Read Zeme Naga GETOABELEU 116 Bible Online

GETOABELEU 116 - Zeme Naga bible

GETOABELEU 116

¹I Tingwang je hung lei, a kuâ benai I kiambe sam ramme pa ne ’ngkinggaibeibe ziegeneu.

²Pe kun a lam ’mbia ’ngngiakeugaibeibe ziegeneu, chipauziegene I ring tâne pechu kû bam gu lei.

³Kechaibe ’mpia ramme ne achu gua la lei; Kechaiberam gu kehingbe tâtewbe zene a peireige wang de lei; hereu mi duânggabe mai helung kahereube I lie-kadesang de lei.

⁴Chidadege â Tingwang ji I kû gai de lei: “Hei Tingwang gau, ningchu I kiam lei, a keringbe tew’nring gai lau!” ze acheu zeu.

⁵Tingwang â pa’nggiadi zai kapelingbe kau lei; anui Rapeu â ngau’nggiachibe kau lei.

⁶Tingwang ne ’mpangpaibe kau je teika’nggim lei; I hing ze ’nggiâkia bambe luage pa ne achu tew’nringpat kai bei de lei.

⁷Ning gu gesaube bâm ge helatwang dai zu lau, Hei a keringbe gau; Tingwang ne ning dage nguatinggeu zun gai bei daseu.

⁸Nang ne kechaibe gene a keringbe je lupat kai bei de lei, hemikdui luarabe gene a mik ze tei’mbia gai bei de lei, zai a pî kâuderabe gene achu teigim gai bei de lei;

⁹keringme ram ge Tingwang masuage I tat lei.

¹⁰“Achu tewhereu-desang lei” ze I kacheube luage ’nsangdu I â I keneibe ze â ’ntiprip ze bam lei;

¹¹I hing ze ningdaulakbe luage, “Ziemmename leine mâ de heguî ra game kam lei,” ze I kacheu de lei.

¹²Tingwang ka’nggiabe misongga ngaulube ze I ne pechu ’ndaikau peiruî gai dai ra lau?

¹³Tewka’nringbe piak ze I teigetuachu gai ze, Tingwang ji I kû gai gu lei,

¹⁴pe gu ziemmename leine bambe masua gene Tingwang dage a gu deseugai’ndibe ramme I pei gai gu lei.

¹⁵Tingwang mikngau ge pemîhungbe ze â, pe gu ka’nchime kechaibe ze de lei.

¹⁶Hei Tingwang gau, I â ning guâ ka’ngguabe kau de lei; I â ning guâ ka’ngguabe kau de lei, ning gu kebangpui na zeu. Nang ne a gu kebangria ramme ze heipat kai bei de lei.

¹⁷Mi suiyibe sam paugaibe gu herâtewbe ning dage I pei gai ze Tingwang ji I kû gu lei.

¹⁸Pe gu ziemmename leine bambe masua gene, Tingwang dage a gu deseugai’ndibe ramme ze pei gai gu lei,

¹⁹Tingwang kisîam ramme lungge, Hei Jerusalem gau, ning zuilung gezeu! Tingwang je toa lau!