Read Zeme Naga GETOABELEU 143 Bible Online

GETOABELEU 143 - Zeme Naga bible

GETOABELEU 143

¹Hei Tingwang gau, I a gu gekiebe ze ’ngking gai lau; a kiamsam ramme ge ning kun ’ndualie gai lau! Ning gu lungsangtewbe gene, ning gu kapelingbe gene a sam kak kai lau!

²Ning guâ ka’ngguapeu je samrambe ge nguagut kai se lau; ning suage ziemmena ring ze bambe kau mî du ka’nzeibe ga lei.

³A teureime ne achu guaka’nchu de lei; a keringbe ze pa ne kedei ge tewhitruai gai bei de lei; ’ndâge chaidime gum ze achu â, pa ne kemuîbe ge ’ntau ra tew gai bei de lei.

⁴Chipauziegene a lung ranchi ze a dagene gakeu di de lei, a dage a lung ze hing-desang gai di de lei.

⁵Tingtie gu tingnaimikpui ramme I ’nningdau de lei, nang ne tâtewgaibe leine peireige I ’nningdesi gai de lei; ning ba ne tewgaibe ramme deze I ’nninglu-lu gai di de lei.

⁶Ning dage a ba I getuapat kai de lei; kedei changkube gum ze ningchu I â a keringbe ne kaherei de lei.

⁷Hei Tingwang gau, a sam kak kai ra hangge kelun lau! A lung ka’nningbe peran-gakeu de lei! A dagene ning ju ze tei’mbai se lau, makchai â, mâ-kuiki ge kâukeugaidime gum ze I chang gu de lei.

⁸Hechua ge ning gu hungka’ntipbe sam ze achu seu ra pei lau, nang ge I ’nnumka’mmibe kai daseu. I tatrabe ’mpuî ze achu getei gai lau, ning dage a keringbe ze teichu’ngngu gai la daseu.

⁹Hei Tingwang gau, a teureime dagene achu lupat kai lau! A ’mbaibâm hangge ning dage I pak kai de lei!

¹⁰Ning suî’nning tew ra achu getei gai lau, nang â a Rapeu daseu! Peize ’mpuîki katenaibe ge ning gu herui keyibe ne achu ngua gai lau!

¹¹Hei Tingwang gau, ning ji hanggene achu tei’nggim gai lau! Ning gu kapelingbe zene kahereube gene achu nguapat kai lau!

¹²Zai ning gu hungka’ntipbe gene a teureime je tew’ngga ne lau, zai achu ka’nggime leine je tew’ngga kam ne lau, I â ning guâ ka’ngguapeu daseu.