Read Zeme Naga GETOABELEU 119 Bible Online

GETOABELEU 119 - Zeme Naga bible

GETOABELEU 119

¹Penui ’mpuî tatbe ge hetiâkgame yi gu lei, Tingwang gu hingde ge tatme zeu!

²Pe gu samde ramme teichime yi gu lei, penui lung leine ne pechu gepeume,

³zai mâdau mâ-tewmau gai mak, kane pe gu ’mpuî ramme ge tat bamme zeu!

⁴Nang ne ning gu mâ-geteiliabe-sie ramme ’ntîngteî ze tei ra die gai bei de lei.

⁵Hei ning gu rawdiakkaibe-hingde-reibe ramme ze I tei’ntip ze tat lu laîzai!

⁶Dezai achu tew’ngngam gai ra mak lei, Ning gu hingde ramme leine ge I pie sing lu zeu.

⁷Helungka’nzeibe ne ningchu I toa gu lei, ning gu hingde tewgaibe ramme I chîdesi dezai neu.

⁸Ning gu rawdiakkaibe-hingde ramme I tei’mmi gu lei; Hei achu sâuzut kai se lau!

⁹’Ndaigum ze rehang’mpeu ne pe gu ’mpuî ’nchichiak ze tat’mmichi le ra lau? Ning sam luigum ze chize rei’mmi lu zeu.

¹⁰A lung leine ne ningchu I peu lei; ning gu hingde ramme gene kezit ra achu pei se lau!

¹¹A lung ge ning sam gekua gai lu de lei, dezai ning peireige I hemui gai mak ra hangge zeu.

¹²Hei Tingwang ningchu peize toa bam lau; ning gu hingde rawdiakkaibe ramme ze achu getei gai lau!

¹³Ning mui gene patbe hingde-sie ramme a mui ne I rangba gai lei.

¹⁴Keheube leine ge I a suiyibe gum ze ning sam diegaibe ramme ge I a suiyi gu lei.

¹⁵Ning gu laddeitewbe sam ramme ze a lung ge ’nning’nchuk kai gu lei, zai ning gu ’mpuî ramme a mik ne piedesi gai gu lei.

¹⁶Ning gu hingde rawdiakkaibe ramme ge a suiyi’nta gu lei, ning sam I ’ngngaî ra mak lei.

¹⁷Ning guâ ka’ngguapeu dage helungsuiyibe ne nguatatew gai lau, dezai I ringbe ge ning sam teichi le ra hangge zeu.

¹⁸A mik lat kai lau, chidezai ning gu hingde gene mâ-ningdaulakbe zat ramme I piechi le ra hangge zeu.

¹⁹Kedeirei ge I â lunggaileupeu de lei; ning gu hingde ramme a dagene tei’mbai gai se lau!

²⁰Ning gu hingde-sie ramme hangge pehî’nsangne huî ze bambe ziegene a keringbe teumut ’nde lei.

²¹Duîzuttewme je nang ne ka’ngngiam lei, ning gu hingde ramme gene kezitchime ze desetkaibeime bau de lei;

²²a dage penui duîzuttewbe benai ngauka’nnabe lutua gai lau, ning gu rangsinggaibe sam ramme I reika’mmibe ziegeneu.

²³Heguang name ’ntau lu a peireige mâ-kesiabe ’mpung ze bam sedu, ning guâ ka’ngguapeu â ning gu hingde rawdiakkaibe ramme ge ’nning’nchuk ze bam gu lei.

²⁴Ning gu mâ-geteiliabe ramme ze I ka’nchâbe de lei, chiramme ze â achu nguakageteime bau de lei.

²⁵A keringbe ze timbuimoîne zeu ge tuâ la de lei; ning sam luigum ze achu ’ngkia’nrakchu gai lau!

²⁶I kebambe tak ramme I rangliabe luage, nang ne a kuâ kak kai bei de lei; ning gu hingde rawdiakkaibe ramme achu getei gai lau!

²⁷Ning gu hingde-sie tak ramme chî’mmi le ra achu ’ngngâ lau, dezai ning gu ningdaulakbe tatew ramme deze I ’nning’nchuk ze bam gu lei.

