Read Zeme Naga GETOABELEU 108 Bible Online

GETOABELEU 108 - Zeme Naga bible

GETOABELEU 108

¹A lung â ’ntiprip ze la lei, Hei Hera gau, â lung ’ntiprip ze la lei! I heleutew ze heruakyibe ramme kaihim gai gu de lei! A keringbe gau, ’nrakchu gai zu lau!

²’Nrakchu zu lau, Hei ’nrabung benai reu kereu ’nrabung gau! Tingbanggiepatbe je I ne tew’nrakchu gai gu de lei!

³Ning dage I a suiyibe sam pau gai gu lei, Hei Tingwang gau, hezat ramme ruage zeu, heramzatme ruage ningchu I suang ze bam gu lei.

⁴Ning gu hungka’ntipbe ze â tinggîm kehube peirei ’mbe di ze bam lei, ning gu lungsangtewbe ze â kemâu ramme riâ chuchang ze bam lei.

⁵Tingkehube peirei ’mbe ning ngeudibe teilia gai be lau, Hei Hera gau! Peize ning ngeudibe kedeirei leine ge bam lau!

⁶Nang hung-kadesangme je lupat kai be ra hang, nang hezat’mbia ba ne ’ngngâ gai lau, zai a kuâ kak kai lau.

⁷Pe gu kakellumbeki gene Hera ne samhat kai de lei: “Hesuiyi-kadesangbe gene I ne Shekem ’nzipâng gai gu lei, zai Sukkoth kâm ze dâupat kai bu lei.

⁸Gilead ze a gu lei; Manasse ze a gu lei; Ephraim ze â a gu hinggei peichûp lei; Juda ze a gu langsiutui lei.

⁹Moab ze a gu mâ-huibe kuak lei; Edom peireige a pîchûp I tua gai lei; Philistia peireige I kengambe gene ’ngkiak kai lei,” zeu.

¹⁰Châu ne achu kerie peranchibe namdi ’mbe ngua gai ra lau? Châu ne achu Edom ’mbe ngua gai ra lau?

¹¹Nang ne anui je tuâpat kai ’ndi de mak ti lau, Hei Hera gau? Anui gu hereikangme ruage nang ne nguazuapat kai ra tat mak ti lau? Hei Hera gau.

¹²Hei anui teureime je ’nggi ra anui je ka’ngngâbe pei gai lau, ziemmena ne ka’ngngâbe â ’nta lei!

¹³Hera benai kuugiereu ze anui tew gu lei; anui teureime je chaîkaugairabe ze â pa ze de lei.