Read Zeme Naga GETOABELEU 107 Bible Online

GETOABELEU 107 - Zeme Naga bible

GETOABELEU 107

¹Hei Tingwang dage hesuiyibe sam pau gai lau, pa â yi daseu; pe gu hungka’ntipbe â betingbeta bam bam lei!

²Tingwang ne ’nripatbeime ne peize acheu sa lau, kahereube gene pa ne ’nripatkailume

³zai tingbia ’mbene benai tingrun ’mbene zai tingpeî ’mbene benai tingpî ’mbene heram ramme gene pa ne nguawanggaibeime bau zeneu.

⁴Hanggesame ne hênamchangbe heram hâmmuîdibe ge kezitrua ze namdi ge lung ra tatrabe ’mpuî hang peulak ze bam de lei;

⁵’njei du ’njei zai herei du herei ze penui keringbe jiesiatut ze bam de lei.

⁶Chidadege â penui kahereube gene Tingwang je kûka’nrung de lei, dadege penui duânggabe gene pa ne penui je lupat kai bei de lei;

⁷’mpuîki ka’nzeibe gene pa ne penui je nguatat kai bei de lei, namdi ge lung ra penui tatchang mak tâne gezeu.

⁸Tingwang gu hungka’ntipbe penui peireige bambe ziegene, zai ziemmename name hang ningdaulakbe tâ ramme pa ne tewgaibeibe ziegene peize penui ne Tingwang je penui suiyibe sam pau gai lau!

⁹Kahereibe kau je pa kahereibe ze pa ne pa hereî lam sak kai ra pei bei lei, zai ka’njei kau je pa ne mâ-keyibe ne guî’nggeugit kai bei lei.

¹⁰Hanggesame ne kemuîbe ge benai helungmuibe ge bam lei, kebangki ge bamme ne tewsabe liebe ge benai hegeî’ngkap kaibe ge bam lei,

¹¹penui ne Hera gu sam peireige ’nggibeibe benai Hulangpeu gu mâ-geteiliabe je ngaugailakluisuibeibe ziegeneu.

¹²Penui lung ramme tâ ne tew-tew lei’nggaka ze bam lei, penui je mî ne ’ngngâ gai ra ga ze penui kâukeu lei.

¹³Chidadege â penui kahereube gene Tingwang dage kûka’nrung de lei, zai penui duânggabe gene pa ne penui je lupat kai bei de lei;

¹⁴pa ne penui je kemuîbe benai helungmuibe gene nguapat kai bei de lei, zai penui gu kebangria ramme râmtap kam gai bei de lei.

¹⁵Tingwang gu hungka’ntipbe peireige pechu penui ne peize hesuiyi lau, ziemmename name peireige pe gu ningdaulakbe tâ ramme tew gai bei daseu!

¹⁶Pa ne hetageî ’ngkam ramme gekeuhiang gai bei de lei, zai hegeîchap ze dâng na tewtap kai bei de lei.

¹⁷Hanggesame â penui hemui ’mpuî ge tatbe gene meluang gai di de lei, zai penui gu hemui-helut ramme gene tewkahereube lie de lei;

¹⁸hetak zat leine ge penui ’nningsia ze bam lei, zai kechaibe keriekemui hia ’mbe penui tatwang’nna gai di de lei.

¹⁹Chidadege â penui kahereube gene penui Tingwang je kûka’nrung de lei, dadege â penui duânggabe gene pa ne penui je lupat kai bei de lei;

²⁰pa ne pe sam langpat kai bei ze penui je tew’mmi gai bei de lei, zai tew’ngga’nderabe gene penui je lupat kai bei de lei.

²¹Tingwang gu hungka’ntipbe hangge peize pe dage penui suiyi lau, pe gu ningdaulakbe tatew ramme ziemmename name hangge tewgaibe hangge zeu!

²²Zai hesuiyibe sam paugaibe gu herâtewbe gum ze peize penui je pei gai lau, zai hesuiyibe leu ramme tew ze pe gu tatew ramme peize pau lau.

²³Hanggesame â dui-’nneikuak ramme gene sungkling ’mbe tat’nsukkeu di de lei, sungkling kedibe peirei gene helîkahedetbe tâ tew zeu;

²⁴penui ne Tingwang tatew ramme ngau de lei, hedui gechukbe ge pe gu ningdaulakbe tatew ramme zeu.

²⁵Zai pa ne samdie gai bei de lei, zai tingkai natri zuachu de lei, sungkling gu hedui-teleu ramme chize ne teigesuâkchu gai de lei.

²⁶Penui tinggîm ’mbe ’nzakchu de lei, gechuk ’mbe penui wangkeu lei; penui kehingbe gene penui kut ga gai di tai de lei;

²⁷kameneume gum ze penui sap’nchuilak ti ze kenukleu ze bam de lei, zai penui mâ du ’nningchita di ze penui lung muî di de lei.

²⁸Chidadege â penui kahereube gene Tingwang dage kûka’nrung de lei, zai penui duânggabe gene penui je lupat kai bei de lei;

²⁹natri sau de ra pa ne tew gai bei de lei, zai sungkling kagesuâkbe ramme ze sip kai di de lei.

³⁰Chidadege â penui suiyi di de lei, penui hangge saurimgaidibe ziegeneu, zai penui sauneibe bâm ’mbe pa ne penui je nguatat kai bei de lei.

³¹Pe gu hungka’ntipbe bambe ziegene penui je peize Hera dage hesuiyi lau, pe gu ningdaulakbe tatew ramme ziemmename name hangge tewgai’ndibe ziegeneu!

³²Ziemmena wangka’nduibe ruage peize penui ne pechu teichu’ngngu ze bam lau, zai gechîngme wangkaheluabe ge peize pechu toa ze bam lau.

³³’Nggeuki ramme ze tingkangram chang ra, zai hedui tering ramme ze heduigabe heram chang ra,

³⁴heram yibe ram ze heram siabe ram chang ra pa ne tew gai bei de lei, chipau heram lungge kelungme helungriaksiabe ziegeneu.

³⁵Pa ne tingkangram ze ’ngkiêzai sungbe hang tew gai bei de lei, kedei gechangbe bâm ge hedui depin bâm hang tew gai bei de lei.

³⁶Zai chige ’njei-kahereime lung ra hang pa ne pei gai bei de lei, zai ziemmena lung ra hangge penui ne namdi sum gai de lei;

³⁷peningkâm ramme ge penui mâ-helei ’nruk kai de lei, zai grepchî merie ramme tew gai de lei, zai bechî misonggabe ’nchikeube ngau de lei.

³⁸Pe gu ’nnamgaibe gene penui misongga tewpungpat te lei; zai penui gu kaurui ramme du ’nsînkeu ra pa ne pei mak lei.

³⁹Kategabe liebe, kahereube, zai hesuisiabe ne penui ’mmitkeu di, zai chamkêubi-bi di dege â,

⁴⁰heguangme peireige pa ne ngauka’nnabe ruîkeu gai ze hênam zîngbe ’mpuîrikki gabe ge kezitrua ra penui je tew gai bei de lei;

⁴¹kane lungkahereube gene kegame je pa ne zuchu gai bei de lei, zai penui kelak ramme ze melidung gum ze bam ra tew gai bei de lei.

⁴²Pelingtewme ne chize ngau lu penui suiyi di de lei; zai helungriaksiame leine ne dam ta kam gai di de lei.

⁴³Mi-mige kaningchingbe kau â, airamme deze peize pie’mmi le lau; Tingwang gu hungka’ntipbe deze peize ziemmename ne ’nning gai ’mmi lau.