Read Zeme Naga GETOABELEU 106 Bible Online

GETOABELEU 106 - Zeme Naga bible

GETOABELEU 106

¹Tingwang je toa lau! Hei Tingwang dage hesuiyibe sam pau lau, pa â yi daseu; pe gu hungka’ntipbe â betingbeta bam bam lei!

²Tingwang tatew peranchibe ramme deze châu rangchi dui lau, makchai, pechu toarabe riâ châu toachang dui lau?

³Ka’nzeibe teika’mmime ze yi de lei, pehî leine ge pelingtewme zeu!

⁴Ning gu ziemmena je nang ngauka’nggiabe teilia dezai, Hei Tingwang gau, achu chibam lau; nang penui je ripatbe luage achu ’ngngâ gai lau;

⁵chidezai ning gu nang ne kelânglume pung-ze-ka’ntuabe I ngau le ra, ning gu heramzatme hesuiyibe ge I du ngua a suiyi’nta gai le ra, zai ning gume ruage I du a ’nrîmyi gai le ra hangge zeu.

⁶Anui benai anui peume ne hemui gai ’ndi de lei, hemui-helut tâ anui tew gai ’ndi de lei; anui tew’nzû-desang gai ’ndi de lei.

⁷Anui paume Ijipram ge bambe ting ge, ning gu ningdaulakbe tatew ramme penui ne mâ-hangge du ’nning gai mak lei; ning gu hungka’ntipbe puigit bambe deze penui â chibam ta di de lei, kane Kegiebe Sungkling ge Hulangpeu je ka’nggi de lei.

⁸Chigumsedu pe ji hang ziegene penui je pa ne tew’nringpat kai bei de lei, dezai pe gu tâtewchibe rezie ze chî ra tewlia gai le ra hangge zeu.

⁹Pa ne Kegiebe Sungkling je ’ngngiam bei dege, chize changku gai di de lei; zai heram changbe ge tatkapelabe gum ze penui je sungkling nguatatpelapat te lei.

¹⁰Chigum ze ka’nggime ba gene pa ne penui je tew’nringpat kai bei de lei, zai hereime gu rezie gene penui je lupat kai bei de lei.

¹¹Zai penui teureime je hedui ne naîchim ’ndi de lei; hangkat je du chige ’nsak kai mak lei.

¹²Chidadege â pe sam ramme penui ’nnum’mmi di de lei; pechu toabe leu penui tew de lei.

¹³Kane pe tatew ramme mâtiege makse penui ngngaî ’ndi de lei; zai pa ne geteigai’mmirabe je penui bamkuâ mak lei.

¹⁴Kane hênamkang ge penui â penui teunei gesutlak-desang ze bam lei, zai hênamkang ge Hera je kakedak te lei;

¹⁵penui gekiebe ze pa ne pei gai bei de lei, kane penui ruage tewka’nsiabe rarît lang gai bei de lei.

¹⁶Sieki ge ziemmename, Mosabe zai Aaronbe Tingwang gu ziemmena ka’nchipeu je hemimeuchu dadege,

¹⁷kedei ’ngkakpat ze Dathanbe je ’nzuagut ’ndi de lei, zai Abirambe chaisuime je ’nsipnam ’ndi de lei.

¹⁸Penui bau zuilung ge hemi du ’ndetpat te lei; hemimelei zene helungriaksiame je rû kam ’ndi de lei.

¹⁹Horeb ge getumpoine luî penui ’ndam gai lu ze chi mâ-luî ’ndamlube je kakellum de lei.

²⁰Hereubuâ tegiteube getumsei luî hangge penui ne Hera ngeudibe deze hiak kai ’ndi de lei.

²¹Penui je tewka’nringpeu Hera je penui ’ngngaî ’ndi de lei, Ijip ge tâ kedibe ramme tewgaipeu,

²²Hambe gu heram ge mi ningdaulakbe tâ ramme, zai Kegiebe Sungkling ge mi ngauhingbe tâ ramme tewgaipeu jeu.

²³Chipauziegene penui je tew’nggakamgairabe gene Mosabe, pa ne kelânggailupeu, ne pe masuage sap ze tewtemaî gai mak laîzai â, pa ne penui je tew’ngga kam gai ’ndu de lei, ze pa kacheu de lei.