²⁸A keringbe ne pe suisia ze desuipuai gai di de lei; ning sam luigum ze achu a ran tew’nchi gai lau!

²⁹Mâ-karasatewbe tak ramme a dagene tei’ndeu ne lau; ka’nggiabe gene ning gu hingde achu getei gai lau!

³⁰Lungsangtewbe ’mpuî I ne kelâng lu de lei, ning gu hingde-sie ramme a suage I kai de lei.

³¹Hei Tingwang gau, ning gu mâ-geteiliabe ramme ge I ’mpêugit ze bam gu lei; achu tew’ngngam gai ra pei se lau!

³²Ning gu hingde ramme ’mpuî ge I pak ze bam gu lei, I chî’mmi le ra nang ne a lung tew’ndi gai dezai neu!

³³Hei Tingwang gau, ning gu hingde rawdiakkaibe ramme bambe tak achu getei gai lau; dezai betun-gaibe riâ chang ze chize I tei bam gu lei.

³⁴Ning gu hingde I teichi le ra, zai a lung leine ne chize tei’mmi le ra mâ-chika’mmibe nang ne achu pei lau.

³⁵Ning gu hingde ramme ’mpuî ge achu ngua gai lau, chige I a suiyi daseu.

³⁶Ning gu mâ-geteiliabe ramme ge a lung tei’nrei gai lau, pelâp-pegîe ngaurabe ge mak seu!

³⁷Mâ peruânggabe heguapiebe gene a mik je kiâ’mbia gai lau; zai ning gu ’mpuî ramme ge achu keringbe pei lau.

³⁸Ning gu sam deseugaibe ze ning guâ ka’ngguapeu dage tew’ntip kai lau, ningchu kehingme hangge peigaibe zeu.

³⁹Chianggaibe I hingbe ze nang ne tei’mbia ne lau; ning gu hingde tewgaibe ramme ze â yi daseu.

⁴⁰Pie le lau, ning gu laddeitewbe ramme deze I lunei-desang lei; ning gu kapelingbe ge keringbe achu pei lau!

⁴¹Hei Tingwang gau, ning gu hungka’ntipbe peize a dage wang lau, ning gu tewka’nringbe ze du ning gu samhatkaibe luigum a dage peize wang lau;

⁴²chidezai achu karengetme hangge a samkak ra a dage bam gu de lei, ning sam ge I ’nnumtew la daseu.

⁴³Zai samsang sam ze a mui gene lutat kam se lau, ning gu hingde tewgaibe ramme ge I kaheguîbe â la daseu.

⁴⁴I ning gu hingde tei bam gu lei, betingbeta hangge zeu;

⁴⁵dezai lungzeunetew ze I tat bam gu lei, ning gu laddeitewbe ramme I peu lu daseu.

⁴⁶Heguangme suage ning gu samde ramme ze du I sa bam gu lei, dezai achu tew’ngngam ra mak lei;

⁴⁷ning gu hingde ramme ge a suiyika’ntabe I ngau lei, I ne ka’nchâbe zeu.

⁴⁸I ne ka’nchâbe ning gu samde ramme deze I hengêutew gu lei, zai ning gu rawdiakkaibe-hingde ramme peireige I ’nning’nchuk kai gu lei.

⁴⁹Ning guâ ka’ngguapeu dage ning sam ze chibam lau, chige ze nang ne I heguî bam ra tew gai bei de lei.

⁵⁰A lungkahereube ge aize ne a lung tewhegeitenai gai bei de lei, ning gu sam deseugaibe ne achu keringbe peigaibe zeu.

⁵¹Hera je neimakme ne achu ki’nnui-kadesang lei, kane I â ning gu hingde ramme gene ’mbiatat me lei.

⁵²Ning gu ’ndâ keraîbe ting gu hingdetewgaibe ramme I ’nninggaibe luage, a lung tewhegeitenaigaibe chang lei, Hei Tingwang gau.

⁵³Ning gu hingde sâugai’ndime helungriaksiame ziegene a râta-kadesang de lei.

