Read Zeme Naga GETOABELEU 132 Bible Online

GETOABELEU 132 - Zeme Naga bible

GETOABELEU 132

¹Dabidbe deu hanggene, Hei Tingwang gau, Dabidbe kahereube ramme leine liegaibe chibam lau;

²pa ne Tingwang dage deseu gai ze, zai Jakobbe Rapeu tâtewchipeu dage deseu gai ze,

³“I â a ki ge zuagut ra mak, makchai a jeî ge du jei ra mak lei;

⁴a mik je jei ra I pei ra mak, makchai jeikeu ze a mikkûm ramme ’mmuitîng gai ra pei ra mak lei,

⁵Tingwang hangge pebâm hang, Jakobbe Rapeu, Tâtewchibe bamrabe bâm hang I ngaudau mak tânege aî, acheu ze sagaibe ze chibam lau,” ze kacheu de lei.

⁶Ni, Ephratha ge chize anui seu de lei, Jaar gu peningkâm ramme ge chize anui ngau de lei.

⁷“Pa kebambe bâm ’mbe anui tat kei lei; pe pichaîra ge anui kellum kei lei!”

⁸Zuachu lau, Hei Tingwang gau, zai ning gu gesaube bâm ’mbe tatchu lau, nang benai ning gu tâtewchibe hingdebung zeu.

⁹Ning gu tingkume je peize kapelingbe ne bâ gai ze bam lau, zai ning gu ka’nchime ne peize hesuiyibe ne ’ngkiak lau.

¹⁰Ning guâ ka’ngguapeu Dabidbe hang ziegene ning gu ’nnukkai’ndipeu ju ze tei’nriktat se lau.

¹¹Dabidbe chigene helitatdaimerabe, mâ-wangchangsingrabe hatkaibe, Hera ne Dabidbe dage deseugaibe ze: “Ning na singme ruage hangkat je ning gu heguang-bamrak ge I ne tei’ntau gai gu lei.

¹²Ning name ne a gu samhatkaibe benai a gu samde ramme penui je I geteiliarabe ze penui ne tei’mmi dizaine â, penui name ne betingbeta ning gu heguang-bamrak ge ’ntau gu lei,” kacheube ze lei.

¹³Tingwang ne Zaion je kelâng gai ’ndi de lei; chize pa ne pa lungrabe bâm hangge ’nchâ gai ’ndi de lei:

¹⁴“Aize betingbeta a gu gesaube bâm de lei; aige I ne ’nnai bam gu lei, aize I ne ’nchâ gai ’ndi daseu.

¹⁵Pe gu ka’nnangbe zat leine I ne misongga ze ’nnam gai gu lei; zai pe dage bamme kelaksiame je I ne tingku ne kei’nggeugit kai gu lei.

¹⁶Pe gu tingkume ramme je I ne tewka’nringbe zene bâ gai gu lei, zai pe gu ka’nchime ramme hesuiyibe ne ’ngkiak ze bam gu lei.

¹⁷Chige Dabidbe hangge mâkie kat puakpat ra I ne tew gai gu lei; A gu ’nnukkai’ndipeu hangge kachâbung I ne kedâ gai lu la de lei.

¹⁸Pe teureime je I ne ka’ngngambe zene bâ gai gu lei, kane pe peireige â, pe gu heguangpeichûp ze pa’mbi lerba bam gu lei,” ze acheu sa gai zeu.