²⁴Chidadege lungkatemibe ram deze penui ngauka’nna de lei, pe sam riagaibe ge mâ du penui nei mak zeu.

²⁵Penui gu hetiamki ramme ge penui tiaktelum bam lei, zai Tingwang kuâ ze penui pheu mak lei.

²⁶Chipauziegene pe ba huachu lu penui je deseu gai ’ndi de lei, hênamkang ge penui kau de ra hang pa tew gai ra,

²⁷zai penui haîhikme je heramzatme ruage tewkau gai kam ’nde ra hangge zeu, heram ramme ge penui je hûtimrarip kai zeu.

²⁸Chidadege â Peor deiloa gu Baal-râ je kellum ra penui runne penui je tewhelêu gai de lei, zai keringbe gabe hera ramme dage herâtewgaibe hetak ramme ze penui teuchu di de lei;

²⁹penui tâtewbe tak ramme zene Tingwang lumpum tew gai kam ’ndi de lei, dadege â herarît penui ruage ’ndetpat te lei.

³⁰Chidadege Phinehabe ne sapchu lu ’mpaukuak kai kadai de lei, dadege herarît ze tat ti de lei.

³¹Zai pechu chipau tâ tewbe ze ka’nzeibe hang riam gai bei de lei, betingbeta rehei gene rehei hangge zeu.

³²Meriba gu ’nggeuki ramme ge penui ne Tingwang rata tew bei de lei, dadege â penui ziegene Mosabe dage kahereube wang gai di de lei;

³³penui ne pe lung tew’nsiagaibeibe ziegene sam geteube ramme pa sapat kai ’ndi de lei.

³⁴Tingwang ne penui je die-gaimakbeibe luigum ze hezat ramme je penui tew’ngga gai mak tai de lei,

³⁵kane heramzatme ruage penui lungkebut ze chime tewbe tak ze tew ra helichu di de lei.

³⁶Chime gu heraluîtewbe ramme guâ ze penui ’nggua ze bam de lei, penui hang ’mpia chang gai di taibe zeu.

³⁷Penui na ’mpuimi ramme benai ’mpeumi ramme je, herasiabe dage herâtewbe hangge pei gai de lei;

³⁸pe mâugame jai ze penui ruîpat kai de lei, penui na ’mpuimi ramme benai ’mpeumi ramme, Kanaan gu heraluîtewbe ramme dage herâtewbe hangge peipatkaibeime jai zeu; zai heram ze hejai ne tewhebâ ’ndi de lei.

³⁹Chigum ze penui tatew ramme zene penui hebâ gai di de lei, zai penui tâtewbe ramme ge penui pum tewhebâ ze bam di de lei.

⁴⁰Chidadege â pe gu ziemmena peireige Tingwang pe râtachu di de lei, pe gume, pe heu changme je pa ngautenet kai di de lei;

⁴¹penui je heramzatme ba ge pa ne pei gai bei de lei, chidezai penui je ngaugailakme ne penui peireige samram ra hangge zeu.

⁴²Penui teureime ne penui je tewsâ de lei, zai penui gu rezie kangge penui je kai kam gai ’ndi de lei.

⁴³Lua daikie mei ze penui je pa lupat kai de lei, kane penui ka’nningbe leine gene Hera je penui â ’nggi ze bam lei, zai penui gu hemui-helut gene penui je tew’nnakeu gai bei de lei.

⁴⁴Chigumleusedu pa ne penui kehapbe kuâ seu dege, pa ne penui duânggabe ’nninghereu gai de lei.

⁴⁵Penui hang ziegene pe samhatkaibe ze pa chî bam lei, zai pe gu hungka’ntipbe misongga bambe luigum ze pa gesut kai bei de lei.

⁴⁶Penui je nîmtatme leine ne penui je ngau’nggia gai be ra pa ne tew gai bei de lei.

⁴⁷Anui je tew’nring gai lau, Hei Tingwang anui Rapeu gau, zai heramzatme ruagene anui je gekumwang gai lau, chidezai ning ji ka’nchibe ge anui suiyibe sam pau gai le ra, zai ningchu getoabe ge anui ngeudi ze bam le ra hangge zeu.

⁴⁸Israelme Rapeu, Tingwang je peize toa bam lau, betunmakbe gene betunmakbe chang zeu! Zai ziemmename leine ne peize “Amen!” ze acheu lau, Tingwang je toa lau!