⁵⁴A gu tebeîtewtatbeki ge, ning gu hingde rawdiakkaibe ramme zene a hangge heleu ramme chang bam lei.

⁵⁵Tingmuî ge Hei Tingwang gau, ning ji I chibam lei, zai ning gu hingde I tei bam lei.

⁵⁶Aize ’nnamgaibe a peireige wangchang de lei, ning gu laddeitewbe ramme I teibambe ziegeneu.

⁵⁷Tingwang â a dam de lei; ning sam ramme I tei’mmi ra hang I samhat lei.

⁵⁸I a lung leine ne ning gu ngauka’nggiabe I lunei ze kiam lei; ning gu samhatkaibe luigum ze helungyibe ne achu ’nggia gai lau.

⁵⁹Ning gu ’mpuî tak ramme I ’nninggaibe luage, ning sam saliadiakkaibe ramme ge a pî kiamzua gai de lei;

⁶⁰I ning gu hingde ramme gîngtie mak ze kelua ze tei de lei.

⁶¹Helungriaksiame gu ’mpiaria ramme ne achu mi leusedu, I â ning gu hingde je ’ngngaî me lei.

⁶²Muisum ge ningchu toa ra I zuachu lei, ning gu kapelingbe hingdetewgaibe ramme ziegeneu.

⁶³I â ningchu hingchime, ning gu kaladdeibe sam teime leine kangpeu lei.

⁶⁴Kedeirei ze â Hei Tingwang gau, ning gu hungka’ntipbe ne puigit ze bam lei; ning gu rawdiakkaibe-hingde ramme achu getei gai lau!

⁶⁵Hei Tingwang gau, ning sam luigum ze ning guâ ka’ngguapeu peireige nang ne tinggeugai’mmi bei de lei.

⁶⁶Samrambe-sie keyibe benai mâ gechîbe achu getei gai lau, ning gu hingde ramme ge I ne ’nnum’mmi la lei.

⁶⁷Achu tewhereu gai makge, I kezitrua ze bam lei, kane chuna â ning sam I tei de lei.

⁶⁸Nang â keyibe zai keyibe tewbe kau lei; ning gu hingde rawdiakkaibe ramme achu getei gai lau.

⁶⁹Hera je neimakme ne karasa ne a peireige tâtew-desang ze bam lei, kane a lung leine ne ning gu samde ramme I tei bam de lei;

⁷⁰mâ-châ gum ze penui lung ge â ’ngngiasuai ze bam lei, kane I â ning gu hingde ge a suiyi’nta ze bam lei.

⁷¹Achu tewhereugaibe ze a hangge keyibe lei, chidezai ning gu hingde rawdiakkaibe ramme I chî’mmi le ra hangge zeu.

⁷²Ning mui gene hingde patbe ze â a hangge â, gechâk benai gepûtgeî chang-chang bambe suadu yi’nteu lei.

⁷³Ning ba ne achu ’ndam gai ze achu teizui ze tei bei de lei; ning gu hingde ramme I chî’mmi le ra achu mâ-siechibe pei lau.

⁷⁴Ningchu hingchime ne achu ngau lu penui suiyi’nta gu lei, I â ning sam ge heguî bam daseu.

⁷⁵Hei Tingwang gau, ning gu samrambe tak ramme â ’nzei lei be I chî lei, zai peling gene nang ne achu tewhereu gai bei de lei.

⁷⁶Ning gu hungka’ntipbe ze peize a lung tew hegeitenai gai ra bam bam lau, ning guâ ka’ngguapeu dage ning gu samhatkaibe luigum zeu.

⁷⁷I ring le ra hangge ning gu ngauka’nggiabe a dage peize wang lau; ning gu hingde ze â a suitewka’ntabe lei.

⁷⁸Gechîrettewme je peize tew’ngngam gai be lau, penui taksia ze achu tew’nsia-ra-tewbe ziegeneu; ning gu mâ-geteiliabe ramme ge I â ’nning’nchuk kai ze bam gu lei.

