Read Zeme Naga GETOABELEU 141 Bible Online

GETOABELEU 141 - Zeme Naga bible

GETOABELEU 141

¹I ningchu ku lei, Hei Tingwang gau; a lam wangkelun lau! Ningchu I kûgaibe lua a kuâ ge ning kun ’ndualie gai lau!

²A gu kakellumbe ze ning masuage mâ-perîmyibe bambe gumbe hangge riam gai lau, zai a ba getuachube ze hegî ge herâtewbe peipatbe hangge riam gai lau!

³Hei Tingwang gau, a mui ge reîchibe kai lau, zai a muiki ze nang ne reîkua bam lau!

⁴Hemui-helut gu tâ tewme je ngua lu ze helungriaksiabe tâ tewbe ramme, mâ-kesiabe tâ leine ge a lung ze tei gai se lau; zai penui gu mâ-teuyibe zat ramme teu ra achu pei gai se lau!

⁵Peize ziemmena keyime ne achu ka’nggiabe gene lak ze ’ngngiam lau, kane mâtew-tewsede ziemmena kesiame gu mâ-châdui ze a peî ge ’nnuk kai se lau; I kakellumbe zene helungriaksiabe tatew peireige ’nggi la daseu.

⁶Penui je tew’ngkuigairame dage penui je pei gai dezai, Tingwang sam â peling lei be penui chî gu lei.

⁷Hangkat ne tingchu tewpâng lu ze kedei ge tuârarip kai gum ze, penui ra ramme Kechaiberam muiki ge ’nrukrarip kai bu lei.

⁸Kane a mik â ning lam ge pie la lei, Hei Tingwang Hera gau; nang ge a ’mbaibâm hang I peu lei; achu sapdangrabe ga ze sâu gai se lau!

⁹Achu mi ra penui ne ’mpia kaibe, zai tâ-kesiabe tewme gu ’mpia ramme gene achu reî lau!

¹⁰Helungriaksiame leine penui gu chîak’mpia ramme ge peize kâuhiam gai de lau, I ’mbiadibe luage zeu.