Read Zeme Naga GETOABELEU 118 Bible Online

GETOABELEU 118 - Zeme Naga bible

GETOABELEU 118

¹Hei Tingwang dage hesuiyibe sam pau lau, pa â yi daseu; pe gu hungka’ntipbe â betingbeta bam bam lei!

²Peize Israelme je acheu sa lau, “Pe gu hungka’ntipbe ze â betingbeta bam bam lei,” acheu zeu.

³Peize Aaronbe ki je acheu ze sa lau, “Pe gu hungka’ntipbe ze â betingbeta bam bam lei,” acheu zeu.

⁴Peize Tingwang je hingchime ne acheu ze sa lau, “Pe gu hungka’ntipbe ze â betingbeta bam bam lei,” acheu zeu.

⁵A duânggabe gene Tingwang je I kû gai lei; Tingwang ne a kuâ kak kai ze achu ’mpat kai bei de lei.

⁶Tingwang a lam ge bam bei ze I â hing me lei. ’Ndaikau ziemmena ne achu tewchiduibe la lau?

⁷Achu ’ngngâ ra hang Tingwang ne a lam’mbia ge la lei; achu ngaugailakme je I ne lîmpie gu lei.

⁸Ziemmena ge mi ’nnumka’mmibe kai ra sua â, Tingwang ge ’nseu ze bamderabe ze yi’nteu lei.

⁹Heguangme dage mi ’nnumka’mmibe kai ra sua â, Tingwang ge ’nseubamderabe ze yi’nteu lei.

¹⁰Heramzatme leine ne achu tuaguâ ’ndi de lei; Tingwang ji gene I ne penui je tew’ngga ’ndi de lei!

¹¹Penui ne achu tuaguâ ’ndi de lei, ailia-lia achu tuaguâ’ndi de lei; Tingwang ji gene I ne penui je tew’ngga ’ndi de lei!

¹²Tingkui ramme gum ze penui ne achu tuaguâ ’ndi de lei, heturang ge hemi bambe gum ze penui ga gai kelua di de lei; Tingwang ji gene I ne penui je tew’ngga ’ndi de lei!

¹³Achu â chui’nchi gai bei ze I ’ngngaîkeu di de lei, kane Tingwang ne achu ’ngngâ gai bei de lei.

¹⁴Tingwang â a ranchi benai a leu de lei; pa ne a hangge tewka’nringbe bangpui chang gai di de lei.

¹⁵’Ngking le lau, kengambe misuiyibe leu kapelingme gu paîki ramme lungge zeu: “Tingwang hezat’mbia ba ne kuugiereu ze tâtew lei,

¹⁶Tingwang hezat’mbia ba ze teichu’ngngu gai ’nde lei, Tingwang hezat’mbia ba ne kuugiereu ze tâtew lei!”

¹⁷I chai ra mak lei, kane I â ring gu lei, zai Tingwang tatew ramme I ne ranglia gu lei.

¹⁸Tingwang ne achu sâ-ze-dei-desang gai lei, kane pa ne achu chai ra pei gai mak tai lei.

¹⁹Kapelingbe gu keriekemui ramme achu lat kai lau, dezai chigene I gut ze Tingwang dage a suiyibe sam pau gai le ra hangge zeu.

²⁰Aize â Tingwang gu keriekemui lei; ka’nzeime â chigene gut ku lei.

²¹I ningchu a suiyi lei, a kuâ nang ne kakkaibeibe ziegeneu, zai a gu tewka’nringbe bangpui nang ne changbeibe ziegeneu.

²²Hekitewme ne tingchukâng tuâpatkaibeibe zene pemik chukâng bepeî dilangbe hang chang gai di de lei.

²³Aize â Tingwang gu tatew de lei; aize â anui mikngau ge mi ningdaulakbe de lei.

²⁴Aize â Tingwang ne tewgaibe tingnaimikpui de lei; chige anui mi suiyi’nta ze mi suiyi bam kei lei.

²⁵Anui je tew’nringpat kai lau, Hei Tingwang gau! Anui ningchu kiam lei, Hei Tingwang gau! Hei Tingwang gau, anui ningchu kiam lei, anui je ka’nggimbe pei gai lau!

²⁶Tingwang ji gene zuagutpeu je peize yi lau! Tingwang gu heki gene ningnui je anui ne ’nnam gai lei.

²⁷Tingwang â Hera de lei, zai pa ne anui je kebabe pei gai bei de lei. Kahengîbe gu hingbangbuâ ramme kang lu ze herâtewbe-kaira gu mâkie ramme riâ baudi ’nzanggut lau!

²⁸Nang â a Rapeu de lei, ning dage a suiyibe sam pau gai gu lei; nang â a Rapeu de lei, ningchu I toachu’ngngu gai gu lei.

²⁹Hei Tingwang dage misuiyibe sam pau lau, pa â yi daseu; pe gu hungka’ntipbe â betingbeta bam bam lei.