⁷⁹Peize ningchu kehingme a lam ’nreiwang lau, chidezai ning gu samde ramme penui chî le ra hangge zeu.

⁸⁰Ning gu hingde rawdiakkaibe ramme ge a lung peize hetiâk ga lau, achu tew’ngngam me ra hangge zeu!

⁸¹Ning gu tewka’nringbe ze a keringbe ne lunei-desang lei, ning sam ge I â heguî bam lei.

⁸²Ning gu samhatkaibe I piekua bambeibe ziegene a mik ran-gakeu di de lei; “’Ndaidaune nang a lung ze tewhegeitenai gai ra lau?” ze I kacheu de lei.

⁸³I â wain kaibe hemeigeibung ze mika ge chube gum chang di de lei, acheuleusedu ning gu rawdiakkaibe-hingde ramme ze I ’ngngaî mak lamui lei.

⁸⁴’Ndaitiege ning guâ ka’ngguapeu liekua ra lau? ’Ndaidaune achu tewsâme je nang samram gai ra lau?

⁸⁵Gechîrettewme, ning gu hingde luigum ze bammakme ne a hangge hûm ramme rua gai ze lamui de lei.

⁸⁶Ning gu hingde ramme leine â, ’nnumtewduibe kam lei; deuzie ne penui achu tewsâ lei; achu ’ngngâ gai lau!

⁸⁷Penui ne achu kedeirei ge tew’nggazutkaitena la de lei; kane ning gu samde ramme ze I sâu gai mak ze lamui lei.

⁸⁸Ning gu hungka’ntipbe gene a pum keringbe ’nzuak kai lau, dezai ning mui gene hingde patbe ramme ze I tei’mmi gu lei.

⁸⁹Betingbeta hangge Hei Tingwang gau, ning sam â tinggîm ge kai’ntiprip kai ’nde lei.

⁹⁰Ning gu lungsangtewbe â rehei leine hangge bam bam lei; kedei ze nang ne kai’ntip kai bei de lei, zai chize ’ntip ze sap la lei.

⁹¹Nang samdiegaibe gene getaleine nemai riâ sap la lei; mâgetaleine ze ning guâ ka’ngguame kam de lei.

⁹²Ning gu hingde ze a suiyika’ntabe hang chang mak laîzai â, achu tewkahereube gene I gagaiderabe kau de lei.

⁹³Ning samdiegaibe ramme ze mâtew-tewsedu I ’ngngaî ra mak lei; chiramme gezene nang ne a pum keringbe achu pei gai lei.

⁹⁴I â ning gu de lei, achu tew’nringpat kai lau; ning gu samde ramme deze I peu lu daseu.

⁹⁵Achu tew’ngga ra helungriaksiame ne lîmkua lei; kane ning gu hingde ramme I ’nningdesi gai lei.

⁹⁶Mâ-yikadesangbe ramme leine penui hangge periâ-riâ tewgaibe bambe I ngau de lei, kane ning gu hingde ze â periâ ga ze kegeuga ze bam lei.

⁹⁷Hei, I ne ning gu hingde je ka’nchâ run de lei! Chize naimikpui tâluî I ne ’nningbam-bambe de lei.

⁹⁸Ning gu hingde zene a teureime suanedu achu tewningching’nteu gai bei de lei, chize betingbeta a dage bam-bambe ziegeneu.

⁹⁹Achu geteiliame dage suadu a dage chika’mmibe kie’nteu lei, ning gu mâ-geteiliabe ramme ze I â, ’nninghekuî ze bambe changbe ziegeneu.

¹⁰⁰Chîngkeudime suadu I â mâ-chî’mmi’nteu lei, ning gu samde ramme I teika’mmibe ziegeneu.

¹⁰¹Kesiabe ’mpuî ramme leine gene I â, a pî ’ngngîngut kai dai nan ze bam lei, ning sam ze I tei’mmirabe hangge neu.

¹⁰²Ning gu hingdetewgaibe ramme gene I â tat’mbia me lei, nang ne achu getei gai bei dadegeu.

