Read Zeme Naga GETOABELEU 139 Bible Online

GETOABELEU 139 - Zeme Naga bible

GETOABELEU 139

¹Hei Tingwang gau, nang ne achu peu ze achu chî lu de lei!

²I ’ntaukeube benai I zuachube lua nang chî lei; kedeu ’mbene a gu ka’nningbe tak ze nang â chî lu lei.

³Nang ne a ’mpuî tak benai I jeikelakaugaibe tak ze kemêtpri bam lei, nang â a gu ’mpuî’nchâk leine chî lei.

⁴A lei ge samkie kat pat kai makgene ’nsangdu, ni, Hei Tingwang gau, nang ne pelane gu ze chî kam lei.

⁵Nang ne achu a chai a sua bamguâ lei, zai a peireige ning ba diekua bam lei.

⁶Aigumbe I ne gechîbe ze ’nningdaulak-desang lei; hu’nteu nan ze I ’nningchang lak lei.

⁷Ning gu Herui dagene I ’ndai’ngge tat kai ra lau? Nune nang bambe bâm gene ’ndai’ngge I pak kai ra lau?

⁸Tinggîm ’mbe I chu gai sedu nang â chige la lei! Kechaiberam ’mbe I wangkeu sedu nang â chige la lei!

⁹Hechua ge I liamtat ze sungkling pebâm deulangbe riâ ge bam gai sedu,

¹⁰chige ’nsangdu ning ba ne achu ngua gu lei, zai nang hezat’mbia ba ne achu tei’nggim gu lei.

¹¹I ne, “Peize kemuîbe ne achu gumchim ne lau, zai a dage kebabe bambe ze kemuîbe peize chang de lau,” ze a acheu gai sedu,

¹²kemuîbe ’nsangdu ning hang â muî mak, tingmuî ’nsangdu ning hang â, ’nrîmbeting gum ze ba’nchiepuang bam lei; kemuîbe â kebabe gum ze ning hangge bam dadegeu.

¹³Nang ne a lung taurâ ramme ’ndam gai bei de lei, a pui gu nebâm ge nang ne achu tutemi gai bei de lei.

¹⁴I ningchu toa lei, nang â mi hingkube benai mi ningdaulakbe dadegeu. Ning tatew ramme mi ningdaulak-desang lei! Nang ne achu chî’nchichiak bam lei;

¹⁵a kaupui a lui gechangbe je ning dagene tei’mbai mak lei, achu reine ze ’ngkaugaibe luage, kedei sîng kechukbe ramme ge betak hang ’nningchilakbe gene achu kaibeibe luage zeu.

¹⁶A kaupui a lui hang patrabe chize pat makge, nang ne chige pie gai bei de lei; chi hepumtaura ramme leine gu ze ning gu leisikiuak ge raw kam gai bei de lei, achu a luî hang ’ngkaupatkaibe tingnaimikpui ramme, chiramme mâ du pat mak ’ngka gezeu.

¹⁷Nang ne ka’nningbe tak ramme ze â, a hangge betâudi-desang lei, Hei Hera gau! Chiramme ze mi ’nningchanglakbe ramme kam de lei!

¹⁸Chiramme I sei ra dizai â, chiramme ze â timbuimoîne suadu kie gu lei. I ’nrakchu dege, I ning dage laleu de lei.

¹⁹Nang ne helungriaksiame je bichat kai bei nung laîzai, Hei Hera gau, zai kegîme a dagene rimnatat ti nung laîzai,

²⁰penui nûtra ne ningchu saka’nsiame, ningchu ngau’nna ze giême bau zeu!

²¹Hei Tingwang gau, ningchu ngaugailakme je I ne ngaugailak mak ti lau? Zai ningchu ’nggi ra zuachume je I ne ngautenet mak ti lau?

²²Penui je ngaugailak-desang lei; a teureime hangge penui je I ne riam gai lei.

²³Hei Hera gau, achu ’mmêt ze a lung tak chî le lau! Achu kedak ze a gu ka’nningbe tak ramme chî le lau!

²⁴Zai a dage helungriaksiabe tak la mei be pie le lau, zai betundaimakbe ’mpuî ge achu ngua gai lau!