Read Zeme Naga GETOABELEU 111 Bible Online

GETOABELEU 111 - Zeme Naga bible

GETOABELEU 111

¹Tingwang je toa lau. Tingwang dage a lung leine ne a suiyibe sam I pau gu lei, ka’nzeime bau ruage benai baudi wangka’nduibe bâm ruage zeu.

²Tingwang tatew ramme â di-desang lei, chiramme geze helungsuiyime leine ne chî ra peu de lei.

³Pe gu tatew â pengêudibe benai reziechibe ne pui lei, zai pe gu kapelingbe â betingbeta bam bam lei.

⁴Pe gu ningdaulakbe tâ ramme chibam ra pa ne tew gai bei de lei; Tingwang â ka’nggiabe benai ngauka’nggiabe ne pui lei.

⁵Pechu hingchime hang hetak pa ne tinggeupat kai lei; pe gu samhatkaibe betingbeta pa â chî bam lei.

⁶Pe tatew gu reziechibe ze pa ne pe gume dage teilia gai ’nde lei, heramzatme gu heram penui je peigaibeibe ziegeneu.

⁷Pe ba ne tâtewbe ramme ze â peling benai gesang de lei; pe gu kaladdeibe ramme ze â ’nnumtew-singduibe de lei,

⁸chiramme â betingbeta hangge tew’ntip kai ’nde lei, lungsangtewme benai katelingme dage tewgairabe hangge zeu.

⁹Pe gu ziemmena hangge ’nripatkaibe pa lang gai lei; pa ne pechu samhatkaibe ze betingbeta hangge die gai bei de lei. Pe ji â Ka’nchibe benai kehingbe de lei!

¹⁰Tingwang je hingchibe â kaningchingbe pîbang de lei; chize heli ze tewme leine dage mâ-chika’mmibe bam lei. Pechu getoabe ze â betingbeta bam bam lei!