¹⁰³Ning sam ramme a hangge kum-desang lei, a mui ge ’ngkuidui suadu kum lei!

¹⁰⁴Ning gu kaladdeibe gene mâ-chika’mmibe I ngau lei; chipauziegene kemakbe ’mpuî leine I â ngaugailak lei.

¹⁰⁵Ning sam â a pî hangge kachâbung lei, zai a ’mpuî hangge kebabe lei.

¹⁰⁶Chize I deseu gai lu ze tew’ntip kai de lei, ning gu hingde tewgaibe kapelingbe ramme ze I rei’mmi le ra hangge zeu.

¹⁰⁷Achu â tewhereu-desang gai bei de lei; Hei Tingwang gau, Achu keringbe pei lau, ning sam luigum zeu!

¹⁰⁸A gu getoabe peipatbe ramme ze lu gai lau, Hei Tingwang gau, zai ning gu rawdiakkaibe-hingde ramme ze achu getei gai lau.

¹⁰⁹I a pum keringbe ze a ba ne tei bam lei, kane ning gu hingde ze I ’ngngaî me lei.

¹¹⁰Helungriaksiame ne a hangge ’mpia tew gai de lei, kane ning gu samdiegaibe ramme gene I kelamtat me lei.

¹¹¹Ning gu samdiegaidiakbe ramme â betingbeta hangge a heurâ de lei; eu lei, chiramme ze a lungsuiyika’ntabe de lei.

¹¹²Betun chang ze ning gu hingde rawdiakkaibe ramme betingbeta I tewpui bam ra a lung tei’nrei gai de lei.

¹¹³Pe suikiebe kau ziemmena je I lugailak lei, kane I ning gu hingde je hung lei.

¹¹⁴Nang â a gu a ’mbaibâm zai a gu hinggei de lei; ning sam ge I â heguî bam lei.

¹¹⁵Ningnui kesiabe tâtewme gau, a dagene tatrimna de lau, chidezai a Rapeu gu hingde ramme ze I teichi le ra hangge zeu.

¹¹⁶Ning gu samhatkaibe luigum ze I ring le ra achu tei’nggim gai lau, zai I kaheguîbe ge peize achu tew’ngngam gai se lau!

¹¹⁷I ring ze bam ra, zai ning gu hingde rawdiakkaibe ramme ze sau mak ze I ’nning’ndi bam ra achu tei’nggim lau!

¹¹⁸Ning gu hingde rawdiakkaibe ramme gene tatlietattime leine je â, nang ne chaîtua lei; eu lei, penui ’nchingsiabe tak ze â peruânggabe ge bam gai de lei.

¹¹⁹Kedeirei ge helungriaksiame leine je â, kerachut hangge nang ne riam gai bei de lei; chipauziegene I â ning gu mâ-geteiliabe je hung lei.

¹²⁰Ningchu hingbe ziegene a hemeipum kakedun de lei, zai ning gu samrambe ramme je I hing lei.

¹²¹Kapelingbe benai ka’nzeibe ze I tew gai de lei; achu tewsâme ba ge achu sâudiak kai se lau.

¹²²Ning guâ ka’ngguapeu hang nang ne betingbeta sapgupeu chang lau; gechîrettewme ne achu tewsâ ra pei se lau.

¹²³Ning gu tewka’nringbe je I piekua-kuâ ze a mik ran-gakeu di de lei; zai nang samriagaibe katelingbe tewpuigairabe hangge zeu.

¹²⁴Ning gu hungka’ntipbe bambe luigum ze ning guâ ka’ngguapeu peireige peize samram gai lau, ning gu hingde rawdiakkaibe sam ramme achu getei gai lau.

¹²⁵I ning guâ ka’ngguapeu lei; mâ-chika’mmibe achu pei gai lau, dezai nang mâ-geteiliabe ramme I chî le ra hangge zeu!

¹²⁶Chuna ze Tingwang ne tâtewrabe hî de lei, ning gu hingde ze tewpânggai’ndibe ziegeneu.

¹²⁷Chipauziegene gechâk benai gechâk yibe peireige du ning gu hingde ramme je I ne ka’nchâ lei.

