Read Zeme Naga GETOABELEU 140 Bible Online

GETOABELEU 140 - Zeme Naga bible

GETOABELEU 140

¹Ziemmena kesiame dagene achu lupat kai lau, Hei Tingwang gau; ziemmena katîmphime dagene achu tei’nggim gai lau,

²penui lung ge mâ-kesiabe tew ra ka’nningme, zai herei ra kegichu-bamme zeu.

³Henêu leitu ’nrin bambe gum ze penui lei ze petûn tew’nrin gai lei, zai penui muikuâng lungge mechinêu gu ’nchai geteube bam lei

⁴Hei Tingwang gau, helungriaksiame ba gene achu hereiheka gai lau; ziemmena katîmphime dagene achu tei’nggim gai lau; a pî rapkau ra chiamme bau zeu.

⁵Gechîrettewme ne a hangge ’mpia tew’mbai gai la de lei, zai heria ramme ne chiam ze penui ne a hangge chiâk ’mpia lîm gai lei; ’mpuî’ntai ge a hangge penui ’mpia ramme tew gai la lei.

⁶Tingwang je nang â a Rapeu de lei, ze I kacheu de lei; Hei Tingwang gau, I kiambe kuâ ge ning kun ’ndualie gai lau!

⁷Hei Tingwang a Wang, achu ripatpeu peranchipeu gau, kahereibe mai ge nang ne a peî gumchim bei de lei.

⁸Hei Tingwang gau, helungriaksiapeu ka’nchâbe zat ramme pei gai se lau; pe gu kesia-ka’mpungbe ramme ze peize tew’nduâtat se lau!

⁹Achu tuaguame penui peî ze ’ngngûchu lei, penui mui ne kakeraibe sam sabe ze penui peireige peize wangchang lau!

¹⁰Peize penui peireige hemi-mechingkâng heigiebe ’ngngaîkeu gai lau! Mâ-kuiki ramme ge penui je peize tuâ gai be lau, peize chu dai ta ra hangge zeu!

¹¹Sa’nsiaruachime je â heram ge peize ’nggim lak ze bam lau; katîmphibe kau je â kesiame ne peize chumkâu gai be lau!

¹²Lungkahereume peireige tewgaibe ze Tingwang ne chî ze la lei, zai kegame deu hang ka’nzeibe tâ tew la lei be I chî lei.

¹³Kapelingbe kau ne ning ji ge hesuiyibe sam pau gai sing gu lei; zai ka’nzeibe kau ne nang bambe ge lung gu lei.