahambe dage samhatbe tew gai lu ze, Isaakbe dage pe gu deseugaibe,

¹⁰hingde rawdiakkaibe chang ze Jakobbe dage pa ne tewgai’ndibe, betunmakbe samhatkaibe chang ze Israel dage tew’ntipkaibe ze

¹¹“Ningchu I ne Kanaanram ze pei gai lei, heram ze ning dam hangge zeu,” ze kacheube zeu.

¹²Penui ziemmena riak gechâmne ze, sei du sei tâulak, zai chige ting kat hang lunggaileume ne,

¹³heram gene heram, heguangram kat gene kêdabe ziemmename zat dage tirua ze bambe ting ge,

¹⁴pa ne mi-mige je du penui je tega ze bam ra pei mak te lei; heguangme je pa ne penui gu tâtewbe deu ge ’ngngiam ze,

¹⁵acheu sa ze, “A gume I ne ’nnukkai’ndime je deîtau se lau, a gu kemeume ramme je tewhereu se lau!” ze kacheu de lei.

¹⁶Heram ge herakûm pa ne kûwang gai ’ngkage, hetak hang patbe bâm leine ze tew’nsia kam gai ’ndi de lei,

¹⁷pa ne hangkat je penui suage lang’ntua gai ’ndi de lei, kebang gum ze zuagai’ndipeu Josepbe jeu.

¹⁸Pe pî ramme â hekaikaibe hegeî ramme ne tew’nteu ’ndi de lei, pe guangtie ge hegeî’ngkapgua ne ’ngkam ’ndi de lei;

¹⁹pa sagai’ndibe ze wangchang mak tâne, Tingwang sam zene pechu kedak ze bam de lei.

²⁰Heguang ne pechu lupat ra lang gai bei de lei, hezatme gu samrampeu ne pechu ’mpat kai bei de lei;

²¹heguang ne pe ki gene Josepbe je heguang hang zai pe gu kebambe leine peireige samrampeu hang tew gai bei de lei,

²²pa ne pe sui-sui gene pe gu tâ-muipuame je laddei ze getei ra, zai gechîngme bau je kaningchingbe getei gai ra hangge zeu.

²³Chidadege â Israelbe Ijipram ge wang de lei; Hambe ram ge Jakobbe hesang chang ze ’nnai bam de lei.

²⁴Dadege Tingwang ne pe gu ziemmename je pung-ze-sa ra tew gai bei de lei, zai penui teureime sua â penui ranchi’nteu ra pa ne tew gai bei de lei.

²⁵Pe gu ziemmename je ngaugailak ra pa ne penui lung tewkedat kai bei de lei, pe guâ ka’ngguame je penui ningching kesiabe ne ngua ra hangge zeu.

²⁶Pa ne pe guâ ka’ngguapeu Mosabe benai pa ne kelânglupeu Aaronbe je lang gai bei de lei.

²⁷Penai ne pe gu ka’nchatbe ramme penui ruage tewlia gai de lei, zai Hambe gu heram lungge tâningdaulakbe ramme tew gai de lei.

²⁸Pa ne kemuîbe lang gai bei ze heram ze muîgit ti de lei; pe sam ramme deze penui ne lumeu ze ka’nggi de lei.

²⁹Pa ne penui gu hedui ramme ze hejai chang ra tew gai bei de lei, zai penui gu hekâ ramme chai ra tew gai bei de lei.

³⁰Penui ram ge hegau lungwang ze puigit ti de lei, penui gu heguang kisîam ramme ge ’nsangdu pui di de lei.

³¹Pa ne rang gai bei dege temaine ramme, zai timpaube ramme ne penui ram ge lungwang de lei.

³²Tingruirabe kelei ge desak rui ra, zai penui ram ge ting kepitplik-lik ze bam ra pa ne tew gai bei de lei.

³³Pa ne penui gu grepchî hiâm benai ’mbeuchîbang tew’nsia, zai penui ram gu hingbang ramme tewbetpriu gai bei de lei.

³⁴Pa ne rang gai bei dege, tîngkau ramme lungwang de lei, zai tîngkaupoine ramme ne dungdi wang de lei;

³⁵chi ne penui ram ge hegineu ramme teumut ’ndi de lei, zai penui gu kedei rachî ramme teu kam ’ndi de lei.

³⁶Penui ram ge lungkeuraibe na leine je â pa ne bichat kam ’ndi de lei, penui rîting ge lungkeuraîlangbe na ramme jeu.

³⁷Chidadege â gechâk benai gepût tei lu Israelme je pa ne nguapat kai de lei, zai pezatme ruage mî de kâukeube kau ga lei.

³⁸Penui tat ti dadege â Ijip â penui suiyi di de lei, penui hangge kehingbe chige wangchanggaibeibe ziegeneu.

³⁹Penui je sungnam ra pa ne kemâu kehingpat kai bei de lei, zai tingmuî ge kebabe hangge hemi pei bei de lei.

⁴⁰Penui ne mâ kie de lei, zai pa ne hekuai ramme teiwang bei de lei, zai tinggîm ’mbene pa ne penui je tingku misongga peikeu bei de lei.

⁴¹Pa ne tingchutum tew’ngkak kai bei ze hedui puakpat te lei; chize ’nggeuki gum ze hênamchangbe heram ge luapela di de lei.

⁴²Pe sam riagaibe ka’nchibe benai pe guâ ka’ngguapeu Abrahambe je pa chibam lei.

⁴³Chigum ze helungsuiyibe ne pa ne pe gu ziemmename je nguapat kai de lei, pe gu kelânggaime ne leutew zeu.

⁴⁴Zai heramzatme gu heram ramme ze pa ne penui je pei gai bei de lei; zai heramzatme ne hereu ze tewpatkaibe mâ-mâ herachi ramme ze penui ne teilung ’ndi de lei,

⁴⁵hetûn-gaibe riâ chang ze pa rawdiakkaibe-hingde ramme peize tei’mmi, zai pe gu hingde ramme peize rei’mmi ra hangge zeu. Tingwang je toa lau!