¹²⁸Chipauziegene ning gu mâ-geteiliabe sam ramme tei ze I ne a ’mpuî tat ze bam lei; kemakbe ’mpuî zat leine je â I ne ngaugailak lei.

¹²⁹Ning gu mâ-geteiliabe ramme â mi ningdaulakbe lei; chidadege a keringbe ne chiramme tei de lei.

¹³⁰Ning sam ramme rapatbe zene kebabe pei lei; ’mpangpaibe kau hang du chika’mmibe chize ne pei bei lei.

¹³¹Ning gu hingde ramme I luneika’nteube ziegene, a mui ’ngnga lu ze a chuiluhie-hie bam de lei.

¹³²A lam ’nreiwang ze achu ’nggia gai lau, ning ji je kehungme je nang ka’nggiabe luigum zeu.

¹³³Nang samhatkailube luigum ze a pichaî ramme nang ne tew’ntip kai lau, zai hemui-helut zene a peireige naî ra pei se lau.

¹³⁴Ziemmename gu kategabe tatew gene achu ripat kai lau, dezai ning gu samde ramme I teichi le ra hangge zeu.

¹³⁵Ning guâ ka’ngguapeu peireige ning ju lerba gai lau, zai ning gu hingde rawdiakkaibe ramme achu getei gai lau.

¹³⁶A mik gene hemikdui depin ramme gum ze luapat bam lei, ziemmename ne ning gu hingde teimakbe ziegeneu.

¹³⁷Hei Tingwang gau, nang â kapelingbe kau lei, zai ning gu samrambe tak ramme â ’nzei lei.

¹³⁸Ning gu besie ramme ze kapelingbe benai lungsangtewbe gene nang ne kaichu gai de lei.

¹³⁹A laîpatbe zene achu tew’nsia ze bam de lei, a teureime ne ning sam ramme ’ngngaî’ndibe ziegeneu.

¹⁴⁰Nang samhatkaibe ze â kedak zunlube kau lei, zai ning guâ ka’ngguapeu ne chize ka’nchâ lei.

¹⁴¹I â kecheibe kau zai miramme ne mâ-hangge du chakkaimakbe kau lei, acheuleusedu I ne ning gu mâ-geteiliabe ramme ’ngngaî mak lei.

¹⁴²Ning gu kapelingbe â betingbeta hangge peling chang ze bam lei, zai ning gu hingde â gesang lei.

¹⁴³Kahereube benai betedka’nsîbe a peireige wang de lei, kane ning gu hingde ramme ge a suiyi lei.

¹⁴⁴Ning gu mâ-rangliabe ramme â betingbeta hangge ka’nzeibe lei; mâ-chika’mmibe achu pei gai lau, dezai I ringchi le ra hangge zeu.

¹⁴⁵A lung leine ne I kûka’nrung lei; Hei Tingwang gau, a kuâ kak kai lau! Ning gu hingde rawdiakkaibe ramme I tei gu lei.

¹⁴⁶Ningchu I kû lei; achu tew’nringpat kai lau, dezai ning gu hingde ramme I tei’mmi le ra hangge zeu.

¹⁴⁷Tingbapat makge I chu lu ’ngngâ ra ku lei; ning sam ramme ge I heguî bam lei.

¹⁴⁸Tingmuî hekêtkaime ’nrakchu makge I a mik ’nrakchu di de lei, ning gu samhatkaibe ge I ’nning’mmi gai ra hangge zeu.

¹⁴⁹Ning gu hungka’ntipbe gene a kuâ seu gai lau; Hei Tingwang gau, ning gu sam ramme kapelingbe gene a pum keringbe tei’nggim gai lau.

¹⁵⁰Mâ-kesiabe ’nning lu achu tewsâme wangka’nna lei; penui â ning gu hingde gene deusang deu lei.

¹⁵¹Hei Tingwang gau, nang â a taige la lei, zai ning gu hingde ramme leine â gesang lei.

¹⁵²Nang geteiliabe ramme gene ’ndâ I chî di de lei, chiramme betingbeta hangge nang ne kai’ndibe zeu.

