Read Zeme Naga GETOABELEU 135 Bible Online

GETOABELEU 135 - Zeme Naga bible

GETOABELEU 135

¹Tingwang je toa lau. Tingwang ji je toa lau, getoabe pei gai lau, Hei ningnui Tingwang guâ ka’ngguame gau,

²ningnui Tingwang ki ge sapme, anui Rapeu ki gu hekisiâm ramme ge sapme gau!

³Tingwang je toa lau, Tingwang â yi daseu; pe ji ge leutew lau, pa â ka’nggiabe ne pui lei!

⁴Tingwang ne Jakobbe je pe hangge kelâng gai ’nde lei, Israel je pe heurâ hangge zeu.

⁵Tingwang â di-desang lei be, zai anui Wangpeu â hera ramme leine peireige bam lei be I chî lei.

⁶Tingwang ne pa ne tewnei-neibe tew lei, tinggîm benai kedei ge, zai sungkling benai gechukbe ramme gezeu.

⁷Kedei mik gene kemâu ramme ’ntuachu ra tewgaipeu ze â pa de lei, tingruibe hangge hegiria ramme kepit ra tewgaipeu, zai pe gu keruaki ramme gene tingkai teiwanggaipeu zeu.

⁸Ijip ge ziemmena benai hekaubena gu meraibe na ramme leine je tewchatpeu ze â pa de lei;

⁹ning zuilung ge, Hei Ijip gau, dak ka’nchetbe benai ningdaulakbe zat ramme Pharaobe benai pe gu tâka’ngguame leine peireige langgaipeu zeu;

¹⁰zai heramzatme misonggame benai peranchibe heguangme ramme,

¹¹Amorme gu heguang Sihonbe zai Bashan gu heguang Ogbe, zai Kanaan gu heguangram pelane je tew’nggagaipeu,

¹²zai chi heram penui heurâ chang ze bambe ze pe gume Israelme hangge penui ram hang peigaipeu zeu.

¹³Ning ji â Hei Tingwang gau, betingbeta bam bam lei, ning ji sasuangbe â, Hei Tingwang gau, rehei leine ge bam lei.

¹⁴Tingwang ne pe gume je peling gechiau’nzeitun gai gu lei, zai pe gu tâka’ngguame peireige ngau’nggia gai gu lei.

¹⁵Heramzatme gu heraluîtewbe ramme ze â, gepût benai gechâk ze de lei, ziemmena bachiâm zeu.

¹⁶Penui mui ramme la, kane penui sa mak, penui mik ramme la, kane penui ngau mak,

¹⁷penui kun ramme la, kane penui seu mak, zai penui mui ramme ze du hechuilu mâ du ga lei.

¹⁸Chiramme chiamme ze â chiramme gum penui bam gu lei!— eu lei, chiramme je ka’nnumme leine ze â chigum bam ra de lei!

¹⁹Hei Israelbe kibau, Tingwang je ’nnam gai lau! Hei Aaronbe ki gau, Tingwang je ’nnam gai lau!

²⁰Hei Lebibe ki gau, Tingwang je ’nnam gai lau! Ningnui Tingwang je hingchime gau, Tingwang je ’nnam gai lau!

²¹Zaion gene Tingwang je ’nnam gai be lau, Jerusalem ge bambepeu zeu. Tingwang je toa lau.