Read Zeme Naga GETOABELEU 115 Bible Online

GETOABELEU 115 - Zeme Naga bible

GETOABELEU 115

¹Anui dage makse, Hei Tingwang gau, anui dagene makse, kane ning ji ge pengêudibe pei gai lau, ning gu hungka’ntipbe benai ning gu lungsangtewbe hang ziegeneu!

²’Ndaitew ze heramzatme ne, “Penui Rapeu ’ndaige la lau?” ze acheu ra lau?

³Anui Rapeu â Tingkehube ge la de lei; pa pe suî’nning luigum ze tâtew lei.

⁴Penui gu heraluîtewbe ramme ze â gepût benai gechâk, ziemmena bachiâm ramme de lei.

⁵Penui mui ramme â la da, kane sam sa mak lei; penui mik ramme â la da, kane ngau mak lei.

⁶Penui kun ramme â la da, kane seu mak lei; penui nêu ramme â la da, kane mâ-rîm du chî mak lei.

⁷Penui ba ramme â la da, kane chipat mak lei; penui pî ramme â la da, kane tat mak lei; zai penui ku gene hekuâ ’nrapat mak lei.

⁸Chiramme chiamgaime ze â chiramme riâ de lei; chigum ze chiramme ge ’nnumtewme leine zedu chiramme riâ de lei.

⁹Hei Israel gau, Tingwang je ’nnumtew bam lau! Pa â penui gu ka’ngngâbe-bangpui benai hinggei de lei.

¹⁰Hei Aaronbe ki gau, Tingwang dage ningnui gu ’nnumtewbe kai lau! Pa â penui gu ka’ngngâbe-bangpui benai penui gu hinggei de lei.

¹¹Ningnui Tingwang je hingchime, Tingwang je ’nnumtew lau! Pa â penui gu ka’ngngâbe-bangpui benai penui gu hinggei de lei.

¹²Tingwang ne anui je chibam lei; pa ne anui je ’nnam gai gu lei; pa ne Israel ki je ’nnam gai gu lei; pa ne Aaronbe ki je ’nnam gai gu lei;

¹³Tingwang je hingchime je pa ne ’nnam gai gu lei, kecheime benai kedime jeu.

¹⁴Tingwang ne ningnui je peize pung-ze-sabe pei be lau, ningnui zai ningnui name jeu!

¹⁵Peize Tingwang ne ningnui je ’nnam gai be lau, tinggîm benai kedei tewgaipeu zeneu!

¹⁶Tingkehube ramme ze â Tingwang gu tingkehube ramme de lei, kane kedei ze â ziemmename name hangge pa ne pei gai bei de lei.

¹⁷Kechaime â Tingwang je toa me lei, zai zîngbe ge tatkeume ze du toa me lei.

¹⁸Kane anui â Tingwang je ’nnam gai gu lei, chuna gene seu ze betun mak zeu. Tingwang je toa lau!