¹⁵³I lungkahereube ze pie gai ze achu lupat kai lau, ning gu hingde ze I ’ngngaî mak la daseu.

¹⁵⁴Achu sapgu ze achu ripat kai lau; ning gu samhatkaibe luigum ze achu keringbe pei lau!

¹⁵⁵Helungriaksiame dagene tewka’nringbe â deu ze bam lei, ning gu hingde rawdiakkaibe ramme penui ne pheumakbe ziegeneu.

¹⁵⁶Nang ka’nggiabe ze â di-desang lei, Hei Tingwang gau; ning gu samramka’nzeibe bambe luigum ze achu keringbe pei lau.

¹⁵⁷Misonggame ne achu tewsâme benai a teureime chang ze bam lei, kane ning gu hingde ramme gene I â tatkelilap kai mak lei.

¹⁵⁸Kakezitbe kau ramme je I â ngauka’nseî lei, ning gu samde ramme penui teimakbe ziegeneu.

¹⁵⁹Nang mâ-geteiliabe ramme deze I ’ndaizeu hung mei be ’nning gai ni lau! Ning gu hungka’ntipbe bambe luigum ze a keringbe tei’nggim gai lau.

¹⁶⁰Pelane ning sam â samsang kam lei; zai ning gu ka’nzeibe hingderawgaibe gu samkie leine â, betingbeta bam bam lei.

¹⁶¹Heguang rezieteime ne mâ-pedeu ga ze achu tewsâ lei, kane ning sam ramme hangge a lung zene ’ntîng ze hing ze sap la lei.

¹⁶²Ning sam geze I a suiyika’nta lei, mige ne hereichâ keyibe ngaulube kau gum zeu.

¹⁶³Mâ-karasatewbe je I ne ngaugailak zai ’nneîka’nrie lei, kane ning gu hingde je I ne ka’nchâ lei.

¹⁶⁴Mai kat ge lua sena ningchu I toa lei, ning gu hingde tewgaibe ramme ka’nzeibe ziegeneu.

¹⁶⁵Ning gu hingde je ka’nchâme dage lunghegeikatenaibe bam lei; mâ ne de penui je tewkau lak lei.

¹⁶⁶Hei Tingwang gau, ning gu tewka’nringbe deze I kaheguî lei, zai ning gu hingde ramme I tei lei.

¹⁶⁷Zai a keringbe ne ning gu mâ-geteiliabe ramme tei’mmi bam lei; chiramme je I ’nchâ-desang lei.

¹⁶⁸Ning gu samde ramme benai ning gu mâ-geteiliabe ramme I tei lei, a ’mpuî ramme ze â ning suage la dadegeu.

¹⁶⁹I kûka’nrungbe kuâ ze ning suage peize wangchang gai lau, Hei Tingwang gau; ning sam luigum ze mâ-chika’mmibe achu pei lau!

¹⁷⁰A kiamsam ze ning suage peize wangchang gai lau; ning sam luigum ze achu lupat kai lau.

¹⁷¹A mui gene ningchu getoabe sam zuapat kai gu lei, nang ne ning gu hingderawgaibe ramme achu geteiliabe zeu.

¹⁷²A leiria ne ning sam ze suang ze leutew gu lei, ning gu hingde ramme leine â, peling changbe ziegeneu.

¹⁷³Achu ’ngngâ gai ra ning ba peize getuakuâ bam lau, ning gu samde ramme I kelâng lu de lei.

¹⁷⁴Ning gu tewka’nringbe ze I lunei ze heguîkua lei, Hei Tingwang gau, zai ning gu hingde â a lungsuiyibe de lei.

¹⁷⁵Achu ring ze bam ra pei lau, dezai ningchu I toa ra hangge zeu, zai ning gu hingdetewgaibe ramme zene peize achu ’ngngâ gai lau.

¹⁷⁶Meli gadibe gum ze I tatlietat ti de lei; ning guâ ka’ngguapeu je peu gai lau, ning gu hingde ramme deze I ’ngngaî mak la lei.