Read Zeme Naga GETOABELEU 109 Bible Online

GETOABELEU 109 - Zeme Naga bible

GETOABELEU 109

¹Zîng ze bam se lau, Hei Hera I toabe bangpui gau!

²Helungriaksiame benai kechoame ne a peireige penui sa’nsia gai ze bam lei, karasasabe leiria ne a peireige sa’nsia zeu.

³Achu ngaugailakbe sam ramme penui ne sariau bam lei, zai mâ-pedeu ga ze achu ka’nggi lei.

⁴I penui je hung bei sedu, zai penui hang I kellum gai bei sedu, penui â achu kesia’ndam gai lei.

⁵Chigum ze keyibe hangge kesiabe ne achu penui ne peiruî gai lei, zai I kehungbe hangge ngaugailakbe ne peiruî gai lei.

⁶Pe peireige ’nggi ra helungriaksiabe kau ziemmena je chaupat kai be lau; kakedakbe ge mige kang’nggipeu ne peize pechu nguawang gai be lau.

⁷Pechu kedak kai dezai, peize kemaupeu chang laleu lau; pe gu kakellumbe ze kahemuibe hangge peize riam gai be lau!

⁸Pe gu tingnaimikpui ramme peize gechâmne bam de lau; peize miramme ne pe gu kerua ramme sut ne lau!

⁹Peize pe name je du ka’nggiâne ramme chang de lau, zai pe nâu je peize kemîpui chang de lau!

¹⁰Peize pe name je kezitrua ze mâ kieteu lau; tew’nsiagai’ndibe penui kelungbe bâm gene peize penui je kelipat kai be lau!

¹¹Peize pechu hepukkaipeu ne pe gu kebambe leine sut kam ne lau; peize hesangme heluîchâmme ne pa tâtewhereugaibe rachî ze sut-tat te lau!

¹²Peize pechu ngau’nggiagairabe kau hang ga lau, zai pe na ka’nggiâne ramme je ngau’nggiarabe kau hang ga ze peize bam lau!

¹³Peize pe hik tud kai de lau; peize pe ji ze rehei pakenabe chukadaibe ge ’ngga gai de lau!

¹⁴Peize pe paume gu hemui-helut ze Tingwang masuage chibam lau, zai peize pe pui gu hemui ze nuitua mak ze bam lau!

¹⁵Chiramme peize Tingwang masuage bam bam lau; zai peize pechu chibambe ze kedei gene gazut kai de lau!

¹⁶Pa â mâdauge du ka’nggiabe teilia ra chîchui mak lei, kane kelaksiame benai kegame, zai helung hereu-kadesangme je tew’ngga ra gua’nchurua ze bam lei.

¹⁷Pa mâ-desetkaibe je ka’nchâ lei; peize pe peireige desetkaibe ze wangchang lau! Pa â ’nnamgaibe lunei mak lei; pe dagene peize chize deu de lau!

¹⁸Pa â pe runne pe gu mechuapui ne gum ze desetkaibe ne bâ lu ze bam lei, peize pe pum ge chize hedui gum ’nrimgut kai de lau!

¹⁹Peize paî babe gum ze desetkaibe peize bâ lau, kiakâk ne nai’nsangne pechu kakguâ bam gum ze desetkaibe ne peize kakguâ ze bam lau!

²⁰Aize achu kesia’ndamgaime hî hang Tingwang dagene ngaube peize chang lau, a pum keringbe peireige kesia sagaime zeu!

²¹Kane nang ne Hei a Wangpeu Hera gau, ning ji hang ziegene a hangge nguatatew gai lau; ning gu hungka’ntipbe ze â yi daseu, achu â lupat kai lau!

²²I â kelaksia zai kegabe kau lei, zai a lung nuksing ge hejam ze la de lei.

²³Hegî ge kezui kaukeu gum ze I tat te lei; tîngkau je gum ze achu â gechungtua ’nde lei.

²⁴Teseurei gai bei ze a kukra ’ngkeîkerei tai de lei; a pum hepînrin tai de lei.

²⁵Achu saka’nsiame ne teihenuitewbe kau hang I â chang di de lei; penui achu ngau lu dege, penui peî kakengûm de lei.

²⁶Achu ’ngngâ gai lau, Hei Tingwang a Rapeu gau! Ning gu hungka’ntipbe bambe luigum ze achu tew’nringpat kai lau!

²⁷Aize â ning ba lei be peize penui je chî le lau; nang ne, Hei Tingwang gau, aize tew gai de lei!

²⁸Penui ne peize deset kai zu lau, kane nang ne ’nnam gai ze la lei! Achu ka’nggime je peize tew’ngngam gai be lau; ning guâ ka’ngguapeu je â peize pe suiyi bam lau!

²⁹Peize achu kesia’ndamgaime je â kahelêube zene bâ ze bam lau; peize penui je â mechuapui ne tapchim bam gum ze penui ka’ngngambe zene tapchim ze bam lau!

³⁰A mui ne hesuiyi-kadesangbe sam Tingwang dage pau gai gu lei; baudime wangka’nduibe zuilung ge I pechu toa gu lei.

³¹Pa ne kegapeu ba hezat’mbia ge sap lamui lei, peize chai de ra pechu tewka’ngkuime dagene tew’nringpat kai ra hangge zeu.